Jesusba apostolerãmaa jaraɗa baɗa Dachi Akõre beɗea bia ʉ̃rʉbena joma nau iujãaɗe jaradeɗekaɗe wã́baɗe aɗa baɗa, ãchirãba mau ũripeɗaaɗa baɗa. Año 47ɗe, chi ãbarã Antioquiaɗebenarãba Pablo Bernabé baara jaradeɗekaɗe bʉisiɗau. Omeeba kĩrajʉʉ ãrĩã jaradeɗeka nibasiɗaa, Asia Menorɗaa, Derbeɗaa, Listraɗaa mauɗe Iconioɗaa wãpeɗaaɗa baɗa.

Pablo Bernabé omeeba barikiau ẽbẽra nureerãmaa jaradeɗeka nibasiɗaa: chi nejarra baraurãmaa, poore kirureerãmaa, kũudrãarãmaa mauɗe dawaraurãmaa biɗa. Ãrĩãrãba Jesús ʉ̃rʉbena ariɗe jaradearuu ũriɗapeɗa ijãa kopaneesiɗaa. Pablo Bernabé omeeba jaradeasiɗau gobernador Chipreɗebenamaa, chi trʉ̃ Sergio Paulo basia, maka ɓumina jaibana niiba ida jarabi kʉ̃riawẽe baɗa. Pabloba jaibana niimaa naka aɗa baɗa: “Jeowaba bichi iadaa inia”. Ara mauɗe chi jaibana dau pãriu nibaɗe wãɗaa. Chi gobernador Sergio Paulo mau unusiiba, Jesusɗe ijãa koɓeesia.

Pablo Bernabé omeeba jaradeɗekaɗe wãbachiɗaa barikiaumaa: decha, ẽbẽrarã mercabadaumare, oɗe mauɗe judiorã araa ãbua chibʉrʉbachiɗaumaa. Ɓes aɓa, puuru Listra abadauɗe ẽbẽra biʼia tʉaka ɓuu nibaɗa curasiɗau. Chi ẽbẽrarãba mau unusiɗauba ãchirã dios kʉ̃risiapeɗaaɗa baɗa maabae ãchi õdarrare kopaneeɗapeɗa ãchimaa wiɗi kʉ̃riasiɗaa. Pablo Bernabé omeeba idaarabiɗaabasia, bari nakaburu jarapeɗaaɗa: “¡Diosdu kʉ̃riaɗapeɗa ichidu ũri nureaɗayua! Dairã bari ẽbẽrarãbʉ”. Chi nuree judiorã imisiɗau chi ẽbẽrarã Pablo ome kĩrubiɗai baita. Ẽbẽrarãba ichi mokara ɓatakuaɗapeɗa maabae ichi puuru awara erta odoesiɗau ichi biusii aɗapeɗa. ¡Maka ɓumina Pablo abiɗa chokae nibasia! Ara mauɗe, ãbarã ichi karebaɗe neepeɗaaɗa baɗa maabae ichi waya puuruɗaa odoepeɗaaɗa basia. Mau kaaɗe, Pablo waya Antioquiaɗaa wãɗa baɗa.

 Año 49ɗe, Pablo waya jaradeɗekaɗe wãɗa baɗa. Ãbarã Asia Menorɗebenarã ochiaɗe wãɗa baɗa, maabae waa Europaɗaa, Dachi Akõre beɗea biaɗebena jaradeɗekaɗe wã ɓoosia. Atenasɗaa, Efesoɗaa, Filiposɗaa, Tesalonicaɗaa mauɗe junebena puuruɗaa biɗa wãɗa baɗa. Ichi, Silas, Lucas mauɗe kũudrãa Timoteo abadau baara wãɗa basia. Ãchi ãbua traja nureasii congregación chi wiɗi waukai baita mauɗe ãchi karr chaarea nureabiayua. Pablo Corintoɗaa biɗa wãɗa baɗa maabae aria ɓee ɓoosii año y medioɗe, ãbarã chaareabiayua. Ẽbẽrarã ome beɗeapeɗa, ãchimaa kawabiapeɗa mauɗe karta siɗa ɓʉkuabachii congregacionɗaa bʉepeɗa chaareabiayua. Ichi traja nibasii de paruba waukaburuu. Maaɗakare, Pablo waya Antioquiaɗaa wãɗa basia.

Año 52ɗe, Pablo maucha õbea ɓes Asia Menorɗe erdauɗa basia. Norteɗaa wãɗa baɗa waa Filiposɗaa, maabae Corintoɗaa neeɗa basia. Pablo Efesoɗe año ãrĩã ɓooɗa basia, aria ẽbẽrarãmaa kawabiapeɗa, milagro asekuapeɗa mauɗe congregación siɗa aiɗa ɓoosia. Noremaacha escuela kuɓuuɗe jaradea nibaɗa ẽbẽrarã kĩrapeta. Ẽbẽra aribiaurãba ichi ũriɗapeɗa maabea ãchi kachirua nureapeɗaaɗa baɗa ɓuiɗapeɗa biʼia nibaɗe wãsiɗaa. Chi ɓee drua ãrĩã ɓeeɗaa jaradeaɗe wãbachii Dachi Akõre beɗea bia ɓeeɗebena, mau maaɗakare, Pablo waya Jerusalenɗaa wã ɓoosia.