A ummi cazin ah kal

Pathian Pennak Cu Lungthin Chungah A Ummi A Si Maw?

Pathian Pennak Cu Lungthin Chungah A Ummi A Si Maw?

Baibal chimmi

A si lo, Pathian Pennak cu Khrihfa hna i lungthin chungah a ummi men a si lo. * Baibal nih “Vancung Pennak” tiah a auhnak thawngin a umnak hmun kha fiang tein a langhter. (Matthai 4:17) Pathian Pennak cu vancung in a uk dingmi cozah taktak a si tiah Baibal nih a langhtermi kha zohhmanh.

  • Pathian Pennak ah uktu, ukmi, upadi le nawlngeihnak hna a um. Van le vawlei ah Pathian duhnak tlinter dingin mah nawlngeihnak kha hman a si lai.—Matthai 6:10; Biathlam 5:10.

  • Pathian cozah asiloah Pennak nih vawleicung i “miphun zakip le holh phun zakip” kha a uk hna lai. (Daniel 7:13, 14) Uknak nawl a ngeimi hna cu rammi nih si loin Pathian nih a thimmi hna an si.—Salm 2:4-6; Isaiah 9:7.

  • Jesuh nih zumhfekmi lamkaltu hna kha Vancung Pennak ah keimah he “bawiṭhutdan cungah nan ṭhu lai” tiah a ti hna.—Luka 22:28, 30.

  • Pathian Pennak nih ral a ngei i mah a ral vialte kha a hrawh dih hna lai.—Salm 2:1, 2, 8, 9; 110:1, 2; 1 Korin 15:25, 26.

Baibal nih Vancung Pennak cu lungthin chungah a ummi a si i mah nih mi pakhat i lungthin kha a uk tiah a kan cawnpiak lo. Asinain “Vancung Pennak kong” asiloah “Pennak kong thawngṭha” cu minung lungthin cungah huham a ngei kho i a ngeih awk zong a si tiah Baibal nih a langhter.—Matthai 13:19; 24:14.

“Pathian Pennak cu nan chungah pei a um cu” timi sullam cu zeidah a si?

Baibal lehnak cheukhat i Luka 17:21 bia ruangah Pennak a umnak hmun he aa tlaiin mi cheukhat cu an lung aa tuai. Tahchunhnak ah, “Pathian Pennak cu nan chungah a um” tiah Judson Lehmi Baibal nih a ti. Mah Baibal caang kha a hmaan ning tein hngalhthiam awkah a hnuhmai bia zoh a hau.

Pathian Pennak cu Jesuh a ralchanh i thah a timtu hna lungthin chungah a ummi a si lo

Jesuh nih mah bia hi amah a ralchanh i thah a duhmi, biaknaklei hruaitu Farasi mi hna sinah a chimmi a si. (Matthai 12:14; Luka 17:20) Cucaah a lung a khongmi Farasi mi hna lungthin chungah Pathian Pennak um ding cu a si kho hnga maw? Jesuh nih “nan chung cu lih le sualnak in a khat” tiah a ti hna.—Matthai 23:27, 28.

A dang Baibal lehnak hna nih Luka 17:21 i Jesuh chimmi bia kha fiang tein hitin an leh: “Pathian Pennak cu nan sinah a um” tiah a ti. (Contemporary English Version) “Pathian Pennak cu nan lakah a um.” (Vawlei Thar Lehnak Baibal) Vancung Pennak cu Farasi hna “nan sinah a um” asiloah “nan lakah a um” tiah a ti tikah Pathian Pennak ah siangpahrang a ṭuan dingmi Jesuh cu an hmaika ah a dirmi kha a chimduhmi a si.—Luka 1:32, 33.

^ cat. 3 Khrihfa tiah aa timi biaknak tampi nih Pathian Pennak cu minung lungthin chungah a ummi a si tiah an cawnpiak hna. Tahchunhnak ah, United States i Thlanglei Baptist pawl tuahmi Civui pakhat ah Pathian Pennak cu “mi pakhat cio i lungthin chungah a ummi a si i an nunnak cungah huham a ngei” tiah an thanh. Cu bantukin Pope Benedict XVI nih a cauk (Jesus of Nazareth) ah “Pathian Pennak cu minung lungthin chungah a ummi a si” tiah a ti.