•  Maliji Akuputuka No 2

•  Yikuma Yilemu ya mu Liji lia Zambi 3-5

  •  Pande 3

  •  Kuhengwola Yikuma Yilemu ya mu Mbimbiliya 4

  •  Kutanga Mbimbiliya 5

•  Likolweze Chinji mu Munda 6-14

  •  Chize Muhasa Kuputuka Lusango 7

  •  Kwasa Atu Azange Kukupanjika 8

  •  Kupwisa Atu Tumbaji 9

  •  Lumbununa Ufulielo We 10

  •  Pande 11

  •  Mushete 12

  •  Chize Muhasa Kulilulieka 13

  •  Chize Muzachisa Yinema ni Mikanda 14

•  Mwono wa Akwa-Kristu 15-16

  •  Longeso lia Mbimbiliya lia Chikungulwila 16

•  Maliji Akuhwisa No 17

•  Kuchichimieka ni Kuhana Fumbo 18

•  Kufunga Mashimbu 19

•  Muze Kalayi wa Mbonge Mameneka Chikungulwila 20

•  Poso ya Kukunguluka cha Mbonge hanji cha Mambonge 21

•  Poso ya Chiwanyino cha Kwiwuluka Kufwa cha Yesu 22

•  Kalayi wa Kukunguluka cha Mwono ni Mulimo Wetu 23

•  Kasongo wa Kukunguluka cha Mwono ni Mulimo Wetu 24

•  Mukwa-Kuhana Fumbo 25

•  Shikola Jikwo 26

•  Yinema 27

1.  Usongwelo uze uli ha mukanda uno, mukwasa mandumbu eswe waze ali ni chihanda ha Kukunguluka cha Mwono ni Mulimo Wetu. Eswe waze ali ni yihanda ha kukunguluka, katamba kutanga usongwelo uze unatale ha chihanda cho ha mukanda uno shimbu kanda achilulieka chihanda cho. Nwatamba kulweza akwa-kwambujola eswe alihane-ene hanga apwe ni kuhanjika pande. Eswe waze akwiza ku kukunguluka cheswe, mahasa kuhanjika pande nyi chamwenemwene kakutayiza malongeso a Mbimbiliya ni kukaula shimbi ja Akwa-Kristu ku mwono wo. Kasongo wa Kukunguluka cha Mwono ni Mulimo Wetu, katamba kushimutwina ni waze keshi akwa-kwambujola anazange kulisonekesa hanga amone yize atamba kulinga ni kwalweza nyi kanajame kulisonekesa ku shikola nyi ka. Iye katamba kulinga chino hamwe ni longeshi wa mutu wacho (hanji hamwe ni chisemi chenyi yoze uli Chela cha Yehova). Usongwelo uze munushimutwina uli uzewene akushimutwina ni waze anazange kuputuka kwambujola ni chikungulwila.—od kap. 8 par. 8.

2. Minutu yimuwika. Hita poso, hanyima lia kwimba mwaso utangu ni kulemba, kasongo wa Kukunguluka cha Mwono ni Mulimo Wetu mahanjika maliji akehe ha yihanda yeswe yize yinatale ha kukunguluka. Kasongo katamba kushindakenya ha yikuma yize muyikwasa chinji mandumbu mu chikungulwila.

  3. Pande: Minutu kumi. Mutwe wa pande ni yikuma yaali hanji yitatu ya pande jino, yili mu Mukanda Wakuzachisa ha Kukunguluka cha Mwono ni Mulimo Wetu. Pande jino, katamba kujihanjika kuli mukulwana hanji kavumbi yoze wajama. Muze munuputuka mukanda waha wa Mbimbiliya ha kutanga cha ha poso, nwatamba kutala chinema chili ni maliji atangu a mukanda wacho. Mukwa-kuhanjika pande jino, malumbununa chize chinema chacho chinalite ni mutwe wa pande. Alioze chuma chilemu atamba kulinga chili kulumbununa yikuma yize anase mu mukanda wa kuzachisa ha kukunguluka. Nyi kuchili mashimbu, iye mahasa kuhanjika ha yizulie ni yikuma yikwo yize analulieka hakutwala ku pande jacho.

 4. Kuhengwola Yikuma Yilemu ya mu Mbimbiliya: Minutu kumi. Chino chili chihanda cha yihula ni kumbululo, chakuhona kwamba yimwe ha kuputuka ni ha kuhwisa. Chihanda chino katamba kuchilinga kuli mukulwana hanji kavumbi yoze wajama. Iye katamba kuhula mbunga yihula yeswe yaali. Chikwo nawa, iye mwe mamona nyi mahasa kutanga versu jeswe jiliho nyi ka. Eswe waze makumbulula, katamba kukumbulula ha segundu 30 hanji mushi.

