10 día pasaɗa baɗa Jesús bajãaɗaa wãɗakare. Mauɗeeba chi Jesús discipulorãba Dachi Akõre Jauri adaupeɗaaɗa baɗa. Ẽbẽra junebena puuruɗebenarã Jerusalenɗaa wãpeɗaaɗa chi fiesta Pentecostés año 33ɗe aseɗayua. Discipulorã 120 chibʉrʉsiɗau ʉtʉ chi de ʉ̃rʉ kuɓuuɗe, kawawẽeɗe chi discipulorã aɓaaɓaabenarã ʉ̃rʉ aoko kuɓuu kĩraka unusiɗau, maabae jomaurã junebena beɗeaɗeburu beɗea bara ɓeesiɗau. Mauɗe, mechia pũa koɓeeruu ũrisiɗau deɗe eɗa.

Chi ẽbẽra junebena puuruɗebena wãpeɗaaɗaba ãrĩã ororoa koɓeeruu ũrisiɗau maabae jãu deeɗaa wãsiɗau kãare pasamaa ɓuu kawaɗayua. Mauɗe kawayuswãe kopaneesiɗau chi discipulorã junebena beɗeaɗeburu beɗea bara ɓeebudau. Ãchirãba jarapeɗaaɗa: “Cha naarã ẽbẽrarã Galileaɗebenamina, ¿saka dachi beɗeaɗeburu beɗea nurea?”.

Pedro mauɗe waabenarã apostolerã siɗa aka noɓeesiɗau jomaurã kĩraiɗe. Mauɗe Pedroba naka jarasia: “Machirãba Jesús beapeɗaaɗa basia, maka ɓumina Jeowaba piradrubiɗa basii. Jãabaera Jesús  bajãaɗe ɓeesii Dachi Akõre juabiare. Daimaa ichi Jauri deasii. Mauɗéburu machia naka unuɗapeɗa ũripeɗaaɗa”.

Chi ẽbẽrarã kawaɗayuswãe bara ɓeesia. Chi Pedroba jaraɗa ãchi sõɗaa neeɗa basia, mauɗéburu wiɗisiɗaa: “¿Kãare aseɗayua?, apeɗaaɗa”. Ichia naka jarasia: “Machia kachirua ɓee ase duanabarii baɗa ida ɓúbaɗa maabae Jesús trʉ̃ɗe bautizábaɗa. Maaɗakare biɗa chi Dachi Akõre Jauri maucha adauɗai”. Jãu diaɗe, 3.000 ẽbẽrarã bautizapeɗaaɗa baɗa. Jãkaeɗeeɗa, Jerusalenɗe discipulorã mauchaburu baraasii. Chi apostolerã congregación waaburu waukasiɗau mau chi Dachi Akõre Jauriɗeeba. Makaburu ãchia jaradea bara ɓeeɗa basii chi Jesusba ãchimaa jaradeaɗa baɗaɗebena.