Chi fariseorãba bustabachiɗau junebenaba ãchi ʉ̃rʉbena biʼia jaraɗayúturu. Mauɗeeba ãchia junebena aiɗa kʉ̃riabudauɗe, aiɗabachiɗau jomaurãba ochiaɗai baitaburu. Ãchi ʉtaa wiɗibachiɗau jomaurã ẽbẽraba unuɗai baita. Boroɗe kawabachiɗau ʉtaa wiɗiɗai baita maabae chi sinagogaɗe mauɗe calleɗe biɗa jaraɗe wãbachiɗau jomaurãmaa ũribiɗai baitaburu. Mauɗeeba chi ẽbẽra kawayuswẽa kopaneesiɗau Jesusba jarasiiɗe: “Ʉtaa wiɗirã́baɗa chi fariseorã kĩraka. Ãchia kʉ̃risiabadau Dachi Akõremaa biʼia ũribii baita beɗea ãrĩã jarabudauba, jãu makawãema. Ʉtaa wiɗiburuu junebenamaa ũribiɗai baitawãema, bari Jeowamaa ũri nibabii baitaburu ɓuu. Ara aɓa ɓúturu jararã́ba. Jeowaba jarabi kʉ̃ria ɓuu ichimaa dachi saka senti nureeɗebena”.

Mauɗe Jesusba jaraɗa baɗa saka wiɗi nibayu: “Dai Akõre ʉtʉ bajãaɗe ɓuu, bichi trʉ̃ respetabiba. Neebis bichi Gobierno.  Bichia ʉtʉ bajãaɗe mauɗe nama iujãaɗe ase kʉ̃ria ɓuu asebiba”. Maaɗakare Jesusba jaraɗa saka wiɗi nibayu iɗibena chiko deabiyu baita mauɗe dachi pekao perdonabii baita biɗa.

Mauɗe maucha Jesusba jaraɗa basia: “Akawa ida ɓurã́ba ʉtaa wiɗi nibai baita. Bichi Akõre Jeowamaa chi biʼia ɓúturu mauchaburu wiɗi nibayua. Jomaurã akõreba dea kʉ̃ria nurea biʼia ɓee ãchi warrarãmaa. ¿Bichi warrba pan iɗiiruubʉrã, modu deai ɓuẽ? ¿Ɓeda iɗiiruubʉrã, damadu deayuẽ?”.

Jesusba jaradeaɗa baɗa kãare kawaɗai ɓuu chi ichia jaratasiiɗebena: “Bichia regalo biʼia ɓuu bichi warrmaa deabariibʉrã, ¿bichi Akõre Jeowaba ichi Jauri deabai ɓuka? Bari ichimaa bichi Jauri deábaɗa apeɗa wiɗiyua”. ¿Bichia Jesusba jaraɗa asebarẽe? ¿Kãare ʉ̃rʉbena wiɗibaraa Jeowamaa ichimaa ʉtaa wiɗiburuuɗe?