Jesús biuɗakare, mukĩra chi nejarra bara nii José abadauba Pilatomaa jaraɗa baɗa chi Jesús eɗaa bakuruɗebena ertaɗai baita. Joseba chi Jesús kakua paruba biʼia bʉrapeɗa, maabae kera piumaa ãrĩã ɓuuba puruɗa baɗa, mo choɓeaɗe koropeɗaaɗaɗe eɗa nuɓusii. Mau choɓea koropeɗaaɗaɗe chi biuɗa aɓa wabiɗa jau ɓuɗakau basii. Maabae ichia bʉisii ẽbẽrarã mokara choromaba choɓea nuɓuu tapa kuɓuɗayua. Chi sacerdote mechia nureerãba Pilatomaa naka asiɗau: “Dai kĩrukaraa kopanuu chi Jesús discipulorãba Jesús kakua nechiruaɗapeɗa maabae Jesús waya chokae nii aɗayua”. Mauɗéburu Pilatoba naka aɗa baɗa: “Chi Jesús jau ɓupeɗaaɗamare tapataɗapeɗa maabae guardia ara jãka kuɓuɗayu”.

Õbea día baɗakare, dapeɗeeɗa wẽrarã Jesús jau ɓupeɗaaɗamaa wãsiɗau. Ãchia unusiɗau chi mokara awara bʉratapeɗaaɗa ɓoosii, mauɗe chi choɓea nuɓuu ewa noɓooɗa. Choɓeaɗe eɗa ángel koɓoosii, ichia naka aɗa baɗa: “Perarã́baɗa. Jesús jãabaera ʉtaa piradruɗa baɗa. Ichi discipulorãmaa jaraɗe wã́sturu ãchi Galileaɗe ichi ome unuɗayua”.

María Magdalena isa pira wãsii Pedro Juan baara jʉrʉɗe wãyua. Ãchimaa naka aɗa baɗa: “Chi niiba Jesús kakua nechirua odoesii”. Pedro Juan baara pira wãpeɗaaɗa baɗa Jesús jau ɓupeɗaaɗamaa. Chi choɓea ɓari nuɓuu unusiɗauɗe, waya ãchi deeɗaa wãsiɗau.

Mau kaaɗe, María waya Jesús jau ɓupeɗaaɗamaa wãɗa baɗa. Choɓeaɗe eɗa ángel ome niɗau unupeɗa maabae naka jarasia: “Mʉa adua mʉ Mechiau samaa odoepeɗaaɗa”. Ichia mukĩra unusia, mauɗe kʉ̃risiasii ichi nepono uubarii nii, maabae naka wiɗisia: “Muchuburia, mʉʉmaa jarataba bichia Jesús kakua sama kuɓuɗa baɗa”. Chi mukĩraba naka panausia: “¡María!”, ara mauɗe ichia kuitaasii ichi Jesús nii. Ichia naka aɗa baɗa: “¡Jaradea nibabarii!”, maabae ichi jidau uru koɓooɗa. Jesusba naka aɗa baɗa: “Mʉ ãbarãmaa jaraɗe wãba bichia mʉ unuɗa baɗa”. Ara mauɗe, María pira wãpeɗa jaraɗe wãsii discipulorãmaa ichia Jesús unuɗa baɗa.

Mau kaaɗe, ara mau diaɗe, discípulo ome niɗau Jerusalenɗebena Emausɗaa oɗe wãmaa panasii. Mukĩra ãchi baara tʉa ɓeesii maabae wiɗisii kãare ʉ̃rʉbena beɗea panuu apeɗa wiɗiɗa baɗa. Ãchia naka asiɗau: “¿Bichia aduaẽ? Tres día basii, sacerdote mechia nureerãba Jesús beabipeɗaaɗa baɗa. Wẽrarãba jara duanuu ichi jãabaera chokae nii”.  Chi mukĩraba ãchimaa wiɗiɗa baɗa: “¿Profetarãba jarapeɗaaɗa ijãaɗakaẽ machia? Ãchia jarapeɗaaɗa basia chi Cristo biuyu ɓuu maabae ʉtaa piradruyu”. Maabae mauchaburu jaradea koɓooɗa baɗa chi Dachi Akõre beɗea ʉ̃rʉbena. Emausɗe bapeɗaaɗakare, chi discipulorãba ichimaa jarapeɗaaɗa baɗa ãchi baara ɓeeyua. Chiko komaa duanuuɗe, ichia ʉtaa wiɗiɗa baɗa pan ʉ̃rʉbena, maabáeburu chi discipulorãba kuitaasiɗau jãu mukĩra Jesusdu nii. Maabae ichi unuɗawẽe basia.

Discípulo ome niɗau Jerusalenɗaa pira wãsiɗau. Chi apostolerã chibʉrʉ duanuu deemaa neeɗapeɗa maabae joma nebʉrʉsiɗau chi pasaɗa baɗa. Deeɗa duanuumisa, Jesusba ãchimaa unubisia. Aɓaeɗeeɗa, apostolerãba ichi Jesús nii poyaa ijãaɗawẽa ɓoosii. Maka ɓumina ichia naka aɗa baɗa: “Mʉ jua ochiaɗapeɗa, waústuru. Dachi Akõre beɗeaɗe ɓʉ koɓooɗa baɗa chi Cristo biuɗa baɗa waya ʉtaa piradruyu”.