Apocalipsis 14:1-20
14 Mau maaɗakare mʉʉba chi Oeja Kaebe Nii Sión eaɗe ʉkʉ nuɓuu unusii. Chi mau baara 144.000 ẽbẽrarã panasii. Ãchi dauɓʉʉrʉɗe chi Oeja Kaebe Nii trʉ̃ mauɗe ãchi Akõre trʉ̃ ɓʉ uru panasii.
2 Maabae mʉʉba bajãaɗe do ʉrʉrʉa kĩra ũrisii, bã ʉrʉrʉa kĩra. Chi mʉʉba ũrisii, arpa chaamaa panuuɗe jĩwabarii kĩra ɓuasii.
3 Mauɗe chi Dachi Akõre chi rey ãkau daaɗe kari wiɗi karimaa panasiɗau, chi kimare chokae nuree daaɗe, mauɗe 24 chõrarã mechiurã daaɗe. Aɓau biɗa poyaa kuitaabasii mau kari karii baita. Bari chi 144.000 Dachi Akõreba nau iujãaɗebena karibakuaɗáburu kariɗai kuitaa panasii.
4 Maarã ẽbẽrarã wẽra auɗua nureasii. Dachi Akõre baita maarã ɓaꞌãra biɗa kachiruaswãe nureasii. Maarã chi Oeja Kaebe Nii baara chi wãaruumaa wãbadau. Dachi Akõreba nau iujãaɗebena chi maarã ichi baita karibakuasii, ichi baita mauɗe chi Oeja Kaebe Nii baita biɗa panaɗamera chi nabena chauɗa ichimaa dearuu kĩra.
5 Maarãba ɓes aɓa biɗa setaa jaraɗakau. Bari kachiruaswãe nuree.
Chi angelerã õbea panuurãba jarapeɗaaɗa
6 Mau maaɗakare mʉʉba ángel aɓa bajãaɗe ũuɓari nii unusii. Mauba chi beɗea bia uru ɓuasii chi nau iujãaɗebena jomaurãmaa jarai baita: puuruɗebenarãcha, druaɗebenarãcha, ẽbẽrarã didiwaraacha mauɗe beɗea didiwaraacha. Mau beɗea ewaricha maka ɓuai.
7 Mauba jĩwa naka jarasii: «¡Dachi Akõre wapeásturu! Ichíturu chi mechiu nii ásturu, ichiba kastikai ewari neesiiɗeeba. Bajãa, iujãa, mar mauɗe bania ioroɗe bumadrubarii wauɗaɗeeba, mau biꞌia berreásturu».
8 Mau ángel kaaɗe neepeɗa naka jĩkua jarasii: «Babilonia puuru mechiu ãrisii. Biawãra joma ãrikuasii. Chi mau puuruɗebenarãba ãrea mia kĩra nejasia wau panuuɗeeba drua aꞌawaraabenamaa ara mau kĩra kachirua waubiasiɗau uva ɓaa asia doobai panuuɗe dobiaduu kĩra».
9 Mau ángel wãɗakare kaaɗe june aɓa ũuɓari neesii. Mauba naka jarasii: «Aɓauba chi mau ãnimaramaa biꞌia berrearuubʉrã mauɗe chi ara ichi kĩra juaba ne kapeɗaaɗamaa biꞌia berrearuubʉrã, mauɗe chi seña dauɓʉʉrʉɗe maebʉrã juaɗe ida waubiiruubʉrã,
10 Dachi Akõreba ichi kĩruuruuba mau ẽbẽra kachirua ãrea ɓui uva ɓaa asia dobiiruu kĩra. Mau ẽbẽra chi ángel biꞌia nuree daaɗe, mauɗe Oeja Kaebe Nii daaɗe azufre aoko nuɓuuba ãrea biꞌiwãe ɓuai.
11 Mau ẽbẽra ãrea biꞌiwãe ɓuumaa aoko nuɓuu iɗi kiikau, bari ewaricha boɗiu nuɓuabarii. Aɓauba chi ãnimara mauɗe chi ara ichi kĩra juaba ne kapeɗaaɗa ãrea kʉ̃riaruubʉrã, kʉrrjĩruswãe ɓuai. Chi mau ãnimara seña juaɗe waubipeɗaaɗa maebʉrã dauɓʉʉrʉɗe ãyadaa mauɗe ẽsabuɗe kʉrrjĩruswãe ɓuai».
