A ummi cazin ah kal

Thilnung a Phunphun Ser awkah Pathian nih Thlennawnnak a Hmang Maw?

Thilnung a Phunphun Ser awkah Pathian nih Thlennawnnak a Hmang Maw?

Baibal Chimmi

A hmang lo. Minung, saram le thingkung hna kha anmahle an ‘phun’ ningin Pathian nih a ser hna tiah Baibal nih fiang tein a langhter. * (Genesis 1:12, 21, 25, 27; Biathlam 4:11) Minung cu a hmasa bik kan nu le kan pa Adam le Eve hrinsor lawngte kan si tiah a ti. (Genesis 3:20; 4:1) Baibal ah Pathian nih thlennawnnak kha hmangin thilnung a phunphun a ser hna timi kong a um lo. Asinain science lei mifim pawl nih thilnung phunkhat cio ah a phun aa ṭhen ṭhanmi a phunphun a um tiah an timi cu Baibal he aa ralkah lo.

 Pathian nih thlennawnnak kha a hmang maw?

Pathian nih thlennawnnak kha hmangin thilnung pawl a ser hna tiah a zummi hna nih ruahnak a phunphun an ngei. Encyclopædia Britannica ningin “thlennawnnak timi cu Pathian nih kokek vawlei a uk tikah a hmanmi lam pakhat a si tiah mi cheukhat nih an zumh.”

Mah zumhnak lakah a tanglei i ruahnak hna zong hi aa tel kho men:

  • Hlanlio kum tampi in thilnung dihlak cu chuahkehnak aa lomi in hrinsormi kan si.

  • Thilnung phunkhat cu aa thleidang tukmi a dang thilnung phunkhat ah duhsah duhsah tein aa thleng.

  • Mah thlennak ah a biapi bikmi cu Pathian a si.

 Baibal le thlennawnnak cu aa tlak maw?

Thlennawnnak nih Genesis Baibal i sernak kong cu a palh dih tiah a ti bantuk a si. Asinain Jesuh nih Genesis Baibal chung i sernak kong cu a si taktakmi kong in a langhter. (Genesis 1:26, 27; 2:18-24; Matthai 19:4-6) Jesuh cu vawleicung a rat hlanah van ah Pathian he an umṭi i ‘zeizong vialte sernak’ ah a bawmh tiah Baibal nih a ti. (Johan 1:3) Cucaah Pathian nih thlennawnnak kha hmangin thilnung a phunphun a ser hna timi ruahnak cu Baibal he aa tlak lo.

 Thingkung le saram pawl an i thlen khawhmi cu thlennawnnak a si maw?

Baibal ah phun pakhat in zeitluk tiangin dah phun aa ṭhen khawh timi kong a chim lo. Pathian nih a sermi thingkung le saram pawl cu pawngkam sining he aa tlakin an i thleng kho asiloah an nung kho timi cu Baibal he aa ralkah lo. Mi cheukhat nih cutin an i thlen khawhmi cu thlennawnnak a si tiah an zumh nain thilnung a thar phun khat a chuak timi a um lo.

^ cat. 3 Baibal ah a hmanmi ‘a phun’ timi biafang cu science lei mifim nih an hmanmi “phun” timi biafang nakin a sullam a kau deuh. A caan ah, science lei mifim pawl nih cikor a thar phunkhat cu thlennawnnak in a rami a si tiah an ti. Asinain mah cu thlennawnnak ruangah si loin Genesis Baibal chungah a chimmi “phun” pakhat i phun aa ṭhenmi tu a si.