12 apostolerã jʉrʉɗakare, Jesús chi modeɗebena neesiiɗe, wãɗa baɗa chi ẽbẽrarã ãrĩã chibʉrʉ kuɓuumaa. Ãchirã neepeɗaaɗa baɗa Galileaɗebena, Judeaɗebena, Tiroɗebena, Sidonɗebena, Siriaɗebena, chi do Jordán kĩraeɗebena siɗa. Chi ẽbẽrarã ẽpermo ɓee mauɗe ẽbẽra demonio kakua eɗare bara ɓeerã siɗa eneepeɗaaɗa. Mau Jesusba jomaurã curaɗa baɗa. Ichi aka ɓeeɗa baɗa chi mode iikaa maabae ẽbẽrarã ome beɗea aka ɓeeɗa. Ichia jaradeasii Dachi Akõre ome amiko nureaɗai baita, Jeowaɗebena kawaɗapeɗa mauɗe ichidu kʉ̃riaɗayua. Maka ɓumina Dachi Akõre kʉ̃riaɗaabai ɓuu dachia junebena ẽbẽra kʉ̃riaɗawẽebʉrã. Ẽbẽra bia nureaɗayu jomaurã ome, dachi iadaa nureerã ome biɗa.

Jesusba naka jara koɓooɗa baɗa: “Machi amikorãdu kʉ̃ria nureaɗaabayua, bari kʉ̃riaɗai baraa dachi iadaa nureerã siɗa mauɗe dachi sõɗeeba perdonaɗayu. Chi nii bichi ome kĩruburuubʉrã, ara mauɗe mʉ perdonábaɗa jaraɗe wãba. Waabenarã kʉ̃riaɗayua ara bichia bichi kʉ̃riabii kʉ̃ria nii kĩra”.

 Jesús biɗa nau consejo bia deakuaɗa basia: “Aude importante ɓuu Jeowa kʉ̃ria nibaidu chi nejarra ãrĩã bara nibai kãyabãra. Chi orroabarii niiba bichi chi nejarra orroa adaui ɓua, maka ɓumina bichia Jeowa kʉ̃ria nii mau kĩrabara ʉtʉ bajãaɗe chi nejarra mera ɓuu kĩra ɓuu, aɓauba jãu orroa adaubai ɓuu. Mauɗeeba ãrĩã preocupa nibarã́ba kãare chiko koyu, kãare doyu mauɗe kãare ropa jʉ̃yu. Kauwa ochiaba ibana cheke. Dachi Akõreba ara jãka chiko kobiabaria. Bariara bichi preocupaaruu siɗa, tiempo ãrĩã́turu nibaabayua. Kʉ̃risiaba: Jeowaba kuitaa nii bichia kãare nesita nii”.

Ẽbẽrarãba chi nii Jesús kĩra beɗeaburuu ũriɗaka basii. Chi fariseorãba jãkara kawabiɗaabasia. ¿Sakayua Jesusba biʼia ãrĩãburu jaradeabachaa? Ichia joma jaradeabachii Jeowaɗebena kawaɗa baerã.