12 Mauɗeeba ẽbẽrarã Dachi Akõreɗerã ãrea dauchia jãadua panaɗai panuu. Jesusɗe ãrea ijãaɗapeɗa, ichiba waubi ɓuu beɗea ũribaba panaɗai panuu.
13 Mau maaɗakare mʉʉba bajãaɗe aɓaba jaraaruu ũrisii: «Chi kartaɗe naka ɓʉse: “Iɗiiɗeeba chi Dachi Mechiuɗe ijãa biubadaurã biꞌia panaɗai”».
Mauɗe Dachi Akõreba naka jarasii: «Biawãra biꞌia panaɗai. Maarã biꞌiwãe panaɗaɗebena kʉrrjĩru panaɗai, maarãba biꞌia waupeɗaaɗa waa chau kãriiɗeeba».*
Dachi Akõreba ẽbẽrarã kastikai ʉ̃rʉbena
14 Mau maaɗakare mʉ bajãaɗaa ichiasiiɗe jʉ̃rʉara torr unusii. Mʉʉba chi Ẽbẽra Ba Ɓuaɗa kĩra mau jʉ̃rʉara ʉ̃rʉ akʉ ɓuu unusii.* Boro jũra nee wauɗa jʉ̃ ɓuasii. Ichi juaɗe neko peeɗea jũria ɓuu uru ɓuasii.
15 Mauɗe Dachi Akõre de mechiu bajãaɗe kuɓuareeba ángel aɓa awara neesii. Chi mauba jʉ̃rʉara ʉ̃rʉ akʉ ɓuasiimaa naka jĩwa ɓia jarasii: «Iujãaɗe uuɗa joma waraa kuɓuu. Bichi neko jũria ɓuuba tarise chi tarii ewari basiiɗeeba».
16 Ara makʉɗe chi jʉ̃rʉara ʉ̃rʉ akʉ ɓuaɗaba neko jũria ɓuuba ara jua aɓa tuuruba joma nau iujãaɗe tarisii.
17 Maabae Dachi Akõre de mechiu bajãaɗe kuɓuuɗebena ángel aɓa maucha awara neesii. Mau biɗa neko peeɗea jũria ɓuu aɓa uru ɓuasii.
18 Maabae chi Dachi Akõre baita bajãaɗe kera baa deabadaumarebena june aɓa ángel awara neesii. Mauɗeeba chi tʉbʉchia aoko uru ɓuabarii chi kera baai baita. Naka jĩwa jarasii chi neko peeɗea jũria uru ɓuumaa: «Chi iujãaɗebena uva waraa kuɓuuɗeeba, bichi neko jũria ɓuuba joma tuukuase».
19 Ara makʉɗe chi angelba chi neko jũria ɓuuba jua aɓa tuupeɗa chi uva ɓʉʉrʉcha araa pesii. Maabae chi uva biraduabadaumare bʉikasii biraduaɗamera chi ɓaa adauɗai baita. Mau jara ɓuu Dachi Akõreba kastikai.
20 Chi uva Jerusalén puuru awara biraduasiɗau. Biraduasiɗauɗe mamabena oa ãrea chesii.* Mau oa chi iɗubena ʉtʉ mura okarrɗe jʉ̃badaumaa ba ɓuasii.
Notas
^ 14:13 Maarãba biꞌia waupeɗaaɗa waa chau kãriiɗeeba. Griego beɗeaɗe naka ɓʉ kuɓuu: maarãba waupeɗaaɗa ãchi kaaɗe nibaɗai.
^ 14:14 Chi Ẽbẽra Ba Ɓuaɗa kĩra. Daniel 7:13.
^ 14:20 Oa ãrea chesii. Griego beɗeaɗe naka ɓʉ kuɓuu: 1.600 estadia oa chesii. Kajuma beɗeaɗe jara ɓuu «300 kilómetro oa chesii».
