¿Chi profeciarã Bibliaɗebenaba jara panue Jesusdu chi Mesías?

Chi Bibliaba panau ɓuu

Ei. Ichi iujãaɗe niimisa, Jesusba profeciarã ãrĩã barau cumpliɗa basia chi “Mesías chi Líder” ʉ̃rʉbena, “chi Ẽbẽra nau iujãa karibaɗe neeyua” (Daniel 9:25; 1 Juan 4:14). Maubapeɗa ichi biuɗa baɗa kaaɗe, Jesusba waaburu cumpli ɓoosia chi profeciarã chi Mesías ʉ̃rʉbena (Salmo 110:1; Hechos 2:34-36).

¿Kãare jara kʉ̃ria ɓua chi trʉ̃ Mesías?

Chi beɗea hebreoɗe Maschíaj (Mesías) ara chi jãu beɗea griegoɗe Kjristós (Cristo) “Jʉrʉ adaupeɗaaɗa” jara kʉ̃ria ɓua. Mauɗeeba, Jesucristo nau jara ɓua “Jesús chi Jʉrʉ adaupeɗaaɗa baɗa” maebʉrã “Jesús chi Mesías”.

Chi Biblia ewaɗebenaɗe, ẽbẽra jʉrʉɗayua rey baita o gobernabiɗayua jãra aceite ichi boro ʉ̃rʉ eabachiɗaa (Levítico 8:12; 1 Samuel 16:13). Dachi Akõreba Jesús jʉrʉɗa basia Mesías bai baita, nau cargo ãrĩãdu autoridad iɗaa ɓuu (Hechos 2:36). Maamina, Jesús aceiteba jʉrʉ adauɗai baɗa kãyabãra, Dachi Akõreba ichi Jauriɗeeba jʉrʉɗa basia (Mateo 3:16).

¿Duanabaaka ẽbẽrarã chi jãu profeciarã cumpliɗai baita?

Makawẽma. Jari dachi huella digitalba ẽbẽra unubarii kĩra, chi profeciarã Bibliaɗebenaba unuɗa basii aɓa nii Mesiasdu, maebʉrã Cristo. Maamina, Bibliaba jara ɓua: “Mau ewariɗe setaa jaraɗai ãchi Dachi Akõreba Dachi Karibabarii deai jaraɗa. Mauɗe waabenarãba setaaɗeeba jaraɗai ãchi Dachi Akõre baita berreabadaurã. Maarãba ẽbẽrarãba ne poyaa wauɗakau mechiu wauɗai ẽbẽrarã setaa kũruaɗai baita. Dachi Akõreba jʉrʉ adauɗarã siɗa poyaa setaa kũruapeɗaaɗa basirã, ãchi siɗa setaa kũruaɗai basii” (Mateo 24:24, Biblia Chamí, WPS.).

¿Chi Mesías waya neebaaka?

Makawẽma. Bibliaba jaraɗa basii chi Mesías Davidɗebena uruburuu, ichi rey Israelɗebena baɗa (Salmo 89:3, 4). Maamina, chi registrorã chi rey Davidɗebena kairã saka uru kuɓuu ichi deɗebena perdeɗa basia. Chi nau joma kõekuapeɗaaɗaka ɓuu chi romanorãba año 70ɗe Jerusalén adausiɗauɗe. a Mamaeɗeeɗabena, wãʼãebʉ kaiba jarayu chi rey David deɗebena urupeɗaaɗa baɗa. Maka ɓumina, jãarã registrorã Jesús ewaɗe baraaɗa basia, ichi iadaa duanuurãba ãyaa jaraɗaabasia Jesús David deɗebena uru ɓoosii (Mateo 22:41-46).

¿Sãabe profeciarã Mesías ʉ̃rʉbena Bibliaɗe ɓua?

Poyaa biʼia jaraabai ɓua sãabe profeciarã barau Mesías ʉ̃rʉbena. Chi jãarã profeciarã ɓaʼãra diwara jusiai ɓua Bibliaba ariɗe chi Mesías ʉ̃rʉbena jara ɓuumare. Por ejemplo, Isaías 53:2-7 jãma jara ɓua chi Mesiasmaa ne joma pasai ʉ̃rʉbena. Chi nureeba jarabadau naarã aɓa ɓuu profeciarãdu abadaa, mauɗe chi nureeba jarabadau aɓaaɓauɗe profeciarã diwara ɓee.

