Año 32ɗe Pascua aseɗai naeɗe, chi apostolerã jaradeɗekaɗe wãpeɗaaɗa baɗa waya neesiɗau. Ãchi ãrĩã kãsa duaneesiɗau, mauɗéburu Jesusba jãbaɗe odoekuasii Betsaidaɗaa jamaria descansabii baita. Maamina chi do iikaa babudauɗe, Jesusba unusii chi ẽbẽra ãrĩã basii ichi kaaɗe neepeɗaaɗa baɗa. Ichia apostolerã baareburu ɓoi kʉ̃ria ɓoosii, maka ɓumina ẽbẽra kʉ̃riaɗeeba ãchi irsibisii. Ẽperma keɗeaɗa baɗa aribiabiasii mauɗe ãrĩãɗebena jaradea koɓeeɗa baɗa. Dachi Akõre Gobierno ʉ̃rʉbenadu beɗeaɗa baɗa kewarauɗaa. Kiumaa ɓuuɗe chi apostolerãba naka jarasiɗau: “Chi ẽbẽrarã jarrbisia duanuu. Wãuríbaɗa aika chi chiko jʉrʉɗe wãɗai baita”.

Maamina Jesusba naka jarasia: “Ẽbẽrarã bʉekaɗaabai ɓuu. Machiaburu chiko kobiásturu”. Chi apostolerãba wiɗisiɗaa: “¿Dai pan nedoɗe wãɗai ɓuẽ ãchimaa kobiɗai baita?”. Felipe apóstol basia, ichia naka jarasii: “Chi nejarra bara nii siɗa, ẽbẽrarã ãrĩã bẽrã, pan kobiyua jomaurã baita poyaa nedoɗaabai basii”.

Jesusba wiɗisia: “¿Sãabe chiko ira panua?”. Andresba naka panausii: “Pan jua aɓa mauɗe ɓeda ome ira panuu. Chiko ɓiɗĩikaburu ira panuuɗe jomaurã cuidai baita”. Jesusba naka jarasia: “Pan ɓeda baare enébaɗa”. Maabea, ẽbẽrarãmaa jarasii siruaɗe 100cha, waabenarã 50cha aꞌawaracha aka duaneeɗayua. Pan ɓeda baare adaupeɗa ʉtaa ochiapeɗa maabea Jeowamaa wiɗisia. Apostolerãmaa chiko deasia waabenarãmaa deɗekabii baita. Chi ẽbẽra jãma duanasiɗau 5.000 mukĩrarã, wẽrarã, warrarã jãarã  kosiɗaa aɓa jãwaa ɓeeruuɗaa. Chi chiko ʉ̃rʉ ɓeeɗa baɗa perdebiɗaamaaba chi apostolerãba 12 jaɓaraɗaa pesiɗau. ¿Bʉʉmaa jãu milagro mechia ɓoosẽe?

Jomaurãba jãka ɓee unusiɗauba kawawẽa paneesiɗau mauɗeeba ãchia kʉ̃ria panasii Jesús rey nibai ãchi baita. Maamina Jeowaba rey babi kʉ̃riabasia jãu momentoɗe, Jesusba jãka ɓeeɗebena kuitaa ɓoosia. Maabea bʉekasia ẽbẽrarã mauɗe chi apostolerãmaa jaraɗa mar Galilea kĩraiɗe wã́baɗe, aɗa baɗa. Ãchirã jãbaɗe wãsiɗau, Jesusra modeɗaa istu wãɗa baɗa. ¿Sakai baita? Ichi Akõre ome beɗeai baita. Bariara Jesús bariwẽa ɓosmina, ichia Jeowamaa ʉtaa wiɗibachia.