A ummi cazin ah kal

Kum Upa a simi Nulepa Zohkhenhnak he aa tlaiin Baibal nih Zeidah a Chim?

Kum Upa a simi Nulepa Zohkhenhnak he aa tlaiin Baibal nih Zeidah a Chim?

Baibal chimmi

A cuza cangmi fale nih kum upa a simi nulepa zohkhenh awkah a biapi tukmi rian an ngei. Baibal nih hitin a ti: “An innchungkhar zohkhenh le an pa si hna seh, an pi si hna seh, cawm ṭhan ve cu an rian pakhatnak ah an chiah awk a si i cucu biaknaklei in an rian, Pathian nih tuah hna seh ti a duhmi rian cu a si.” (1 Timote 5:4) A cuza cangmi fale nih kum upa a simi nulepa an zohkhenhmi hna cu na nu le na pa upat hna timi Baibal nawlbia an zulhmi a si.—Efesa 6:2, 3.

Kum upa a simi nulepa zohkhenhnak he aa tlaiin Baibal ah cuset khaset timi lamhruainak a um lo. Asinain nulepa a zohkhenhmi, zumhnak a ngeimi nu le pa cheukhat kong cu a langhter. Mah lengah nulepa a zohkhenhmi hna caah bawmtu a simi a ṭhami ruahnak cheuhnak zong a langhter.

 Baibal chan ah chungkharmi cheukhat nih kum upa a simi nulepa kha zeitindah an zohkhenh hna?

Thil sining cungah i hngat in lam tampi in an rak zohkhenh hna.

  • Josef cu kum upa a simi a pa, Jakob he aa hlatnak hmun ah a um. Josef nih caanṭha a hmuh tikah a pa kha a pawngah rak i ṭhial dingin a timhtuah. A pa a rak phanh tikah umnak inn le rawl a pek lengah a rak huhphenh.—Genesis 45:9-11; 47:11, 12.

  • Ruth cu a vapa nu i a ram ah a rak i ṭhial ve i a va nu zohkhenh awkah rian fakpi in a ṭuan.—Ruth 1:16; 2:2, 17, 18, 23.

  • Jesuh nih a thih lai te ah nuhmei si dawh a simi a nu, Mary a zohkhenhtu ding kha a rak thim.—Johan 19:26, 27. *

 Zei bantuk Baibal ruahnak cheuhnak nih dah nulepa a zohkhenhmi kha a bawmh khawh hna?

Kum upa a simi nulepa zohkhenhnak ah pumsalei le lungthinlei batnak ti bantuk zuamcawhnak a um khawh caah Baibal phunglam hna nih a kan bawmh khawh.

  • Nulepa kha upat hna.

    Baibal chimmi: “Nan nu le nan pa kha upat hna u.”—Exodus 20:12.

    Baibal phunglam zulh khawh ning: A si khawh ahcun an nunnak he aa tlaiin anmah tein khuakhanternak thawngin upatnak kha langhter. Cun zohkhenhnak he aa tlai zongin anmah tein biakhiak hna seh. Mah lengah na bawmh khawhmi thil hna kha a tlari tein tuahpiaknak thawngin upatnak kha langhter.

  • Theihthiampiak hna law ngaithiam hna.

    Baibal chimmi: “Lungsau thinfual hi fim a si, palhnak i maimilh cio hi minung sunparnak a si.”—Phungthlukbia 19:11.

    Baibal phunglam zulh khawh ning: Kum upa a simi nulepa nih na zohkhenh hnanak kha zei rel loin le zaangfahnak ngei loin bia an chim tikah hitin i hal, ‘Anmah bantukin ri ka ngeih i zeihmanh ka tuah khawh lo tikah zeitindah ka um lai?’ Theihthiampiak ding le ngaihthiam dingin naa zuam ahcun thil sining a chiat chin nakhnga lo na hrial khawh lai.

  • Midang kha ruahnak cheuhnak hal hna.

    Baibal chimmi: “Ruahnak i cheuhnak a um lo ahcun khuakhannak kha a pingah a kal tawn, sihmanhsehlaw ruahnak cheutu an tam ahcun a hlawh a tling tawn.”—Phungthlukbia 15:22.

    Baibal phunglam zulh khawh ning: Na nu le na pa nih an ngeihmi zawtnak tawnghtham ning kha hlathlainak tuah. Nan hmunhma ah a ummi zohkhenhnak he aa tlaiin zei bantuk bawmhnak dah hmuh khawh a si ti kha hlathlai. Nulepa a zohkhenhmi hna he bia i ruah u. Unau na ngeih ahcun nulepa i an herhmi, zohkhenh ning, rian i phawtnak ti bantuk kha chungkhar ningin i ruah u.

    Kum upa a simi nulepa zohkhenhnak kong kha chungkhar ningin i ruah u

  • Toidornak ngei u.

    Baibal chimmi: “Mi toidor te i um a ṭha deuh.”—Phungthlukbia 11:2.

    Baibal phunglam zulh khawh ning: Ri ka ngei ti kha cohlang. Tahchunhnak ah, mikip nih a caan le thazaang he aa tlaiin ri kan ngei. Mah cu na nu le na pa zeitluk in dah na zohkhenh khawh hna timi cungah huham a ngei. A hleiin zohkhenh a herhmi nulepa kha na zohkhenh hnanak ah na bat a si ahcun chungkharmi a dang le siibawi pawl kha bawmhnak hal hna.

  • Nangmahle nangmah zong i zohkhenh.

    Baibal chimmi: “Ahohmanh nih mah pum kha an hua bal lo. . . . Ahohmanh nih a pum cu a zoh, a khenh i a cawm.”—Efesa 5:29.

    Baibal phunglam zulh khawh ning: Nulepa zohkhenhnak rian na ngeih buin nangmah herhmi le innchunghawi a ngeimi na si ahcun na chungkhar herhmi zohkhenh awk zongah rian na ngei ko lai. Ngandamnak a pemi rawl ei a hau. I dinhnak le ihnak caah a caan a za in pek a hau. (Phungchimtu 4:6) A si khawh tik paohah chikkhat i din. Cutin na tuah ahcun nulepa zohkhenhnak ah lungthinlei le pumsalei in timhcia na si lai.

 Baibal nih kum upa a simi nulepa kha inn ah umter in zohkhenh awk a si tiah a ti maw?

Fale nih nulepa kha inn ah umter in zohkhenh a hau timi lamhruainak Baibal ah a um lo. Cheukhat nih cun kum upa a simi nulepa kha a si khawh chung inn ah umter in zohkhenh awkah bia an khiah. Asinain thil sining cheukhat ahcun tar zohkhenhnak inn i chiah ah a ṭha deuh tiah bia an khiah men lai. Zeitin tuah ah dah a ṭhat bik lai ti kha chungkharmi dihlak in an i ruahceih awk a si.—Galati 6:4, 5.

^ cat. 12 Mah Baibal caang he aa tlaiin Baibal fianternak pakhat nih hitin a ti: “[Mary a va] Josef cu a thihnak a sau cang i Jesuh nih a nu kha zohkhenh dawh a si. Atu ah Jesuh cu a thih cang lai caah a nu cu zeitindah a um lai? . . . Mah cu Khrih nih kum upa a simi nulepa zohkhenh awk le hnemh awkah a kan cawnpiakmi a si.”—The NIV Matthew Henry Commentary in One Volume, pages 428-429.