Chi ɓee profeciarã Jesusɗe cumplipeɗaaɗa

Pasaɗa baɗa	Profecía	Cumpliɗa baɗa
Abrahán deɗebena neeɗa baɗa	Génesis 22:17, 18	Mateo 1:1
Isaac deɗebena neeɗa baɗa, ichi Abrahán warr baɗa	Génesis 17:19	Mateo 1:2
Chi tribu israelita Judaɗebena baɗa	Génesis 49:10	Mateo 1:1, 3
Rey David deɗabena baɗa	Isaías 9:7	Mateo 1:1
Virgen warr basii	Isaías 7:14	Mateo 1:18, 22, 23
Belenɗe naceɗa baɗa	Miqueas 5:2	Mateo 2:1, 5, 6
Emmanuel trʉ̃apeɗaaɗa b	Isaías 7:14	Mateo 1:21-23
Jesús akõrerã chi nejarra ãrĩã bara duanaabasia	Isaías 53:2	Lucas 2:7
Jesús naceɗakare wãwarã ãrĩã kenasiɗaa	Jeremías 31:15	Mateo 2:16-18
Egiptoɗebena iupeɗaaɗa basia	Oseas 11:1	Mateo 2:13-15
Nazarenoka unu panaɗaa c	Isaías 11:1	Mateo 2:23
Ichi naeɗe jarabarii neeɗa basia	Malaquías 3:1	Mateo 11:7-10
Mesías kĩra jʉrʉ adaupeɗaaɗa año 29ɗe d	Daniel 9:25	Mateo 3:13-17
Ichi Dachi Akõreba ichi Warr kĩra jaraɗa baɗa	Salmo 2:7	Hechos 13:33, 34
Dachi Akõre deɗe ichi chi kʉ̃ria baɗaa	Salmo 69:9	Juan 2:13-17
Beɗea biarã jaraɗa basia	Isaías 61:1	Lucas 4:16-21
Ichia Galileaɗe jaradeaɗa kĩrabara ʉ̃ɗaa kuɓuuka ɓoosia	Isaías 9:1, 2	Mateo 4:13-16
Moisés kĩra milagro aseɗaa	Deuteronomio 18:15	Hechos 2:22
Moisés kĩra Dachi Akõreɗeeba beɗeasia	Deuteronomio 18:18, 19	Juan 12:49
Ẽpermo keɗee ãrĩã alentibiasia	Isaías 53:4	Mateo 8:16, 17
Ichia ara ichi ʉ̃rʉbenadu ãrĩã jarabiibaɗaa	Isaías 42:2	Mateo 12:17, 19
Chi chuburia ãrĩã unubisii sufri keɗee kakua	Isaías 42:3	Mateo 12:9-20; Marcos 6:34
Jaradeɗekasia chi jipa ɓuu Dachi Akõre baita	Isaías 42:1, 4	Mateo 12:17-20
Kĩrawãrea ãrĩãdu jarakuabachii	Isaías 9:6, 7	Juan 6:68
Jeowa trʉ̃ jaradeɗekasia	Salmo 22:22	Juan 17:6
Ejemplo iɗaa jaradeɗekaɗaa	Salmo 78:2	Mateo 13:34, 35
Líder basia	Daniel 9:25	Mateo 23:10
Ãrĩãrãba ichiɗe ijãaɗaabasii	Isaías 53:1	Juan 12:37, 38
Mo ɓaebiburuu kĩra basia	Isaías 8:14, 15	Mateo 21:42-44
Ichi ida ɓupeɗaaɗa	Salmo 118:22, 23	Hechos 4:10, 11
Barikiau kakua kĩramaa panaɗa	Salmo 69:4	Juan 15:24, 25
Jerusalenɗaa mura ʉ̃rʉ wãsiiɗe biʼia ãrĩã jarasiɗaa ichi ʉ̃rʉbena	Zacarías 9:9	Mateo 21:4-9
Warrarãba biʼia jarapeɗaaɗa ichi ʉ̃rʉbena	Salmo 8:2	Mateo 21:15, 16
Jeowa trʉ̃ɗe neeɗa basia	Salmo 118:26	Juan 12:12, 13
Ichi amikoba traicionaɗa baɗa	Salmo 41:9	Juan 13:18
30 moneda plata ɓuu kakua traicionapeɗaaɗa e	Zacarías 11:12, 13	Mateo 26:14-16; 27:3-10
Ichi amikorãba ɓuipeɗaaɗa	Zacarías 13:7	Mateo 26:31, 56
Setaa jarabadaurãba atua jarasiɗaa ichi ʉ̃rʉbena	Salmo 35:11	Mateo 26:59-61
Setaa jara duanuu kĩrapeta beɗeabasia	Isaías 53:7	Mateo 27:12-14
Kĩadarrmaa iɗukuaɗa	Isaías 50:6	Mateo 26:67; 27:27, 30
Boromaa bakuruba upeɗaaɗa	Miqueas 5:1	Marcos 15:19
Ichi pebewasiɗau	Isaías 50:6	Juan 19:1
Ichi kĩadarrmaa sĩɗakare apii ɓeesii	Isaías 50:6	Juan 18:22, 23
Gobernanterãba ãyaa beɗeasiɗaa ichi ʉ̃rʉbena	Salmo 2:2	Lucas 23:10-12
Jua jĩrʉ baare merapeta jiranuu bakurumaa	Salmo 22:16	Mateo 27:35; Juan 20:25
Ichi ropa premio kĩra adausiɗaa	Salmo 22:18	Juan 19:23, 24
Pecador kĩra unupeɗaaɗa	Isaías 53:12	Mateo 27:38
Atua jarasiɗau, iadaasiɗaa	Salmo 22:7, 8	Mateo 27:39-43
Chi pecadorna kakua sufrimaa ɓoosii	Isaías 53:5, 6	1 Pedro 2:23-25
Kĩrabara Dachi Akõreba ɓuiɗa kĩra ɓoosia	Salmo 22:1	Marcos 15:34
Vinagre hiel abadauɗaa ɓuu deasiɗaa doyua	Salmo 69:21	Mateo 27:34
Ichi obisia kerasia biubarii naeɗe	Salmo 22:15	Juan 19:28, 29
Dachi Akõremaa ichi Jauri dearuu jarasia	Salmo 31:5	Lucas 23:46
Ichi vida deasii	Isaías 53:12	Marcos 15:37
Biubarisia chi pecado ẽebariyua	Isaías 53:12	Mateo 20:28
Ichi ɓʉʉrʉ aɓa biɗa ɓʉataɗaabasii	Salmo 34:20	Juan 19:31-33, 36
Ichi supeɗaaɗaa	Zacarías 12:10	Juan 19:33-35, 37
Ʉapeɗaaɗa ʉrriko kĩra	Isaías 53:9	Mateo 27:57-60
Waya piradrubisiɗaa	Salmo 16:10	Hechos 2:29-31
Ichi traicionaɗa baɗa junebena ome cambiasiɗaa	Salmo 109:8	Hechos 1:15-20
Dachi Akõre jua biare aka ɓuu	Salmo 110:1	Hechos 2:34-36

