Jesusba ichi discipulorãmaa ichi unubiɗa baɗa, mau maaɗakare Pedro mar Galileaɗebenaɗaa ɓeda jidauɗe wãɗa baɗa. Tomás, Santiago, Juan mauɗe waabenarã discipulorã ichi ome wãpeɗaaɗa baɗa. Chi ẽsebuɗe joma ɓeda jidau nibasiɗaumina, akawa jidauɗawẽe basii.

Mau norema dapeɗeeɗa, mar iikaa mukĩra ɓari nuɓuu unusiɗau. Jãmareeba ichia naka jaraɗa baɗa: “¿Ɓeda jidausiɗaẽ?”. Ãchia naka asiɗaa: “Aɓa biɗa jidauɗawẽeɗe”. Chi mukĩraba naka asia: “Machi ãtarraya jãba jua biarebenaɗaa jiratábaɗa”. Ãtarraya jiratapeɗaaɗakare, ɓeda ãrĩã eɗa wãuripeɗa ʉtaa poyaa ertaɗaabasii. Ara mauɗe, Juanba kuitaasii jãu mukĩra Jesús nii, maabae naka asia: “¡Jari jãu Dachi Mechiubʉ!”. Pedro chi baniaɗe eɗa jĩdru wãsii maabae ũu wãsii chi iikaaɗaa. Chi waabenarã discipulorã jãbaɗeeba ichi kaaɗe wãsiɗau.

Mar iikaa neesiɗauɗe tʉbʉ aoko nuɓuu unusiɗau. Mau ʉ̃rʉ ɓeda duanasii mauɗe pan siɗa baraasia. Jesusba jaraɗa baɗa  ɓeda ʉapeɗaaɗa baɗa eneeyua mau siɗa baabii baita. Maabea ãchimaa naka asia: “Chiko koɗe nésturu”.

Chiko kopeɗaaɗakare, Jesusba Pedromaa naka asia: “¿Mʉ kʉ̃ria nika nau ɓeda aude?”. Pedroba panausia: “Maerã, mʉ Mechiau, bichia kuitaa ɓuu mʉa bichi kʉ̃ria inii”. Jesusba naka asia: “Makarã mʉ oeja cheke kobiaba”. Maabea Jesusba waya wiɗisia: “Pedro, ¿bichia mʉ kʉ̃ria nika?”. Pedroba naka panausia: “Mʉ Mechiau, bichia kuitaa ɓuu mʉa bichi kʉ̃ria unii”. Jesusba naka asia: “Mʉ oeja cheke ochia ua nibaba”. Jesusba wayaburu wiɗiɗa baɗa ara aɓa ɓuudu. Pedro nomaa koɓeepeɗa naka panausia: “Mʉ Mechiau, bichia joma kuitaa ɓuu. Bichia kuitaa ɓuu mʉa bichi kʉ̃ria inii”. Jesusba naka jaraɗa baɗa: “Mʉ oeja cheke chiko kobiaba”. Maabae naka jarasia: “Bichi mʉ baara apii nibaba”.