A ummi cazin ah kal

Peknak Kong he aa tlaiin Baibal nih Zeidah a Chim?

Peknak Kong he aa tlaiin Baibal nih Zeidah a Chim?

Baibal chimmi

Baibal nih midang thil ṭhenh awk le a ruang ṭha a um caah cutin tuah awkah timhcia tein um u tiah a kan forh. Mah nih a hmutu lawng si loin a petu zong peknak in ṭhatnak hmuh khawh a si ti kha a langhter. (Phungthlukbia 11:25; Luka 6:​38) Jesuh nih “pek leiah hin hmuh lei nakin lunglawmhnak a um deuh” tiah a ti.”​—Lamkaltu 20:35.

  • Peknak nih zeitik ah dah Pathian lung a lawmhter?

  • Peknak nih zeitik ah dah Pathian lung a lawmhter lo?

  • Peknak he aa tlaimi Baibal caang hna

Peknak nih zeitik ah dah Pathian lung a lawmhter?

Lungtho tein peknak nih ṭhatnak a chuahter. Baibal nih hitin a ti: “Cucaah nanmah le nan lungthin nan i thleh ning cio in rak tho u, nan thawh tikah i ngaihchih bu le hnekchom in si hlah seh, lunglawm tein a thomi kha Pathian nih a dawt hna.”​—2 Korin 9:7.

Lungtho tein peknak cu Pathian cohlanmi “biaknak” phunkhat a si. (Jeim 1:​27) A chambaumi hna siang ngaiin a bawmmi cu Pathian nih an cungah leiba a ngeimi bantukin aa ruah. (Phungthlukbia 19:17) Cucaah Pathian nih a cham ṭhan lai tiah Baibal nih a kan cawnpiak.​—Luka 14:12-​14.

Peknak nih zeitik ah dah Pathian lung a lawmhter lo?

Mah ca ṭhatnak in siannak langhter tikah. Tahchunhnak ah:

  • Midang lungthin lak awkah.​—Matthai 6:2.

  • Pakhatkhat hmuh ṭhan awkah.​—Luka 14:12-14.

  • Khamhnak cawk awkah.​—Salm 49:6, 7.

Mah nih Pathian duh lomi tuahsernak asiloah lungput hna a hlorh tikah. Tahchunhnak ah, mi pakhat kha phe kahnak caah, ritnak sii asiloah zu ningcang loin hmannak caah tangka pek cu a palh lai. (1 Korin 6:​9, 10; 2 Korin 7:1) Cun rian ṭuan a huam lo caah amah tein aa cawm kho lomi bawmh zong aa tlak lomi a si.​—2 Thesalon 3:​10.

Mah innchungkhar kha zei rel loin midang tu tampi pek tikah. Chungkharlu nih a innchungkhar herhbaumi kha a zohkhenh awk a si tiah Baibal nih a kan cawnpiak. (1 Timote 5:8) Chungkharlu nih a innchungkhar hnorsuang tiangin midang kha tam tuk a pek hna ahcun a palh lai. Cu bantukin an ngeihmi thilri kha “Pathian ta a si” tiin kum upa a simi an nu le an pa zohkhenh a duh lomi hna kha Jesuh nih a mawtchiat hna.​—Marka 7:​9-​13.