Skip to content

¿Nau Biblia kambiasiɗau makawẽebʉrã ãyaa maucha ɓʉsiɗaka?

 Makawẽma. Chi naberaeɗeeɗa ɓʉ koɓooɗabaɗa kawa ochiaruuɗe ijãa panuu chi Biblia ara chi aɓa ɓuudu, bariara naberaeɗeeɗa ɓʉpeɗaaɗabaɗa chi karta isa koa ɗiɗiburuu.

¿Chi jari eɗa ɓʉ kuɓuuɗe ãyaa ɓʉ kuɓuuɗaabaska?

 Chi ɓʉ koɓeerã naberaeɗeeɗabena chi Bibliaɗe. Maarãɗebena ãyaa ɓea koɓee, jãuba unubi ɓuu ɓʉkuasiɗauɗe ãyaa ɓʉ koɓeepaɗe wãsii. Maka ɓumina, ãyaa ɓʉ koɓemina ãrĩãrã wãʼãema ara ɓiɗĩikaburu cha naka ãyaa ɓʉ kuɓuuɗeeba chi jara kuɓuu mau junebena wãʼãe. Maka ɓumina, chi ɓee ãyaa koɓee maarã mechibenawẽa. Jãarã ãyaa koɓeerã naberaeɗeeɗa ɓʉpeɗaaɗabaɗa mau chi ɓʉ kuɓuuɗebena ãyaa koɓei baita. Cha nau omerãɗebena ochiaɗaika:

  1.   Naberaeɗeeɗabena ɓʉpeɗaaɗabaɗa chi Bibliaɗebena naarã beɗea unusiɗaa: “Mauɗe bajãaɗe õbea panuuba mau biawãra araɓauɗe jara panuu; Dachi Bajãaɗebena Akõreba maka jara ɓuu, chi «Beɗea» abadauba maka jara ɓuu mauɗe ichi Jauriba maka jara ɓuu. Mau õbea panuu aɓaburubʉ” (1 Juan 5:7 Biblia Chamí, WPS). Chi jari nabena eɗa ɓʉ koɓeeɗebena jãarã beɗearã unuɗawẽa. Jãarã uru maucha kuɓuusiɗaa. a Jãuɗéburu chi ɓʉ koɓeerã iɗibeabena wãʼãe koɓea jãarã beɗearã.

  2.   Chi trʉ̃ Dachi Akõreɗe unubadaa nabenaeɗeeɗabena chi ɓʉsiɗauɗebena Bibliaɗe, maka ɓumina ãyaa koɓeepaɗe wãsiɗaa chi jaraburuu chi Dachi Akõreɗe “Señor” aɗapeɗa makawẽebʉrã “Dios” maka kambiasiɗau.

¿Saka kawa panua jãka ãyaa ɓʉ koɓee unusiɗauɗeebiɗa maucha wãʼãe?

 Iɗibeabena ãrĩãdu ɓʉ koɓemina, isa unuɗai ɓua chi ãyaa ɓʉ koɓee. b Unusiɗauɗe naarãɗebena, ¿kãare kʉ̃risiaɗaiba? ¿Ijãaɗai ɓue chi Biblia iɗibeabena uru panuu ome?

  •   Chi profesor William Henry Green, ichia Chi ɓʉ ɓee hebreoɗe ʉ̃rʉbena (Antiguo Testamento abadauɗebena) naka asii: “Wãʼãe ɓuu junebena libro ariɗe ɓʉ koɓeesii biʼia ãrĩã chi Biblia kĩra”.

  •   Frederick Bruceba Biblia ʉ̃rʉbena ãrĩã kuitaa niiba naka ɓʉsia Cristo ʉ̃rʉbena ɓʉ ɓee griego beɗeaɗe maebʉrã Nuevo Testamento abadauɗebena: “Chi Nuevo Testamento ɓobaka maucha ɓʉ koɓee junebena libroɗeebiɗa, maka ɓumina wãʼãe ɓuu maucha ẽbẽra jãu libroɗebena ãyaa ɓʉ koɓeerã”.

