ORIENTACIÓN DEƊABENA BAITA | CHI KŨUDRÃARÃ AWẼRARÃ BAARA
Bichi iadaabudauɗe, ¿kãare asei ɓua?
SAKAYUA CHAAREA ƁUA
“Bichia miadaa aseburuuɗe junebenaba iadaayua. Junebenarãba dachi iadaabudauɗe, dachi akawa bustaɗakau” (Amanda, 17 año nii). a
Chi ũrikau nii iadaabudauɗe jãu jari avión manejabarii kĩraka ɓua, ichia ũrikau jarabudau kachirua pasai ɓuuɗebena. Ũriwẽebʉrã, chi kachirua ɓuu pasai jarabudauɗe drʉɗe wãyua.
Bichi akõrerãba, profesorna, maebʉrã dawaraurãba bichi iadaaburuuɗe, ¿bichi kĩru kuɓuẽ maebʉrã jãu beɗea ũri kʉ̃riawẽka? Maka ɓuubʉrã, cha nau kartaba bichi ãrĩã aiɗaburuu.
NAU KAWABA
Dachi jomaurãba nesita panuu kachirua asebudauɗe junebenaba jãkawãema aɗayu.
“Joma dachiba ãrea biʼiwãe waubadau” (Santiago 3:2).
“Junebenaba bichi iadaa ɓuuɗe biʼiwẽe wau ɓoosiiɗeeba, kĩrakayarã́ba” (Jessica).
Mʉ baleswẽa nii kʉ̃risiarã́ba junebenaba bichi iadaabudauɗe.
“Jeowaba b iadaatabarii ichia kʉ̃ria unii, ara jari akõre niiba ichi warr iadaabarii kĩra ichia kʉ̃ria uniiɗeeba” (Proverbios 3:12).
“Ẽbẽra aɓa niiba mʉ iadaaburuuɗe, mʉa kʉ̃risiabarii ichia kʉ̃riaɗeeba jãka jara ɓuu mauɗe ichi baita chaarea ãrĩã ɓuu mʉ iadaai baita” (Tamara).
Dachi iadaabudauba ẽbẽra bia nibabiyua.
“Iadaabudauɗe kauwa ũríbaɗa mauɗe ẽbẽra kuitaa ɓuu nibaɗe wãyua” (Proverbios 8:33).
“Kʉ̃risia biʼia nibaɗe wãi baita, iadaaɗai nesita nia. Iadaabudauɗe kʉ̃risiayua junebenaba kãare kʉ̃risiabadau bichiɗebena. Dachi iadaaruuba kʉ̃risiabibarii kachirua kawawẽa ase nibaɗaɗebena, jãuba aiɗayua cambiai baita” (Diana).
NAKA ASEI ƁUA
Biʼia kʉ̃risiaba. ¿Kãare aseiba bichi kĩru koɓeeburuuɗe chi niiba iadaa ɓuuɗeeba? Bikãa kʉ̃risiaba, isa kĩruwẽebayua, kʉ̃risiaba bichia ẽbẽra iadaamaa ɓuu kachirua asesiiɗeeba, ara jari bichia ara aɓau kachirua aseɗa baɗa kĩra. Mauɗe jari bichi ãba kaaɗe nii iadaabarii kĩra. Bichia nauɗe kʉ̃risiaruubʉrã, kawayua junebenaba bichi kãarea iadaasii (Texto Bibliaɗebena: Eclesiastés 7:9).
“Dachi iadaabudauɗe ɓesɗe kĩruɗapeɗa kʉ̃risiabadau dachi nomaabiɗayuaburu jarabudau, mau makawãema, ãchia dachi ẽbẽra bia nibabiɗayuaburu jarabadaa” (Teresa).
Kʉ̃risiaba waabenarã bichi aude nuree. Bichi iadaabudauɗe ũri nibayua, juakaya nibawẽa, nomaarã́ba chi kachirua ase nibaɗa ida ɓui ɓuuɗeeba. Bichi juakayawãe niibʉrã, kĩruwẽebapeɗa nomaawẽebayua. Bichi nomaa koɓeeruubʉrã iadaabudauɗe, bichi jãka iadaayu nesita ɓuuɗeeburua. Bichi biʼia kʉ̃risia kʉ̃ria niibʉrã ida iadaabiyua (Texto Bibliaɗebena: Proverbios 16:18).
Bichi nomaa koɓeeruubʉrã iadaabudauɗe, bichi jãka iadaayu nesita ɓuuɗeeburua
“Kʉ̃risia biʼia nibaɗe wãi baita, iadaaɗai nesita nia. Kauwa ũríbaɗa, maka asewẽe niibʉrã, ãrĩã́turu sufriyua” (Lena).
Ara kiruma jarayua. Ɓesɗe poyaa ũriibai ɓoobaria dachi iadaaruuɗe, biʼia ãrĩã ɓua ara kiruma a nibayu dachimaa jaraaruuɗe. Jãuba kʉ̃ria ɓuu bichi baita biʼia ɓuudu, kĩrajʉʉ nibabii baita (Texto Bibliaɗebena: Salmo 141:5).
“Bichia consejo nesita ɓuubʉrã, ara kiruma aima. Consejo nesitawẽebʉrã, ara kiruma ai ɓua. Naka jara ɓuubʉrã, unubiyua bichi ẽbẽra bia nii junebenaba iadaa ɓuuɗe” (Carla).
