Jesús bautizaɗakare, Dachi Akõre Jauriba ichi iujãa põesãa ɓuuɗaa odoeɗa basia. 40 diaɗe chiko ɓiɗĩika biɗa koobasia mauɗéburu jarrbisia ãrĩã nibasia. Maabea Diablo nee ɓoosia Jesusmaa kachirua asebii baita. Naka jara ɓoosia: “Bichi Dachi Akõre warrbʉrã, naarã moomaa jaraba pan baba aika”. Maamina Jesusba panausia chi Dachi Akõre Beɗeaɗeeba: “Eɗa ɓʉ kuɓua ẽbẽrarã chokae nibaɗai baita chiko koɗaidu nesitaɗawẽe. Jeowaba jaraburuu siɗa ũriɗai nesita panuu”.

Jʉbawãe niiba waya naka jarasia Jesusmaa kachirua asebii baita: “Bichi biawãra Dachi Akõre warr niibʉrã, templo ʉtʉareba jĩidruba. Dachi Akõre Beɗeaɗe eɗa ɓʉ kuɓuu ichia angelerã bʉikayua bichi karebai baita”. Maamina Jesusba waya panau ɓoosia Dachi Akõre Beɗeaɗeeba: “Eɗa ɓʉ kuɓuu ne barikia waurã́se Jeowaba bichi karibai kuitaa”.

Maaɗakare, Diabloba nau iujãaɗe gobierno barau chi nejarra baara unubisia, maabea naka jarasia: “Naarã gobierno mauɗe chi ne bia ɓee puuruɗe barau siɗa deayua õdarrɗe koɓeeburuubʉrã mauɗe wiɗiburuubʉrã Dachi Akõremaa wiɗiburuu kĩra”. Maamina Jesusba panausia: “¡Satanás wãs! Eɗa ɓʉ kuɓuu aɓa Jeowadu kʉ̃ria nibai”.

Maabea chi Jʉbawãe nii wãɗakare, angelerã neesiɗau Jesusmaa chiko kobiɗai baita. Maabea, Jesusba jaradeɗeka koɓeesia beɗea bia Dachi Akõre Gobierno ʉ̃rʉbena. Jeowa jãu trajo ichimaa dea ɓoosia nau iujãaɗe asei baita. Ẽbẽrarãba ãrĩã awabachiɗaa chi Jesusba jaradeɗeka ɓuu, ichi wãburuumaa ichi kaaɗe wãbachiɗau.