Juan isla Patmosɗe jʉ̃a ɓoosiiɗe, Jesusba ichi daumaa 16 unubiɗa baɗa kãare pasaburuu ʉ̃rʉbena. Juanba unuɗa baɗa, saka Jeowa trʉ̃ jomaurãba respeta paneeɗaiɗebena, saka ichi Gobierno neeruuɗebena mauɗe saka ichia asebi kʉ̃ria ɓuu nama iujãaɗe asebiiruu, ara jari bajãaɗe asebarii kĩraka.

Jesusba Juan daumaa unubiɗa baɗa, Jeowa akʉ ɓuu ichi ãkau mechia ɓuuɗe. Mauɗe ichi aɗu 24 chõrarã akʉ duanuu. Ãchia paru torroa jʉ̃ɗapeɗa mauɗe boromaa corona neeba wau ɓee jʉ̃ duanuu. Chi ãkau Jeowaɗebenaɗe unubi kuɓuu bã tõoruuɗebena kĩra, mechibena uriɗa baɗa bã tõburuuɗebena kĩra. Chi 24 chõrarã Jeowa kĩraiɗe õdarrɗe kopaneeɗapeɗa wiɗi bara ɓuu. Juan daumaa maucha unubiɗa baɗa, ẽbẽra kabanaa, joma puuru nau iujãaɗebenarã, joma chi beɗea diwara beɗea nureaɗapeɗa Jeowa kʉ̃ria nureerã. Chi Oeja Kaebea nii Jesusbʉ, ichiaburu ochia ua nibapeɗa mauɗe ẽbẽrarã bania chokaebibarii ɓuuɗaa uaɗo ɓua. Maabae, Juan daumaa maucha unubiɗa baɗa, Jesusba goberna koɓeeburuu ʉtʉ bajãaɗe 24 chõrarã baara. Maabae Juan daumaa unubisii, Jesús  chĩoburuu Dragón ome, mau Satanasbʉ, mauɗe ichi demoniorã baara. Jesusba ʉtʉ bajãaɗebena jʉrekuapeɗa maabae iujãaɗaa jirakuaburua.

Maabae, Juanba mipitaa ãrĩã unu ɓuu chi Oeja Kaebea nii 144.000 akʉ noɓee mode Sionɗe. Maabae unu ɓua ángel ũuɓari wã ɓuu joma nau iujãaɗe naka jarayua: “Dachi Akõre respetapeɗa ichiɗebena biʼia beɗeábaɗa”.

Juan daumaa maucha unubisii, Armagedón chĩobudau. Jesús ichi baara nureerãba kanasiɗau Satanás ichi baara nureerã ome chĩobudauɗe. Chi Juan daumaa kaaɗe unubisiiɗe, Juanba unu ɓuu ʉtʉ bajãaɗe mauɗe iujãaɗe biɗa, joma ãbua chĩoɗawẽa duanuu. Mauɗe Juanba unusii Satanás ichi warrarã baara, jaraibʉrã, ichi kaaɗe duanuurã, joma kenakuabudau. Ʉtʉ bajãaɗe mauɗe iujãaɗe biɗa, jomaurãba chi Jeowa trʉ̃ respeta nureapeɗa mauɗe ichidu kʉ̃riaɗapeɗa ũri nuree.