A ummi cazin ah kal

MINO PAWL BIAHALNAK

Lam Kan I Ṭhen Awk A Si Maw? (Ṭhen 1)

Lam Kan I Ṭhen Awk A Si Maw? (Ṭhen 1)

A caancaan ahcun lam i ṭhen hi a ṭhatnak a um. Jill hmuhtonnak kong hi ruathmanh. “Ka tlangvalpa cu khoika ah dah ka um, zeidah ka tuah ti le aho he dah kan umṭi ti bantuk kong ah a lungre a thei peng. A hmasa ahcun mah kha ka duh tuk. Asinain amah he dah ti lo cu aho he hmanh caan hmanṭi a ngah lo ti bantuk phun a hung si. Ka chungkhar pawl, a hleiin ka pa he caan kan hmanṭi tik hmanhah a nah a chuak. Ka tlangvalpa he lam kan i ṭhen tikah ka phorhmi thilrit nganpi ṭhumh bantukin ka khing a zaang tiah ka ruah.”

Sarah zong mah bantuk thil sining a rak tong ve. A hawipa John cu biaeng chim a hmangmi, ruru hranghrang in khua a sami le a puarhrang tukmi a si ti kha a hun hngalh. Sarah nih hitin a ti: “Voikhat cu kan i tong lai tiah kan timi caan nakin suimilam pathum a tlai hnuah a rak phan. Ka nu nih innka a awnpiak tikah ka nu kha zeihmanh ah a rel lo. Cun ‘kal u sih, kan tlai cang’ tiah a ti. ‘Ka tlai’ tiah ti loin ‘Kan tlai’ tiah a ti. Zeicah a tlai timi kong kha chim in ngaihthiamnak a hal awk a si. A tlawm bik ah ka nu tal cu a upat awk a si.”

Lungtlin lonak tlawmpal a umnak men in lam i ṭhen ding a si tinak cu a si lo. (Salm 130:3) Asinain John i a puarhrannak cu voikhat lawng si loin a tuah tawn lengmangmi a si ti kha Sarah nih a hngalh tikah lam i ṭhen dingin bia a khiah.

Jill le Sarah bantukin atu i na tlangvalpa cu na innchunghawi dingah aa tlak lo tiah na ruah ahcun zeidah na tuah lai? Cu bantuk thil sining ah na intuarnak kha zeirel loin um hlah. Mah cu cohlan awkah a har ko lai nain lam i ṭhen cu a ṭha bikmi a si. Phungthlukbia 22:3 nih hitin a ti: “Mifim nih cun harnak a rat kha a hmuh tikah hrial khawhnak aa zuam.”

Lam i ṭhen cu a fawi lo ti cu a hmaan ko. Asinain nupi va ngeih cu zungzal ca a si. Innchunghawi i thim sual ruangah zungzal in harnak ton nakin chikkhat lungfahnak tuar cu a ṭha deuh.