Jesús año y medio jaradea kãribasiiɗe, ichia jʉrʉkuasii chi nuree mukĩrarã ichi baara ãbua traja nibaɗai baita mauɗe kawabiaɗayua chi congregacionɗebenarãmaa. ¿Kairã jʉrʉkuasaa? Mau jʉrʉi naeɗe, ichi du aɓa ɓooɗe wãsii. Chi ẽsabuɗe joma ʉtaa wiɗisii Jeowamaa aiɗabii baita biʼia jʉrʉi baita. Mau norema dapeɗeeɗa Jesusba chi ɓee ichi discipulorãɗebena chibʉrʉbiaɗa baɗa. Maabae 12 apostolerã jʉrʉ adaukuasii. ¿Kuitaa ɓuẽ jãarãɗebena chi nuree trʉ̃? Naka trʉ̃ nureasii: Pedro, Andrés, Santiago, Juan, Felipe, Bartolomé, Tomás, Mateo, Santiago chi Alfeo warr, Tadeo, Simón, mauɗe Judas Iscariote.

Chi 12 Jesús baara wãbachiɗau. Ichia kawabia kãribasii saka waabenarãmaa jaradeɗekayu mauɗe bʉikaɗa baɗa ãchi du aɓa jaradeaɗe wãɗai baita. Maaɗakare, Jeowaba poder deɗekasii ẽpermo ɓeerã curabiai baita mauɗe demoniorã chi ẽbẽra kakua eɗare ɓeaɗa baɗa awara erkuaɗai baita.

Chi 12 apostolerã Jesús amikorã basii, Jesusba kuitaa ɓoosii ãchia aseɗai ɓuu ichia jaraɗa baɗa. Chi fariseorãba  jarabachiɗau jãarã mukĩrarã akawa adua nuree apeɗaaɗa. Maka ɓumina, Jesusba maka kʉ̃risiabasia ãchiɗebena. Ichia biʼia ãrĩã jaradeakuaɗa baɗa ãchi trajo biʼia ase nureaɗai baita. Jesús beaɗai naeɗe mauɗe ichi piradruɗakare chi apostolerã ichi baara duanasii. Ãrĩã ãchirãɗebena Galileaɗebenarã baɗa, ara chi Jesús ariaɗebena baɗa kĩra. Chi nuree wẽra baara nureasii.

Chi apostolerãba kachirua ɓee siɗa asebachiɗaa, ãchirã siɗa pekao baraa nureasii baerã. Ɓesɗe kachirua beɗeabachiɗau makawãebʉrã biʼia biɗa aseɗaka basiɗau. Mauɗeeba eteuɗe biɗa kĩrubachiɗau. Ãchi chiya chĩobachiɗau kai basii aude biʼia ãrĩã nii. Naka nureasmina, mukĩra bia nureasii Jeowa kʉ̃ria nureasiɗauɗeeba. Ãchiaburu kawabipeɗaaɗa ẽbẽrarãmaa chi Jesusɗe ijãaɗai baita ichi iujãaɗe niiwãemisa.