Puuru Cesarea abadauɗe, soldao ua koɓoobarii Romaɗebena jãu mechia ãrĩã nii, chi trʉ̃ Cornelio abachiɗau. Ichi judiowãemina, judiorãba ichi ãrĩã respeta unibasiɗau. Ichi ẽbẽra bia nibasia jua keɗee sua nibapeɗa poore kirureerã ãrĩã aiɗakuabachia. Cornelioba Jeowaɗe ijãa nibapeɗa ichimaa ãrĩã ʉtaa wiɗibachia. Día aɓa ɓuuɗe, ángel ichimaa neepeɗa naka asia: “Dachi Akõreba ũriɗa baɗa ichimaa ʉtaa wiɗisia. Bichia mukĩrarã ua kuɓuu bʉekase puuru Jope abadauɗaa, aria Pedro kuɓua, ãchimaa jaraɗayua bichi ochiaɗe neebiɗai baita”. Cornelioba mukĩra õbea niɗau bʉikaɗa baɗa Jopeɗaa, jãu puuru 50 kilómetro ɓee ɓoosia surɗaa.

Maumisa, puuru Jopeɗe, Dachi Akõreba Pedro daumaa unubiɗa baɗa. Ichia unusia ãnimara Judiorãba poyaa koɗaabai ɓuu, maabae angelba ichimaa kóbaɗe aɗa baɗa. Pedroba ko kʉ̃riabasia mauɗeeba naka asia: “Ãnimara Dachi Akõre daaɗe biʼiwãe ɓee mʉʉba kokau”. Maabae angelba naka asia: “Chi Dachi Akõreba biʼia ɓuɗa mau miadaa ɓuu a jararã́se”. Maabae Pedromaa naka asii: “Ẽbẽra õbea panuuba bichi jʉrʉ panuu. Jiradrupeɗa maarã baare wãse”. Pedro poroaɗaa wãpeɗa maabae wiɗisii chi mukĩrarãmaa sakãera neepeɗaaɗa baɗa a wiɗiɗa basma. Ãchia naka panausiɗaa: “Cornelioba dai nama bʉikasii, ichia soldaorã Romaɗebena ua koɓoobarii. Ichia kʉ̃ria ɓuu dai baare wãɗayua ichi deemaa mau Cesareaɗe  ɓee ɓuu”. Pedroba jaraɗa baɗa mukĩrarãmaa jãma kãi paneeɗayua jãu ẽsabuɗe. Mau norema, maarã baara wãɗa baɗa Cesareaɗaa. Chi nuree ãbarã Jopeɗebenarã siɗa ãchi baara wãpeɗaaɗa baɗa.

Cornelioba Pedro neeburuu unusiiɗe, õdarrɗe koɓeesia. Maka ɓumina Pedroba naka asii: “Ʉtaa piradruse. Mʉ siɗa mukĩra bichi kĩra nii. Dachi Akõreba jaraɗa baɗa mʉ bichi deemaa neeyua, dai judiowãe nuree deemaa wãɗakaumina. Jãabae, mʉʉmaa jaraba sakayua mʉ iuɗa baɗa”.

Cornelioba Pedromaa naka nebʉrʉɗa baɗa: “Mʉ kimare día basiiɗe, ʉtaa wiɗiɗa baɗa Dachi Akõremaa, angelba mʉʉmaa jaraɗa baɗa bichi iuyua. Muchuburia, daimaa jaradeaba joma Jeowaba jaraburuu”. Pedroba naka panauɗa baɗa: “Jãabaera kuitaaruuma Dachi Akõre daaɗe joma ara dauchia nureerã, ichia adaubaria barikia nuree ichi ũri kʉ̃ria nureerã”. Pedroba ãrĩã́turu ãchimaa kawabiaɗa baɗa Jesús ʉ̃rʉbena. Maabae Cornelio mauɗe jãma duanuurãmaa Dachi Akõreba ichi Jauri deɗekapeɗa maabae bautizakuasiɗau.