Ir al contenido

¿Dachi Akõre joma parteɗe kuɓuka?

Chi Bibliaba panau ɓuu

 Dachi Akõreba joma unui ɓua mauɗe ichi poderɗeeba joma aseyua ichia kʉ̃riaburuumare (Proverbios 15:3; Hebreos 4:13). Mauɗe, chi Bibliaba jarawẽa ɓua ichi joma parteɗe kuɓuu. Makarã ichia jaradea ɓuu ichi jauri nii mauɗe ichi bara nia sama bibi nii.

  •   Dachi Akõre saka nia: Ichi jauri kĩra nibayua (Juan 4:24). Ni ẽbẽra aɓa nii biɗa unuubayua (Juan 1:18). Chi Bibliaɗe eɗa ɓʉ kuɓuuɗe unubi ɓuu kĩraka ɓuu sama unui baita. Mauɗe chi Bibliaba jarawẽa ichi joma parteɗe nii (Isaías 6:1, 2; Apocalipsis 4:2, 3, 8).

  •   Sama ɓoobaria: Dachi Akõre ɓoobarii chi dachia unuɗawẽ kuɓuu, ichi universoɗe niiwẽ mauɗeeba ãiburu. Ichi ɓoobaria ʉtʉ bajãaɗe (1 Reyes 8:30). Chi Bibliaba jara ɓuu chi angelerã “wãsiɗau Jeowa ɓuumaa”,  a jãuba unubi ɓuu ichi bara nia sama bibi nii (Job 1:6).

Dachi Akõre joma parteɗe niiwẽebʉrã, ¿mʉ kuiɗai ɓubaka?

 Maera. Bariara ichi ɓoobaria chi dachia unuɗawẽ kuɓuu, Dachi Akõreba ãrĩã kʉ̃risiabarii chi iujãaɗe bibi nureerã baita, ichia ochiapeɗa kuida nii chi bereka nureerã ichi ũriɗayua mauɗe aiɗa nia (1 Reyes 8:39; 2 Crónicas 16:9). ¿Saka dachi kakua kʉ̃risiapeɗa kuida nia?

  •   Dachia ʉtaa wiɗiduuɗe: Ichia ũri nia dachia ichimaa wiɗiduuɗe (2 Crónicas 18:31).

  •   Dachi nomaa duanuuɗe: “Jeowa ara kaita ɓua chi ãchi korason puʼua ua duanuu mauɗe aiɗa ɓua chi kĩra nomaa aka keɗeerã” (Salmo 34:18).

  •   Dachia nesita panuuɗe konsejo dearuu: Ichi Beɗea chi Bibliaɗeeba, Jeowaba dachi biʼia kʉ̃risiabiyua, mauɗe odoeyua chi o jipa ɓuuɗe (Salmo 32:8).

Biʼia kʉ̃risiakau chi Dachi Akõre jomau parteɗe nii

 Chi nureeba ãyaa jarabadau: Chi Dachi Akõre ara waa nii jomau parte ichia wauɗaɗe.

 Chi ariɗe ɓuu: Dachi Akõre iujãaɗe bibi niiwãe mauɗe universoɗe biɗawãe (1 Reyes 8:27). Bibliaba jara ɓuu ichia wausii chi estrellarã mauɗe junebenarã siɗa jãuba “unubi ɓuu ichi mechibena ɓuu” (Salmo 19:1). Maka ɓuumina jara ɓuuwãe chi Dachi Akõre ichia wauɗamare bibi nii mauɗe ichi bibi ɓuu araɓau jari chi pãbarii juaba cuadro ichi mama eɗa bibi ɓuukau kĩra. Chi cuadro unubi ɓuu saka nii chi pãbarii. Ara jãka, chi Dachi Akõreba wauɗa siɗa unubi ɓuu ichi poder, ichi kʉ̃risia choromapeɗa mauɗe jomaurã kʉ̃ria kuɓuu (Romanos 1:20).

 Chi nureeba ãyaa jarabadau: Dachi Akõre joma poder baraabayua ni joma kuitaabayua ichi jomaurã parteɗe niiwãeɗeeba.

 Chi ariɗe ɓuu: Chi Jauri chi poder Dachi Akõreɗe joma aseyua. Cha nau Jauriba, Dachi Akõreba joma kawa kuɓuu chi kãare pasa kuɓuu mauɗe joma aseyu barikiau momentoɗe mauɗe lukarɗe ara ichi jãma kuɓuuwẽmina (Salmo 139:7).

 Chi nureeba ãyaa jarabadau: Salmo 139:8ɗe jara ɓuu Dachi Akõreba joma parteɗe kuɓuu: “Chi ʉtʉ bajãaɗe koɓeesirã, jãma bichi nibai basia, mauɗe mʉ jeɗaa nuɓeeibʉrã chi Tumbaɗe, mama aria bichi koɓeei basia”.

 Chi ariɗe ɓuu: Cha nau testoba jara kuɓuuwãe kĩra chi Dachi Akõre jomau parteɗe kuɓuu. Mau chi mipitaa ãrĩã jara ɓuu kĩra Dachi Akõreba dachi aiɗai ɓuu importawẽa dachi sama nuree.

a Chi Bibliaba jara ɓuu chi Dachi Akõre trʉ̃ Jeowa.