¿BARAA CHI JOMA WAUƊA BAƊA?
Chi ikia bõbõoɗe
CHI bõbõo ikia suredu nii, jora ɓiɗĩika kiɗii maebʉrã bania ɓiɗĩika kiɗii ɓaeruubʉrã ikia bõbõoɗe, ichia poyaa ũuɓariibai. Maka ɓumina, ichi põesãa mauɗe jayoaswẽe kuɓuu. ¿Kãare asei ɓua naka ɓoi baita?
Chi ikia bõbõoɗe choɓea ɓiɗiĩka ãrĩã keɗee jʉ̃kaa koɓee
Nauɗe kʉ̃risiaba: Chi nuree ẽbẽrarã ãrĩã kuitaa nureerã Universidad estatal Ohioɗebenaba kawasiɗau chi ikia bõbõoɗe morfo azul abadau (Morpho didius), ichi kara cheke ɓiɗĩikaburu nia, ɓeda kara cheke kĩraka kuɓuu. Chi ikia bõbõoɗe choɓea ɓiɗiĩka ãrĩã keɗee jʉ̃kaa koɓee, mauba jora ɓaebiiruu mauɗe bania ɓaebiiruu siɗa ɓekeawẽebayu. Chi nuree ẽbẽra ãrĩã kuitaa nureerã, ingenieros abadaurã, ãchia wauɗa kʉ̃ria duanuu chi materialna bõbõo ikia kĩra, chi jora ɓaebipeɗa mauɗe baniamaa ɓekeabiɗaamaaba, jãu hospitalna baita mauɗe empresa baita biɗa.
Ẽbẽrarã kuitaa ãrĩã nureeba kawabadau ãnimaraɗebena mauɗe kiɗuarãɗebena siɗa, wauɗa kʉ̃ria nuree ara jãu kĩra ɓeebiɗayua. Chi ẽbẽra ãrĩã kuitaa nii, Bharat Bhushan abadauba naka jara ɓuu: “Jomaurã ãnimara ɓiɗĩika nii maebʉrã mechia nii siɗa, mauɗe jomaurã kiɗuarã, joma biʼia waupeɗaaɗa. Maarã kĩrawãrea ãrĩã ɓee, mauɗeeba jomaurã ẽbẽraba wauɗa kʉ̃ria duanuu ara jãu kĩra ɓeebiɗayua”.
¿Bichia kãare jarai ɓua? ¿Nibaaka chi jãu bõbõo ikia wauɗa baɗa, maebʉrã ara ichidu aɓa neesaaka?