 5. Kutanga Mbimbiliya: Minutu yiwana. Chihanda chino cha longi katamba kuchilinga kuli longi wa lunga. Longi wacho katamba kutanga wika yisoneko chakuhona kwamba maliji eka ha kuputuka hanji muze mahwisa kutanga. Kasongo wa kukunguluka, katamba kukwasa alongi hanga atange kanawa maliji eswe ni kwashindakenya mu mashimbo, kuhwimina haze hatela ni kutanga ni liji lize akuhanjika nalio mashimbu eswe. Amu kutanga chimwe cha Mbimbiliya chili chihi chikwo chisuku, kalayi wa Kukunguluka cha Mwono ni Mulimo Wetu katamba kuhana pande jino kulita ni chize hita longi akutanga.

6. Minutu kumi ni yitano. Chihanda chino kachilulieka hanga chikwase mandumbu eswe awahise uhashi wo wa kwambujola ni kulongesa. Nyi muchilita, makulwana a mu chikungulwila no mahasa kulinga yihanda yino ya alongi. Longi mweswe katamba kukaula chikuma anatongola mu mukanda Kulongesa hanji mu mukanda Zangenu Atu chili mukachi ka yipanga yino () chize chinasoloka sali lia chihanda chize malinga ha mukanda Mwono Wetu ni Mulimo Wetu. Ha mashimbu amwe, muhapwa ni kusoloka chihanda cha kushimutwina ni mbunga. Chihanda chacho katamba kuchilinga kuli mukulwana hanji kavumbi yoze wajama.—Tala  paragrafu 15 yinahanjika hakutwala ku chize muhasa kusongwela chihanda cha kushimutwina ni mbunga.

 7. Chize Muhasa Kuputuka Lusango: Chihanda chino cha longi mahasa kuchilinga kuli ndumbu wa lunga hanji wa pwo. Ndumbu wa lunga katamba kuchilinga ni lunga-ni-mukwo, ndumbu wa pwo nawa chochene, nyi ka, waze machilinga katamba kupwa asoko. Eswe aali mahasa kutwama hanji kumana. Nyi unazange kunyingika sango jikwo hakutwala ku chihanda chino ni chize muhasa kuchilinga, tala  paragrafu 12 ni  13.

 8. Kwasa Atu Azange Kukupanjika: Chihanda chino cha longi mahasa kuchilinga kuli ndumbu wa lunga hanji wa pwo. Ndumbu wa lunga katamba kuchilinga ni lunga-ni-mukwo, ndumbu wa pwo nawa chochene. (km 97/5 p. 2) Eswe aali mahasa kutwama hanji kumana. Longi katamba kusolola yize mutuhasa kuhanjika ha kufuna kuli mutu yoze wazanga kulilongesa ha kulitakana chitangu.—Nyi unazange kunyingika sango jikwo hakutwala ku chihanda chino ni chize muhasa kuchilinga, tala  paragrafu 12 ni  13.

 9. Kupwisa Atu Tumbaji: Chihanda chino cha longi mahasa kuchilinga kuli ndumbu wa lunga hanji wa pwo. Ndumbu wa lunga katamba kuchilinga ni lunga-ni-mukwo, ndumbu wa pwo nawa chochene. (km 97/5 p. 2) Eswe aali mahasa kutwama hanji kumana. Chihanda chino chatamba kusolola chize twakusongwela longeso lia Mbimbiliya lize hitunaputuka kulu. Ndumbu yoze malinga chihanda chino katambile kuhanjika maliji a uputukilo hanji akuhwisa no, mahasa kuchilinga wika nyi kasongo kanamutalila ha chikuma chacho. Kuchishi ni ulemu kutanga maparagrafu eswe, chipwe ngwe munuhasa kuchilinga.

 10. Lumbununa Ufulielo We: Muze chihanda chino muchitala ha pande, katamba kuchilinga kuli longi wa lunga. Muze muchitala ha chimweso, mahasa kuchilinga kuli longi wa lunga hanji wa pwo. Longi wa lunga katamba kuchilinga ni lunga-ni-mukwo, longi wa pwo nawa chochene, nyi ka, waze machilinga katamba kupwa asoko. Alongi katamba kusolola kanawa kumbululo lia chihula chili ha mutwe hakuzachisa yikuma yize amutuma kulumbununa. Longi mahasa kutesa nyi matongola referência ya mukanda muze analingi chihanda chenyi.