  •   Sir. Frederick Kenyon, ichia Bibliaɗebena copiarã naeɗebena ãrĩã kuitaa niiba naka jarasii: “Aɓa nii ẽbẽraba chi Biblia juaɗe adaupeɗa jarai ɓubaka wãrabena chi Dachi Akõre Beɗea ɓuu, mau biʼia ɓʉ kuɓuu chi ãyaa ɓʉ kuɓuuwẽa mau naberaeɗeeɗabena”.

¿Saka kuitaa panua maucha chi Biblia ɓʉ koɓee ãyaawẽe?

  •   Chi ɓʉbadaurã maarã judiorã basii mauɗe maucha Jesusɗe ijãa nuree siɗa. Maarãba ɓʉsiɗau chi ãyaa koɓeerã chi puuru Dachi Akõreɗebenarãɗe c (Números 20:12; 2 Samuel 11:2-4; Gálatas 2:11-14). Jãarã biɗa ɓʉpeɗaaɗa basia chi judiorãba Dachi Akõre beɗea ũriɗaabasii, maabae jarasiɗau ãchi kʉ̃risiaɗe chi Dachi Akõreba jaradeɗekaɗabaɗawãeɗebena (Oseas 4:2; Malaquías 2:8, 9; Mateo 23:8, 9; 1 Juan 5:21). Jãarãba ɓʉsiɗaurã unubisiɗau chi ariɗe ɓuudu ɓʉpeɗaaɗa maabae ãrĩã kʉ̃ria nureasia Dachi Akõre Beɗea.

  •   Chi Dachi Akõreba ɓʉbisii chi Biblia nau ichia biɗa ɓʉbisii ariɗeburu ɓʉɗayua  d (Isaías 40:8; 1 Pedro 1:24, 25). Ichia kʉ̃riaabasii jãu chi ẽbẽra naeɗebenarãmaaburu, mauɗe ara dachi iɗibeabenarã baita biɗa (1 Corintios 10:11). “Joma Dachi Akõre beɗeaɗe ɓʉɗa dachimaa jaradeai baita ɓuu. Dachi sõbiabiabarii mauɗe aiɗabarii joma dauchia jãadua panaɗamera. Maka dachiba biawãra kuitaa panuu Dachi Akõre ome ewaricha biꞌia panaɗai” (Romanos 15:4 Biblia Chamí, WPS).

  •   Jesús mauɗe chi baara ãdabachiɗaurãmaa maarã biɗa beɗeasiɗau Chi ɓʉ ɓee hebreoɗebena ãchirãba kʉ̃risiaabasiɗau chi jari ɓʉ kuɓuuɗebena mau wãrabenawẽe basii (Lucas 4:16-21; Hechos 17:1-3).

a Jãarã beɗearã unuɗawẽa naarãɗe: el Códice Sinaítico, el Códice Alejandrino, el Manuscrito Vaticano 1209, la Vulgata latina original, la versión siríaca Filoxeniana-Harclense mauɗe la Peshitta siríaca.

b Chi Nuevo Testamento abadauɗe maebʉrã Cristo ʉ̃rʉbena ɓʉ ɓee griego beɗeaɗe unu kopanuu 5.000ɗe chi cha ɓʉ koɓee araɓau ɓuuɗebena.

c Chi Bibliaba jara ɓuuwãe chi Dachi Akõrebena jara nureasirã maarã biʼia ãrĩã nureasii. Mauɗéburu chi Bibliaɗe naka jara ɓua: “Ni aɓa wãʼãe ɓuu ẽbẽrã pekaoswẽe nii” (1 Reyes 8:46).

d Chi Bibliaba jara ɓuuwãe chi Dachi Akõreba ɓʉbisii beɗea aɓaaɓaa, mau ichiaburu kʉ̃risiabiasii chi ɓʉsiɗau ẽbẽrarãba ara ãchi kʉ̃risiaɗe ɓʉɗayua (2 Timoteo 3:16, 17; 2 Pedro 1:21).