Jesús bautizaɗakare, naka jaradeɗeka koɓeesii: “Dachi Akõre Gobierno ara kaita ɓua”. Chi discipulorã ichi baara Galilea mauɗe Judeaɗaa wãbachiɗau. Jesús waya neesiiɗe ichi puuru wariɗamaa, Nazaret abadau, sinagogaɗaa wãɗa baɗa, aria chi Isaiasba ɓʉɗa baɗa bʉra kuɓuu ewatapeɗa maabae naka jĩwa lea koɓeesia: “Jeowaba mʉʉmaa ichi Jauri deaɗa baɗa ẽbẽrarãmaa beɗea bia ɓeeɗebena jaradeɗekayua” ¿Sakayua maka jarasaa? Ẽbẽrarãba Jesusba milagro aseburuu unu kʉ̃ria panasii. Maka ɓumina, Dachi Akõreba ichimaa ichi Jauri mau baitaburu deabasma. Chi aude importante ɓoosiira, beɗea bia ɓee Dachi Akõre Gobierno jaradeɗekaidu ɓoosii. Chi ichi ũri duanuurãmaa naka jara ɓooɗa baɗa: “Cha nau Dachi Akõreba ɓʉbiɗa baɗa iɗi cumpliiruu”.

Maaɗakare, Jesús mar Galileaɗebenaɗaa wãɗa baɗa. Aria unusii ichi discipulorã kimare niɗau ɓeda jidaubadaurã maabae naka asii: “Mʉ baare wã́baɗa machia ɓeda jidaubadau kĩra mʉa machimaa jaradeai ẽbẽrarã mʉʉmaa eneeɗayua”. Chi mukĩrarã chi trʉ̃ Pedro, Andrés, Santiago mauɗe Juan basiɗau. Ara mauɗe ãchi ɓeda nedobʉibadau baɗa ɓuiɗapeɗa ichi baara wãsiɗau. Galileaɗaa jaradeaɗe wãsiɗau Jeowa Gobierno ʉ̃rʉbena. Sinagogaɗe, ẽbẽra mercabadaumaa, mauɗe calleɗe biɗa jaradeɗekaɗe wãbachiɗau. Ẽbẽrarã ãrĩã ichi baara wãbachiɗau ãchi wãbudauɗaa. Jesús ʉ̃rʉbena eɗa wawarea kawa bara ɓeesia, puuru kaitawẽe ɓuuɗe biɗa Siria abadau.

Mau maaɗakare, Jesusba ichi baara nureabadaurãmaa poder deaɗa baɗa ẽpermo ɓee alẽtabiapeɗa mauɗe chi demonio baara nureapeɗaaɗa awara erkuabiai baita. Junebenarã discipulorã biɗa kõpaebachiɗau puuru ɓeecha wãɗayua. Mauɗe wẽrarã kĩra jipa nureerã biɗa kõpaeɗapeɗa mauɗe ichi baara nureerã aiɗabachiɗau. Mau kõpaebachiɗau María Magdalena, Juana, Susana, mauɗe waabenarã baara.

Jesusba ichi discipulorãmaa kawabiaɗakare, jaradeɗekaɗe bʉikasii. Mauɗe Galileaɗe wãbudauɗe, junebenarã biɗa Jesusɗe ijãa kopaneeɗapeɗa maabae bautizakuasiɗau. Ẽbẽra ãrĩã biɗa Jesús baara nurea kʉ̃riasiɗaa, mauɗeeba ichia jaraɗa baɗa ãchi kĩrabara iujãa biʼia noɓeesii ne  uuɗai baita kĩra. Ichia naka aɗa baɗa: “Jeowamaa ʉtaa wiɗíbaɗa waaburu bʉikayua ẽbẽra ne uuɗai baita”. Maaɗakare, 70 chi discipulorã jʉrʉsii maabae omeemea bʉekasii jaradeɗekayua joma Judeaɗe. Jomaurã ẽbẽrarãmaa jaradeɗekabachiɗau Dachi Akõre Gobierno ʉ̃rʉbena. Ãchi neepeɗaaɗakare, Jesusmaa nebʉrʉ kʉ̃ria panasii saka wãpeɗaaɗa ʉ̃rʉbena. Chi Diabloba jãkarã́baɗa poyaa jaraabai basia jaradeɗekaɗayua.

Jesusba joma jãka kawabiaɗa baɗa ichi discipulorãmaa ara jãuchaa aseɗai baita ichi bajãaɗaa wãɗakare. Ichia naka jara koɓooɗa baɗa: “Beɗea bia ɓee Dachi Akõre Gobierno ʉ̃rʉbena joma nau iujãaɗe jaradeɗekaɗe wã́baɗa. Dachi Akõre beɗea ẽbẽrarãmaa kawabiaɗapeɗa bautizakuásturu”.