 11. Pande: Chihanda chino cha alongi katamba kuchilinga kuli ndumbu wa lunga ngwe chize akulinga pande ja mbunga mu chikungulwila. Nyi yikuma ya pande jino yinakatuka ha apendice A ya kamukanda Zangenu Atu, longi katamba kusolola chize mutuhasa kuzachisa versu jize jili ha apendice mu mulimo wa kwambujola. Ngwe chilweza, iye katamba kulumbununa muze mutuzachisa chimwe chisoneko, ulumbunwiso wa chisoneko ni chize mutuhasa kulumbunwina mutu chisoneko chacho. Nyi chikuma cha pande chinakatuka ha kamukanda Zangenu Atu, longi katamba kulihulikila ha chize mutuhasa kukaula chikuma chacho mu mulimo wa kwambujola. Nyi muchilita, iye mahasa kukaula chilweza chize chinakatuka ha chikuma chitangu cha longeso hanji versu yikwo yize yinakatuka ha longeso liacho.

   12. Mushete: Yikuma yize yili ha paragrafu yino ni yize yinakaulaho yinatale ha yihanda “Chize Muhasa Kuputuka Lusango” ni “Kwasa Atu Azange Kukupanjika.” Nyi kukushi chikuma chikwo, yize longi atamba kulinga yili kulumbununa umwenemwene wa mu Mbimbiliya uze mazanga mutu yoze anahanjika nenyi ni kuhichika yimwe hanga akafune ni kumumeneka cheka. Longi katamba kusakula chikuma kulita ni yize yinalingiwa ku chihela kuze atwama. Iye mwe masakula nyi mazachisa umwe mukanda kukatuka mu Mushete wa Yikwata Yakulongesa Nayo hanji kusolola chinema. Alongi katamba kukolesa uhashi wo wakuhanjika, ha kuhanjika ni mbunge yeswe ni kusolola ngwo kakulihulumba hali mwenya-zuwo.

   13. Chize Muhasa Kulilulieka: Longi katamba kulilulieka kulita ni kuze ali. Ngwe chilweza:

1. (1) Kwambujola ku Zuwo ni Zuwo: Chihanda chino chinachingi kwambujola ku zuwo ni zuwo kupalikila ku telefone, kusoneka mikanda hanji kuhanjika meso ni meso ni mwenya-zuwo, ni kufuna ni kumeneka mutu yoze wahanjikile nenyi ha kwambujola ku zuwo ni zuwo.

2. (2) Kwambujola cha Susumuku: Chihanda chino chinachingi kuzachisa uhashi weswawo mutupwa nawo hanga twambujole kuli mutu yoze tunahanjika nenyi chikuma cheswacho. Chino chinachingi kuhanjika chimwe chikuma cha mu Mbimbiliya kuli waze mutuwana ku mulimo, ku shikola, ha mukala, mu mashinyi hanji ku chihela cheswacho kuze unalingi yimwe milimo ya tangwa ha tangwa.

3. (3) Kwambujola ha Mbunga: Chihanda chino chinachingi kwambujola ni temba, kwambujola ha yitanda, mu yipendo, ku yihela ya kuhehela ni ya kutulikila mashinyi hanji kweswako mutuhasa kuwana atu.

 14. Kuzachisa Yinema ni Mikanda: Kulita ni kuze ali, longi mahasa kusakula kusolola chinema hanji kuhana mikanda. Nyi chihanda cha longi chinachingi kusolola chinema hanji nyi longi mwene masakula kusolola chinema, iye mahasa kuchitongola ni kuchishimutwina, alioze katambile kuchisolola ku palku.

15. Hanyima lia kwimba mwaso, minutu 15 muyikaulaho, mukupwa chihanda chimuwika hanji yaali yize muyikwasa mandumbu hanga apwe ni kukaula Liji lia Zambi ku mwono wo. Kanji-kanji, pande ha chihanda chino mapwa ni kujilinga kuli makulwana hanji tuvumbi waze ajama, alioze pande ja yize yinafupiwa mu chikungulwila mapwa wika ni kujilinga kuli makulwana a mu chikungulwila. Nyi chihanda chino chili cha kushimutwina ni mbunga, ndumbu yoze unasongwela chihanda chacho mahasa kuhula yihula yikwo hi wika ko yihula yize yili ha mukanda. Maliji jenyi atangu katamba kupwa akehe hanga ahase kushimutwina yikuma yilemu ni kuhana mashimbu hanga mbunga ahanjike. Nyi chihanda chino chili ni kwihujola, waze mehujola katamba kuya ni kukumbulwila ku palku nyi muchilita.

