Zango lize Yela ja Yehova akwete hali Zambi ni hali atu, liakwakwasa kwambujola sango ja mu Mbimbiliya kuli atu eswe kuchingako atu waze ambile ngwo “keshi kuzanga kwapanjika.” (Mateu 22:37-39) Zango hali Zambi liakutukwasa kwononokena shimbi ya Mwanenyi ya “kwambujola kanawa kuli atu eswe.” (Yilinga 10:42; 1 Yoano 5:3) Mba tulinge chino, twatamba kwambujola sango jipema yisuho yinji ngwe chize aprofeta alingile ku shakulu. (Jeremia 25:4) Amu twakuzanga akwetu, twakwambulwila “sango ja Wanangana” jize jakulamwina mwono wa atu, kuchingako wa waze akulituna kutupanjika ku uputukilo.—Mateu 24:14.

 Kanji-kanji, atu waze keshi kuzanga kutupanjika ku uputukilo, kakuzanga kutupanjika muze twakuhanjika no chisuho chikwo. Tutalenu mumu liaka chino chakulingwa:

•   Atu kakwaluka.

•   Atu akwo ku zuwo liacho mahasa kutupanjika.

•   Atu kakwalumuka. Atu amwe kakunyingika ngwo kanafupiwa Zambi ni kupanjika sango ja mu Mbimbiliya muze yuma yakwalumuka ku mwono wo hanji mumu lia yuma yize yinalingiwa hashi. (Mateu 5:3) Chipwe atu waze akulimika ni yetu, mahasa kwalumuka ngwe chizechene alingile postolo Paulu.—1 Timoteu 1:13.

 Kutushi kushinjila atu hanga apanjike sango jipema. (1 Petulu 3:15) Tunanyingika ngwetu, mutu ni mutu katamba kukwata chiyulo chenyi mwene hakutwala ku uwayilo.—Shimbi Yamuchiali 30:19, 20.