Skip to content

Skip to table of contents

¿Kaiba chi Rei Dachi Akõre Kobiernoɗebena?

¿Kaiba chi Rei Dachi Akõre Kobiernoɗebena?

Dachi Akõreba Bibliaɗebena ɓʉduanuurãmaa ɓʉbikuasia saka kuitaaɗai kai bai chi Rei Dachi Akõre Kobiernoɗebena. Ichiɗebena naka jarasiɗaa:

  • Dachi Akõreba jʉrʉ adaui. “Mʉaburu chi rei kuɓusia [...;] puuru choromarã deaburua mortorioka mauɗe iujãarã kaitawẽ ãrea ɓee bichiɗi bayua” (Salmo 2:6, 8).

  • Chi kobierno rei Daviɗe ichiaburu adauyua. “Wawacheke nasesia, warr deasiɗaa [...]. Ichi kobierno wariyua mauɗe ichi pas akabaabayua chi kobierno Daviɗeɗe mauɗe ichi kobiernoɗe biɗa, jãadua kuɓui baita” (Isaías 9:6, 7).

  • Belenɗe naseyua. “Bichiɗebena, Belen [...], bichiɗebena mʉ baita neeyua kobernante baita [...,] drua kaitawẽ ãrea deeɗe kawaɗayua ichidu mechia ãrea kiɗii” (Miqueas 5:2, 4).

  • Ichiɗe ijãaɗaabapeɗa beaɗayua. “Ichi atua jarasiɗau, mauɗe dachia ichi baleswẽnii kĩra jarasiɗaa [...], ichi susiɗau dachi pekao kakua; jeeɗa bariɓusiɗau dachi kachirua asepanuu kakua” (Isaías 53:3, 5).

  • Piradrupeɗa aribia nibabiyua. “Bichia mʉ Ʉaɓuumare ɓuwẽa. Bichia chi bichi baita jipa trajanibabariimaa chi ʉanuɓuu ida unubiibayua [...]; bichi jua biare kĩrajʉʉ unuɓooyua” (Salmo 16:10, 11).

Jesucristodu chi Rei ariɗeɓua

Aɓa ara jãka nii Jesucristoturua. Anjel aɓaniiba ichi dana, Mariamaa jaraɗaa: “Dachi Akõreba ichi kobierno deaburua ichi akõre Daviɗe [...]. Ichi Kobiernora akabaabayua” (Lucas 1:31-33).

Jesus iujãaɗe nibasiimisa kobernaabasia. Maamina, ẽbẽrarã iujãaɗe kobernaburua ʉtʉ bajãareba Rei chi Kobierno Dachi Akõreɗebena kĩra. ¿Sakayua ichi chi Rei ariɗeɓua? Ochiaɗai kãare asesaa chi iujãaɗe nibasiiɗe.

  • Jesusba ẽbẽrarã ochiakuakeraaɗaa. Mukĩrarã wẽrarã baare aiɗapeɗa, mauɗe kũudrãarã chõrarã baare. Ichia ochiaabasia sãmabena neebudau mauɗe pobrekiruree maebʉrã chi nejarra baraanureerã (Mateo 9:36; Marcos 10:16). Ẽbẽra lepra abadauba ẽpermo ɓoosiiba Jesusmaa jarasiiɗe: “Mʉa kuitaaɓuu bichia kʉ̃riaɓuubʉrã mʉ nau anibii ɓuu”, Jesusba mia chuburi unupeɗa mambea anibisia (Marcos 1:40-42).

  • Jesusba jaradeɗekasia dachirãmaa saka Dachi Akõre kĩrajʉʉbiɗai. Ichia jarasia: “Machi poyaa Dachi Akõre baita trajaɗapeɗa ara mau dauchia chi Nejarra unui baita ãrea trajaɗaabayua”. Mauɗe nau siɗa jarasia, waabenarã biʼia trataɗai ara jãka dachi siɗa trataɗai kʉ̃riapanuu kĩra. Mauɗe, dachirãmaa jaradeɗekasii Dachi Akõremaa dachia asebudaudu ochiawẽa, bari dachia kʉ̃risiapanuu mauɗe dachi korasonɗe irapanuu siɗa ochiaɓua. Mauɗeeba, Dachi Akõre kĩrajʉʉbiyua, dachi korasonɗe chi kosa biadu baraapanai mauɗe chi kachiruara irapanaabayua (Mateo 5:28; 6:24; 7:12). Jesusba jarasia, dachi ariɗe kĩrajʉʉ nibayua, Dachi Akõreba jaraɓuu kawaɗapeɗa aseɗai (Lucas 11:28).

  • Jesusba dachimaa jaradeɗekasia saka kʉ̃riaɗai. Ichia asepeɗa jaraɓuu ẽbẽrarã korasonɗe ɓaesia. Bibliaba jaraɓuu: “Ẽbẽrarã aribia kuɓuu kawa kʉ̃risiaduaneesii ichia jarasiiba autorida baraanii kĩra jaradeɗekasiiɗeeba” (Mateo 7:28, 29). Nau siɗa asebiasia: “Kʉ̃riaabaɗa machi kĩramaanureerã”. Ara ichia naka ʉtaa wiɗisia ichi beabudaurã kakua: “Dada, perdonakuas, ãchia adua kãare asemaaduanuu” (Mateo 5:44; Lucas 23:34).

Jesusdu chi kobernante ariɗenii. Ichidu ariɗe kuitaaɓuu, dachi kʉ̃riapeɗa mauɗe aiɗakʉ̃riaɓua. Maamina ¿sakaeɗe kobernakoɓeiba?