Yela ja Yehova kakuvumbika manguvulu ni yilayi ya mu chifuchi. Twakuvumbika ulite wa akwetu muze akusakula kwimba mwaso wa mu chifuchi, kulemesa pandela hanji muze akulishinga ni kulakenya ngwo, mononokena chifuchi cho.

 Yela ja Yehova keshi kulinga yiwanyino yino ya mu chifuchi mumu kananyingika ngwo, yuma yino yakulimika ni malongeso a mu Mbimbiliya. Muze twakuvumbika yiyulo ya akwetu, twakuwahilila muze akwetu no akuvumbika yiyulo yetu.

Ha chikuma chino

•  Malongeso aka a mu Mbimbiliya waze twakukaula?

•  Mba yika mutuhasa kulinga, nyi ngwe nguvulu kanatushinjila kulinga chihanda ku yiwanyino yacho?

•  Shina Yela ja Yehova kakukalila chimwe chizavu cha mafwefwe hanji cha atu akwo?

 Yiyulo yetu yakukatuka ha shimbi ja mu Mbimbiliya:

•   Twatamba kuwayila wika Yehova. Mbimbiliya yinambe ngwo: “Ukawayile Mwene Zambi ye, Iye wika ukamulingile.” (Luka 4:8) Miaso ya mu chifuchi ni kulishinga cha kushishikila chifuchi chize akulinga, chinachingi kwononokena chifuchi kuhiana chuma cheswacho. Kashika, Yela ja Yehova kananyingika ngwo, chili chipi kulinga yiwanyino ya mutapu au.

   Chikwo nawa, Yela ja Yehova kananyingika ngwo kulemesa pandela chili kulinga uwayilo hanji kukombelela mahamba, yuma yize Mbimbiliya yakukanjisa. (1 A-Korindu 10:14) Akwa-kuhengwola sango amwe kakutayiza ngwo, yilayi ya pandela kwamba pundu, yinatale ha yuma ya mayingeleja. Mukwa-kusoneka Carlton J.H.Hayes yamba ngwenyi: “Kuli atu waze akuzanga chifuchi, pandela chili chuma chilemu chinji chize akufuliela ni kuwayila.” a Mukwa-kusoneka mukwo Daniel P Mannix yamba ngwenyi: “Akwa-Kristu atangu kalikalile kuhana yitapo kuli akwa-mana [hanji ngwetu, kuli maspiritu] a nguvulu wa [Roma]—ni musono, ni yetu twakulituna kulemesa pandela ha matangwa jetu.” b

  Yetu Yela ja Yehova kutushi kulemesa pandela, alioze kutushi kulinga yuma yipi ha pandela ngwe kuyocha, twakuvumbika pandela ni yilayi yikwo ya mu chifuchi.

•   Kuli Zambi atu eswe kali amuwika. (Yilinga 10:34, 35) Mbimbiliya yakwamba ngwo: Zambi “watangile mavungu eswe a hashi kupalikila muli mutu umuwika.” (Yilinga 17:26) Kashika, Yela ja Yehova kananyingika ngwo chili chipi kulemesa vungu limwe kuhiana likwo. Yetu twakuvumbika atu eswe, kutushi kutala kuze anakatuka hanji kuze atwama.—1 Petulu 2:17.

 Yela ja Yehova keshi kulimika ni nguvulu. Yetu twakutayiza ngwetu, manguvulu hanaasela kuli Zambi mumu kechi kuhasa kupwako ndo ‘shina Zambi machitayiza.’ (A-Roma 13:1-7) Twakutayiza nawa ngwetu, Akwa-Kristu katamba kwononokena shimbi ja nguvulu.—Luka 20:25.

 Mba yika mutuhasa kulinga nyi ngwe shimbi ja nguvulu jinete hanga tulinge yuma yize shimbi ja Zambi jakukanjisa? Ha chikuma ngwe chino, mutuhasa kwita kuli nguvulu hanga shimbi jenyi jichine kupinjisa yize twakufuliela. c Nyi ngwe nguvulu malituna, Yela ja Yehova ni vumbi lieswe kakusakula ‘kwononokena Zambi ngwe nguvulu wo hi atu ko.’—Yilinga 5:29.

 Ka. Yela ja Yehova keshi kulinjisa mu yuma ya mafwefwe hanji mu yizavu yikwo yize yakulimika ni nguvulu. Yetu kutushi kulituna kwimba mwaso wa mu chifuchi, kulemesa pandela hanji kulishinga ngwetu mutwononokena chifuchi mumu lia kulimika ni yuma ya mafwefwe. Kwamba pundu, twakukaula yuma yize twakufuliela yize yinakatuka mu Mbimbiliya.