Jesús ichi discipulorã ome Galileaɗe chibʉrʉɗa baɗa. Ãchimaa naka jaraɗa baɗa: “Jaradeaɗe wã́sturu mʉ kaaɗe duanabii baita, ãchimaa jaradeábaɗa biʼia aseɗayu mʉa jaraɗa baɗa kĩraka mauɗe bautizakuásturu”. Maabae naka jarasia: “Olvidarã́baɗa, mʉ machi baare nibayua”.

Jesús ʉtaa piradruɗakare, ichia discipulorã ãrĩãrãmaa ichi unubisia 40 diaɗe Galileaɗe mauɗe Jerusalenɗe biɗa. Biʼia ãrĩã ɓuuɗebena kawabiapeɗa maabea milagro ãrĩã asekuaɗa baɗa. Mau ʉtʉ bajãaɗaa wãi naeɗe, ichi apostolerã ome mode Olivos abadauɗe chibʉrʉɗa baɗa. Jesusba naka jaraɗa basia: “Jerusalenɗebena wãrã́baɗe. Bari esperábaɗa chi Akõreba deai aɗa baɗa”.

Ichi apostolerãba kawaɗawẽe basii chi Jesusba jaraɗa baɗa mauɗeeba ara nakʉɗe wiɗisiɗau: “¿Bichi rey Israelɗebena bayuẽ?”. Jesusba naka panausia: “Jeowaba wabiɗa mʉ rey babi kʉ̃riawẽe. Maka ɓumina ɗaarãawẽeɗe ichia machimaa chi Jauri deɗekaburua ara mauɗeeba poder uru panaɗayua mʉ ʉ̃rʉbena jaradeɗekaɗai. Mauɗeeba jaradeɗekaɗe wã́baɗa Jerusalenɗaa, Judeaɗaa, Samariaɗaa mauɗe drua kaitawẽe koɓeeɗe biɗa nau iujãaɗe”.

Mau kaaɗe, Jesús ʉtʉ bajãaɗaa wãpeɗa mau jʉ̃rʉaraba tapa koɓoosii. Ichi discipulorãba bari ʉtaa wãaruu ochia paneesiɗau maabae ichi unuɗawẽa diɗisii.

Chi discipulorã mode Olivosɗebena wãɗapeɗa maabae Jerusalenɗebena neesiɗau. Jãma chibʉrʉɗapeɗa ʉtaa wiɗibachiɗau de ʉtʉbenaɗe. Ãchia esperamaa panasii Jesusba ãchimaa mauchaburu kawabiayua.