Pablo ɓes õbea jaradeɗekaɗe wã ɓoosiiɗe Jerusalenɗaa neeɗa baɗa. Jãdu basii chi puuru kaaɗebena Pabloba jaradeaɗa baɗa mauɗe jãmaburu ichi jidaupeɗaaɗa basia. Ẽsabuɗe, ichi carcelɗe ɓoosiiɗe, Jesusba ichi daumaa unubipeɗa naka jaraɗa baɗa: “Bichi Romaɗaa wãyua, ara jãu puuruɗe jaradea nibayua”. Maabae Pablo odoepeɗaaɗa basii Jerusalenɗebena Cesareaɗaa. Aria carcelɗe año ome ɓoosii. Día aɓa ɓuuɗe, gobernador Festo daaɗe nibasiiɗe, Pabloba naka wiɗiɗa baɗa: “Mʉa kʉ̃ria ɓuu gobernador choroma Romaɗebenamaaburu wãyua, ichia ochiayua mʉ ase niiɗebena”. Festoba naka panauɗa baɗa: “Kʉ̃ria ɓuubʉrã chi gobernador choroma niiba bichi kachirua ase ɓuuɗebena ochiayua, makarã mʉa bʉiyua gobernador choroma niimaaburu”. Maabae Pablo odoesiɗau barco Romaɗaa wãburuuɗe. Ãba ome niɗauba ichi kõpaesiɗau: Lucas Aristarco omeeba.

Chi barcoɗe wãbudauɗe, kue ãrĩã chepeɗa pũa kuɓuu tãeɗe eɗa paneesiɗau. Maka día ãrĩã panasii. Jomaurãba kʉ̃risiasiɗau ãchi biuɗayudu. Maka ɓumina Pabloba naka jarasia: “Ũríbaɗa, komakaraaɗe angelba mʉʉmaa jarasii: ‘Perarã́baɗa, asia. Romaɗaa neeyua, mauɗe joma chi barcoɗe duanuurã biuɗawẽe bayuaʼ. Mauɗéburu ¡chaarea duanaɗayua! Dachi biuɗawẽma”.

Maaɗakare chi maka kuechepeɗa pũa kuɓuu tãeɗe 14 día panaɗakare, chi isla Malta abadauɗaa neesiɗau. Chi barco apii noɓeeɗa baɗa mauɗe kõa diɗiɗa baɗa, mauɗe chi 276 ẽbẽrarã mar iikaaɗaa biuɗawẽa neepeɗaaɗa basia. Chi nuree ũu neesiɗau mauɗe junebenarã chi barco kõa wãɗa baɗamaa jidau duanuu ũu neepeɗaaɗa basia. Ẽbẽrarã Maltaɗebenarãba aoko nuɓupeɗaaɗa ãchi wãsiabiɗayua.

Tres mes baɗakare, soldaorãba Pablo Romaɗaa barcoɗe odoepeɗaaɗa baɗa. Ãbarãba ichi irsibiɗe wãpeɗaaɗa ichi neesiiɗe, Pabloba ãchi needuu unusiiɗe Dachi Akõremaa bichidu kiɗibai apeɗa mauɗe kĩrajʉʉ ãrĩã ɓeeɗa baɗa. Pablo carcelɗe eɗa jʉ̃aɗai baɗamina, de paa uru panuumaaburu ɓupeɗaaɗa baɗa mauɗe jãu soldaoba ochia uru ɓooɗa basia. Aria año ome ɓoosii. Ẽbẽrarãba ichi ochiaɗe neebachiɗau, maabae ichia ãchimaa jaradeɗeka nibaɗa Dachi Akõre Gobierno ʉ̃rʉbena mauɗe Jesús ʉ̃rʉbena kawabiabachii. Pabloba karta congregación Asia Menorɗebena mauɗe Judeaɗebena baita ɓʉkuaɗa baɗa. Jeowaba Pablodu jʉrʉ adauɗa baɗa Dachi Akõre beɗea bia ɓeeɗebena puuru mechia ɓeerã jaradeɗekaɗe wãyua.