A ummi cazin ah kal

Holh Theih loin Holhnak Kong he aa Tlaiin Baibal nih Zeidah a Chim?

Holh Theih loin Holhnak Kong he aa Tlaiin Baibal nih Zeidah a Chim?

Baibal chimmi

‘Holh theih loin holh’ timi cu a hmasa Khrihfa cheukhat nih an hmuhmi khuaruahhar thil ti khawhnak a si i voikhat hmanh cawn bal loin holh pakhat chim khawhnak kha a si. (Lamkaltu 10:46) Phungchimtu nih a chimmi bia kha mah holh a theimi paoh nih an hngalhthiam. (Lamkaltu 2:​4-8) Holh theih loin holhnak cu Pathian nih kumzabu pakhatnak i Khrihfa cheukhat a pekmi hna thiang thlarau laksawng a si.​—Hebru 2:4; 1 Korin 12:​4, 30.

 Holh theih loin holhnak cu khoika ah le zeitik in dah aa thawk?

Mah khuaruahhar thil cu AD 33, Judah mi hna tuahmi Pentekos Puai ni i zinglei, Jerusalem khua ah aa thawkmi a si. Jesuh zultu 120 hrawng cu hmunkhat i an i pumh lioah “Thiang Thlarau in an khat i Thlarau nih chim khawhnak a pek hna caah khan holh dang in an holh.” (Lamkaltu 1:​15; 2:​1-4) “Vawleicung khuazakip in a rami” mibu nganpi cu an i pum i “kanmah holh in an holh tiin an rak theih cio.”​—Lamkaltu 2:​5, 6.

 Holh theih loin holhnak i aa tinhnak cu zeidah a si?

  1. Khrihfa pawl cu Pathian nih a umpi hna ti langhternak caah a si. Hlan ah Moses ti bantuk zumhfekmi hna kha Pathian nih a umpi hna ti langhternak caah khuaruahhar thil tuah khawhnak a pek hna. (Exodus 4:​1-9, 29-​31; Nambar 17:10) Holh theih loin holhnak i aa tinhnak zong cutin a si ve. Dirhkami Khrihfabu cu Pathian nih a umpi ti langhternak caah a si. Lamkaltu Paul nih hitin a ṭial: “Holh theih loin holh cu Pathian a zummi hna caah si loin a zum lomi hna ca i hmelchunhnak a si.”​—1 Korin 14:22.

  2. Khrihfa hna nih felfai tein thawngṭha an chim khawh nakhnga caah a si. Pentekos ni i Jesuh zultu pawl bia a theimi hna nih hitin an ti: “Pathian nih thil lianngan a tuahmi hna kha an chim tikah an chimmi cu kan holh in an chim tiin kan theih cio hna.” (Lamkaltu 2:​11) Cucaah mah khuaruahhar thil i aa tinhnak a dang pakhat cu Khrihfa pawl nih felfai tein “thawngṭha chim awk” le Jesuh nawlpeknak ningin ‘miphun vialte zultu ser’ awkah a si. (Lamkaltu 10:42; Matthai 28:19) Mah ni ah khuaruahhar thil a hmu i thawngṭha a ngaimi 3,000 hrawng cu zultu an hung si.​—Lamkaltu 2:​41.

 Holh theih loin holhnak cu a um zungzal maw?

A um zungzal lo. Holh theih loin holhnak i telin thiang thlarau laksawng hna cu chikkhat ca lawng an si. Baibal nih hitin a chimchung: “Profet an um maw? An rian cu a dih ko lai. Holh theih loin a holhmi an um maw? Cu hna cu an dong lai.”​—1 Korin 13:8.

 Holh theih loin holhnak cu zeitik ah dah a dongh lai?

Lamkaltu hna chan ah thiang thlarau laksawng kha a dang Khrihfa hna zong pek an si ve. Thil sining tam deuh ah lamkaltu hna nih zumtu hna cungah an kut an chuannak thawngin pek an si. (Lamkaltu 8:​18; 10:44-​46) Lamkaltu hna sinin thiang thlarau laksawng a hmumi hna nih midang kha an pe chin kho hna lo. (Lamkaltu 8:​5-7, 14-​17) Tahchunhnak ah, cozah bawi nih mi pakhat kha mawṭaw mawnghnak license a pek khawh nain mah license a ngeimi nih midang kha license peknak nawl a ngei lo. Lamkaltu hna le lamkaltu hna sinin mah laksawng a hmumi hna an thih hnuah holh theih loin holhnak cu rak dongh dawh a si.

 Tuchan i holh theih loin holhnak he aa tlaiin tah zeitin?

Kumzabu pakhatnak a donghnaklei hrawngah khuaruahhar laksawng a simi holh theih loin holhnak cu a rak dong. Tuchan ah ahohmanh nih Pathian ṭhawnnak thawngin holh theih loin kan holh tiah fiang tein an chim kho lo. *

 A hmaanmi Khrihfa hna cu zeitindah thleidan khawh an si?

Jesuh nih mah zawn ruat lo dawtnak cu a zultu pawl i hmelchunhnak a si tiah a ti. (Johan 13:34, 35) Lamkaltu Paul zong nih dawtnak cu a hmaanmi Khrihfa hna i zungzal hmelchunhnak a si tiah a kan cawnpiak. (1 Korin 13:​1, 8) Pathian thiang thlarau nih “a chuahtermi” Khrihfa ziaza hna a langhter tikah dawtnak kha hmasa bik ah a langhter.​—Galati 5:​22, 23.

^ cat. 20 “Holh Theih loin Holhnak​—Pathian Sinin A Si Maw?” timi capar ah zoh.