Mes judío nisán abadauɗe día 14ɗe añocha judiorã chibʉrʉbachiɗau Pascua aseɗai baita. Makaburu acordabachiɗau Jeowaba ãchi Egiptoɗebena awara bʉepeɗaaɗa baɗa maabae chi iujãa ichia deai aɗa baɗaɗaa uaɗoɗa baɗa. Año 33ɗe, Jesús ichi apostolerã baara Pascua asesiɗau de ʉtʉbenaɗe puuru Jerusalenɗe. Chiko kopeɗaaɗakare, Jesusba naka asia: “Aɓa machiɗebenaba mʉ jidaubiiruu”. Apostolerã kawayuswãe kopaneeɗapeɗa naka wiɗisiɗau: “¿Kaiba?”. Jesusba naka jaraɗa basia: “Chi mukĩra mʉa nau pan ɓaʼãra deaburuu maubʉ”. Makarã Jesusba Judas Iscariotemaa pan ɓaʼãra deaɗa baɗa. Ara mauɗe, Judas ʉtaa piradrupeɗa wãɗa baɗa.

Mau kaaɗe, Jesusba ʉtaa wiɗipeɗa, pan ɓʉetapeɗa maabae ichi apostolerã ichi baare paneepeɗaaɗamaa deɗekasia. Maabae naka jarasia: “Cha ɓuu pan kósturu. Nau mʉ kakua kĩra ɓuu, machirã kakua dearuu”. Maabae, waya ʉtaa wiɗisia vino ʉ̃rʉbena, ichi apostolerãmaa deɗekapeɗa naka jarasia: “Nau vino dósturu. Nau mʉ oa kĩra ɓuu, nau oa dearuu ẽbẽrarãba kachirua waupeɗaaɗa perdonabiyua. Mʉa jaraarua machirã mʉ baara ʉtʉ bajãaɗe gobernabudaa. Ara jãka añocha ase panábaɗa mʉ kʉ̃risiaɗapeɗa”. Iɗibae biɗa chi Jesús kaaɗe ãda nureerã añocha ẽsebuɗaa chibʉrʉbadaa Jesús biuɗaɗebena acordaɗayua.

 Apostolerãba chiko kopeɗaaɗakare, ãchi chiya jara bara ɓeesii kai aɓabena aude nii. Maka ɓumina Jesusba naka jaraɗa baɗa: “Chi machirãɗebena aude nibai baita, aude ɓiɗĩika nii kĩra nibayua”.

Mauɗe Jesusba nau siɗa jaraɗa baɗa: “Machirã mʉ amikorã. Mauɗéburu mʉa machimaa jarabarii joma mʉ Akõreba jarabi kʉ̃ria ɓuuɗebena. Mʉ ʉtʉ bajãaɗaa wãiɗea kuɓuu, mʉ Akõre ɓuumaa. Maka ɓumina, machirãra nama paneeɗayua, ẽbẽrarãba kuitaaɗayua machirã mʉ kaaɗe ãda nuree machi chiya kʉ̃ria panuubʉrã. Machi chiya kʉ̃riábaɗa ara jari mʉa machi kʉ̃ria ɓuu kĩra”.

Mau kaaɗe, Jesusba Jeowamaa ʉtaa wiɗiɗa baɗa ichi discipulorã ochia ua nibayua mauɗe aiɗayua ãchi ãbua chĩoɗawẽa nibaɗai baita. Maubapeɗa ʉtaa wiɗi nibasia Jeowa trʉ̃ jomaurãba respetaɗayua. Maaɗakare Jesús ichi apostolerã baarauba Jeowa ʉ̃rʉbena biʼia berrea ɓuu kariɗapeɗa maabae wãsiɗau. Maabae ɓiɗĩikaburu koɓoosii Jesús jidauɗai baita.