A ummi cazin ah kal

MINO PAWL BIAHALNAK

Lam Kan I Ṭhen Awk A Si Maw? (Ṭhen 2)

Lam Kan I Ṭhen Awk A Si Maw? (Ṭhen 2)

A hmasa bik ah lam i ṭhennak kong i ruah awkah aa tlakmi hmun kha thim. Zeitindah na tuah khawh?

Midang nih zeitindah ka pehtlaih hna seh ti na duh kha ruat. (Matthai 7:​12) Midang hmaiah mah kong kha chim hna sehlaw na duh lai maw? Na duh lai lo.

A si khawh ahcun phone chawnh, ca kuat asiloah e-mail ti bantukin lam i ṭhennak kong kha chim lo ah a ṭha. Cu bantuk a biapimi kong i ruah khawh awkah a caan le a hmun kha thim.

Nan i ton tikah zeibantuk bia dah na chim awk a si? Lamkaltu Paul nih Khrihfa hna cu pakhat le pakhat ‘biatak i chimh’ dingin a forh hna.​—Efesa 4:​25.

Cucaah hlangfang tein le fimkhur tein chim cu a ṭha bikmi a si. Lam i ṭhen ding a si tiah na ruahnak a ruang kha fiang tein chim.

A palhnak kong tampi chim asiloah na duhlonak a ruang dihlak chim ti bantuk a hau lo. “Cutin Na tuah lo” asiloah “mah kha zeitikhmanh ah Na tuah bal lo” tiah chim canah “. . . lawng Ka duh” asiloah “. . . caah lam kan i ṭhen awk a si tiah Ka ruah” tiin na intuarnak kong kha chim.

Atu caan cu a biachim ruangah lung i thlen ṭhan ding caan a si lo. A biapimi a kong ruangah lam i ṭhen dingin naa thimmi a si ti kha philhhlah. Cucaah na hawikom nih na lung aa thlen nakhnga fimkhur tein aan leem tikah i ralring. Lori timi nu nih hitin a ti: “Lam kan i ṭhen hnuah ka tlangval ṭhing cu a lung a dong pengmi a lo. Ka zaangfah seh ti a duh caah cutin a tuahmi a si men lai. Ka lung cu a ṭha lo. Asinain cutin a tuah ruangah ka biakhiahnak kha thlen ka duh lo.” Lori bantukin na duhnak kha hngal law na biakhiahnak ningin tuah. A si lo na ti ahcun a si lo ti ko.​—Jeim 5:​12.