a Chi karta Cyclopedia McClintock mauɗe Strongɗebenaɗe jara ɓuu: “Chi registrorã eɗa ɓʉ kuɓuu chi triburã mauɗe judío deɗabenarã maarã acabapeɗaaɗa baɗaka ɓuu chi Jerusalén ãritasiɗauɗeburu, mauɗe naeɗerawẽe.”

b Chi trʉ̃ hebreo Emmanuel, mauba jara kʉ̃ria ɓuu “Dachi baare Dachi Akõre kuɓuu”, biʼia jara ɓuu joma Jesús chi aseburuu Mesías kĩraka. Ichi iujãaɗe nibasiiɗe mauɗe chi aseɗa baɗa nauba unubiasii Dachi Akõre ara kaita nii ichi kʉ̃riaɗapeɗa ũri nureerã ome (Lucas 2:27-32; 7:12-16).

c Chi beɗea Nazareno hebreo beɗeaɗe nétser nee kuɓuuka ɓuu, jãu jara kʉ̃ria ɓuu “tonooruu”.

d Bichia kawa kʉ̃ria ɓuubʉrã chi Bibliaɗe jara kuɓuu chi Mesías neeburuu año 29ɗe, leas chi artículo “El profeta Daniel predice la llegada del Mesías”.

e Cha nau profecía chi libro Zacariasɗe kuɓua, Bibliaɗe Mateoba jara ɓuu “beɗeaɗa baɗa chi profeta Jeremiasba” (Mateo 27:9). Ɓesɗe Bibliaɗe chi parte “chi Profetarã” a ɓuumaa naaburu chi libro Jeremías kuɓuubachiɗauka ɓuu (Lucas 24:44). Mateoba “Jeremías” ʉ̃rʉbena beɗea ɓoosiiɗe joma jãu librorãɗebena beɗeabachiika ɓuu, jãma eɗa biɗa ɓoosii chi libro Zacariasɗe.

Nau siɗa bustai ɓua buchia

¡DESPERTAD!

Wẽra judía niiba biʼia jara ɓuu sakayua ɓuisii ichia kerea nibaɗaɗe

¿Kãareba akawa ijãabisaa Racquel Hallmaa Jesús chi Mesías basii ichia ãrĩã espera nibaɗa?