Ir al contenido

¿Dachi Akõreba waukaɗae chi chokae nureerã chi evolución abadauɗeeba?

Chi panau kuɓuu Bibliaɗebena

 Makawẽma. Bibliaba jara ɓuu Dachi Akõreba waukaɗabaɗa ẽbẽrarã mauɗe junebenarã chokae kuɓuurã animararã kĩraka kidua iujãaɗebena a (Génesis 1:12, 21, 25, 27; Apocalipsis 4:11). Bibliaba jarabʉrã ẽbẽrarã imisiɗau Dachi Akõrerã naeɗe nibasiɗauɗebena Adán mauɗe Eva (Génesis 3:20; 4:1). Mau jara ɓuuwẽ makʉbʉrã Dachi Akõreba chi evolución wauibachii, joma chi chokae nureerãɗebena. Chi Bibliaba ãyaa jara ɓuuwẽ chi cienciaba unuɗabaɗa ãyaa nuree aɓa aɓaa chokae nureerãɗebena. b

 ¿Kãare kawa nurea junebenarã ẽbẽraba?

 Chi evolución teística abadau junebenarã ʉ̃rʉbena jara kʉ̃ria ɓuu. Chi Encyclopædia Britannica, jãuba jari jara ɓuu “chi aude chaarea niibʉ chi Dachi Akõreba ara jãka wauɗabaɗa maka jarabadaa ẽbẽraba”.

 Chi evolución teisticaba nau siɗa jarabaria:

  •   Chi naeɗeeɗa bibi nureaɗapeɗaaɗabaɗa maarã siɗa ãchi junebe maucha jara nureasia.

  •   Chi chokae nii ãyaa bae nii mau junebe ãi nibaɗe wãyua mau jarabadau macroevolución.

  •   Makʉbʉrã Dachi Akõreburu jãu maneja nia.

 ¿Chi evolución araɓau ɓubaka jari chi Bibliaba jara ɓuu kĩra?

 Chi evolución warãbena basirã jari jara ɓuu Genesisba chi waukaɗaɗebena araɓauwãe basia. Maka ɓuumina Jesusba jarasii chi mau warãbenadu basia (Génesis 1:26, 27; 2:18-24; Mateo 19:4-6). Chi Bibliaba jara ɓuu chi Jesús iujãaɗaa neei naeɗe, ichi bibi nibasii bajãaɗe ichi Akõre baare maabea ichia biɗa aiɗa waukaɗabasia (Juan 1:3). Dachi Akõreba chi evolucionɗeeba wausii mau joma chokae nureerã mau araɓau ɓuuwẽ chi Bibliaba jara ɓuu kĩra.

 ¿Chi chokae nuree kawabadau ãchi nureemarebena mauba jara kʉ̃ria ɓue ara ɓubaka chi evolución?

 Chi Bibliaba jarawẽ asta samauɗaa kambiayu chi chokae nureerã mauɗe sãabe kambiayu bara nibayu. Mauɗe jarawẽa ɓua chi animara chokae nuree asta samauɗaa kambiayu waaburu kiriabudauɗe wauribudau aɓa aɓaa ãyaa. Chi nureeba jarabadau jãu kambiaburuu mau evolucionɗeeburu maka ɓuumina jãka kambiaburuuba mauba jarawẽa chi evolucionɗeeba maucha chokae nuree wauburuu.

a Chi Bibliaba jara ɓuu “aɓa aɓaa”, chi chokae nureerãɗebena diwara jara kʉ̃ria ɓuu chi cientificorãba jara panuu “especie” ʉ̃rʉbena. Chi cientificorãba jarabadau chi evolucionɗeeba aɓa especie kambiasia maka ɓuumina chi ãchia ariɗe jara panuu aɓa aɓaa kambiasiɗaa, ara jãka Genesisɗe jara ɓuu kĩra.

b Mau jarabadau microevolución.