Apocalipsis 6:1-17
6 Maabae mʉʉba unusii chi Oeja Kaebe Niiba chi kartamaabena wãa kuɓuu aɓa oetasii. Maka ɓuuɗe chi kimare chokae nureeɗebena aɓauba naka jaraaruu ũrisii: «¡Neese!»* Chi mimi bã kĩra jĩwa ɓuasii.
2 Araa ichiasiiɗe, mura torroa nii unusii. Chi mau mura ʉ̃rʉ akʉ ɓuasiiba ichi juaɗe enadrʉma uru ɓuasii: Aɓauba ichimaa boroɗe jũra jʉ̃barii aɓa deasii. Ara makʉɗe chi nuree poyaapeɗa maabae maucha poyaaɗe wãsii.
3 Mau maaɗakare chi Oeja Kaebe Niiba chi wãa kuɓuu maucha oetasiiɗe mʉʉba ũrisii chi chokae nureeɗebena aɓaba naka jaraaruu: «¡Neese!».
4 Mauɗe mura puria nii awara neesii. Aɓauba chi mau mura ʉ̃rʉ akʉ ɓuumaa espada aɓa deasii. Dachi Akõreba maumaa ẽbẽrarã chi nau iujãaɗe nebʉraswãe duanuumaa kachirua wauyu ida ɓusii chĩoɗapeɗa chiya beaɗamera.
5 Mau maaɗakare chi Oeja Kaebe Niiba chi wãa kuɓuu maucha oetasiiɗe mʉʉba ũrisii chi chokae nureeɗebena aɓaba naka jaraaruu: «¡Neese!». Araa ichiasiiɗe mʉʉba mura parrba nii unusii. Chi mau mura ʉ̃rʉ akʉ ɓuuba ichi juaɗe chikʉa chaabarii uru ɓuasii.
6 Maka ɓuuɗe mʉʉba chi kimare chokae nuree panuu tãeɗe aɓa berrearuu ũrisii. Mauba naka jarasii chi mura ʉ̃rʉ akʉ ɓuumaa: «Chi trigo ãrisii. Maka ẽbẽra aɓa ewari aɓa trajai, trigo libra ome nedoi baita. Mauɗe chi cebada siɗa ãrisii. Maka ẽbẽra aɓa ewari aɓa trajai cebada 6 nedoi baita. Maamina olivo jõ mauɗe uva jõ ida biꞌia chaubise drabirua mauɗe uva ɓaa baraamera».
7 Mau maaɗakare chi Oeja Kaebe Niiba chi wãa kuɓuu maucha oetasiiɗe mʉʉba ũrisii chi chokae nureeɗebena aɓaba naka jaraaruu: «¡Neese!»
8 Araa ichiasiiɗe mʉʉba mura kukuaraa nii unusii. Chi mau mura ʉ̃rʉ akʉ ɓuu trʉ̃ «Biuɗa» abadau. Chi ichi ome nibabarii chi trʉ̃ «Biuɗarã Panabadau» abadau. Joma nau iujãaɗe ẽbẽra kimareɗebena aɓa Dachi Akõreba maarãmaa ida beabiasii. Maarã ẽbẽrarã beasiɗau chĩoduuba, jarrbaba, dachi kakua kachirua paneebibadauba mauɗe ãnimara kachirua nureeba.
9 Mau maaɗakare Oeja Kaebe Niiba chi wãa kuɓuu maucha oetasiiɗe mʉʉba unusii chi Dachi Akõre beɗea jaradea panuu kakua beapeɗaaɗa jaurirã. Maarã bajãaɗe chi ãnimara baa deabadau jãkaa panasiɗau.
10 Kĩruɗeeba naka berreasiɗau: «Jomaurã Mechiu, bichi ãrea bia nii mauɗe biawãra berreabarii. ¿Bichiba sakaeɗe chi jãu iujãaɗebenarã dai beapeɗaaɗa kakua kastikakuaima?»
11 Dachi Akõreba ãchi aɓaaɓaa paru torr deaɗakasii jʉ̃ɗamera. Maabae naka jarasii: «Apii eseɗau panaɗáusturu joma chi ẽbẽrarã beaduuɗaa joma bichi ãbarã Cristoba pekuaɗa machi beapeɗaaɗa kĩra».
12 Mau maaɗakare mʉʉba unusii chi Oeja Kaebe Niiba chi wãa kuɓuu maucha oetaaruu. Mauɗe ioromia ãrea urisii. Ʉmada pãriusii paru parr aɓa biuɗakare jʉ̃badau kĩra. Jeɗako joma oa kĩra puria koɓeesii.
13 Ãrea pũatuuruuɗe higo jõo pãaraa ɓaebadau kĩra chi bajãaɗebena pusterrearã iujãaɗe ɓaesiɗau.
14 Bajãa wãꞌãesii karta araa bʉrabarii kĩra. Joma earã mauɗe islarã siɗa chi naeɗe kuɓuaɗamare wãꞌãesii.
15 Mauɗe chi nau iujãaɗebena rey mechiurã, chi gobernadorã, chi kokoroarã mechiurã, chi nejarra barau nuree, chi meserãa nuree, chibari baita bari trajabadaurã mauɗe chibariswãe nuree ea choɓeaɗe mauɗe eaɗe mo koɓeaɗamare mirusiɗau.
16 Maarãba naka jarasiɗau: «¡Ea, mo, dai ʉ̃rʉ ɓáesturu. Dai mirubiásturu chi rey ãkauɗe akʉ ɓuuba dai unurãamera mauɗe chi Oeja Kaebe Niiba kastikarãamera.
17 Chi ichiba kastikai ewari mechiu neesii. ¿Kaiba mau ome dauchia jãadua ɓuaima?»
Notas
^ 6:1 «¡Neese!». Griego beɗeaɗe chi ɓee kartaɗe versículos 1, 3, 5 mauɗe 7 naka ɓʉ kuɓuu: Chi chokae nureeɗebena aɓaba naka jarasii chi mura ʉ̃rʉ akʉ ɓuumaa: «Ichiapeɗa neese».