  16. Longeso lia Mbimbiliya lia Chikungulwila: Minutu makumi atatu. Chihanda chino, katamba kuchilinga kuli mukulwana yoze wajama. (Nyi kunushi ni makulwana anji mu chikungulwila chenu, munuhasa kuzachisa tuvumbi waze ajama.) Chizavu cha makulwana che chatamba kutongola mandumbu waze masongwela Longeso lia Mbimbiliya lia Chikungulwila. Mandumbu waze masongwela longeso liacho, katamba kulisongwela kanawa kulita ni shimbu, ni kushindakenya kanawa ha yisoneko yize yinakwate ha longeso ni kukwasa mbunga hanga amone ulemu wa yikuma yili mu longeso liacho. Mba asongwele kanawa Longeso lia Mbimbiliya lia Chikungulwila, mandumbu katamba kukaula usongwelo wa kusongwela nawo yihanda ya kushimutwina ni mbunga. (w23.4 lifwo 24, mushete) Nyi hinwashimutwina yikuma yeswe ya longeso, kunwatambile kuwezela yikuma yikwo. Nyi muchilita, hita poso munuhasa kupwa ni kusa kasongo ni mukwa-kutanga mweka. Nyi kasongo wa Kukunguluka cha Mwono ni Mulimo Wetu mamba ngwenyi, longeso liacho katamba kulihihisa, ndumbu yoze unasongwela longeso mwe mamona chize mahasa kulihihisa. Iye hanji mahula wika yihula mu paragrafu jimwe chakuhona kujitanga.

17. Minutu yitatu. Kasongo wa Kukunguluka cha Mwono ni Mulimo Wetu, mahitulula yikuma yilemu yize nwalilongesa ha kukunguluka. Iye nawa katamba kutongola yikuma ya poso yize muyizaho. Nyi kuchili mashimbu, mahasa nawa kuvuluka majina ja mandumbu waze ali ni yihanda ha poso yacho. Nyi muchilita kutwa mutambi hanji kutanga yimwe mikanda, kasongo wa kukunguluka katamba kuzachisa maliji akuhwisa no, iye mecha kuchilinga nyi shina kuli usongwelo uze unakanjisa. Kunwatambile kutwa mitambi ya yuma yize twakulinga mashimbu eswe, ngwe ululikiso wa kuya mu munda, kukomba ni kupemesa ha Zuwo lia Wanangana. Sango ja yuma yino, nwatamba kujisa wika ha katalilo wa mitambi. Nyi kasongo mamona ngwenyi, kechi kuhasa kutwa mitambi ni kutanga mikanda yeswe mu shimbu lize atamba kuhanjika maliji akuhwisa no, iye katamba kwita mandumbu waze malinga pande ha chihanda Mwono wa Akwa-Kristu hanga ahihiseko pande jo. (Tala  paragrafu 16 ni  19.) Kukunguluka chatamba kuhwa ni mwaso ni kulemba.

18. Hanyima lia hita chihanda cha longi, kasongo wa Kukunguluka cha Mwono ni Mulimo Wetu kali ni munutu umuwika hanga asakwilile longi ni kumwaha fumbo lize linakatuka ha chikuma cha chihanda chize atambwile. Muze kasongo matambika longi, katambile kuvuluka chitangu chikuma cha fumbo lize anamutalila. Alioze, muze longi mahwisa chihanda chenyi, mamusakwilila ni kutongola chikuma cha fumbo lize akaula ni kulumbununa yize longi alinga kanawa hanji kumulumbunwina yize atamba kununga ni kululieka ha chikuma chacho. Kasongo mahasa nawa kuhana fumbo likwo ha yeswayo mamona ha chihanda chacho yize muyihasa kukwasa mbunga. Fumbo likwo lize linakatuka mu mukanda Zangenu Atu, Kulongesa hanji mu Beneficie-se, kasongo mahasa kulihana kuli longi hanyima lia kukunguluka hanji ha shimbu likwo, kulita ni chikuma chize amuhele chipwe ha chikuma chikwo nawa. Mba uwane usongwelo ukwo hakutwala kuli kasongo wa Kukunguluka cha Mwono ni Mulimo Wetu ni wa mukwa-kuhana fumbo, tala  paragrafu 19,  24 ni  25.

19. Eswe waze mahanjika pande, kuchingako lume ni kasongo wa Kukunguluka cha Mwono ni Mulimo Wetu katambile kulia mashimbu. Chipwe ngwe mukanda Mwono ni Mulimo Wetu unasolola shimbu lia hita chihanda, alioze kunwafupiwile kupalikisa mashimbu anji ha kulinga chimwe chihanda, chipwe kuweza yihula hanji maliji akwo mumu ngwo kuchili mashimbu nyi yikuma yeswe yilemu yapwa kulu kulumbununa. Mandumbu waze malia mashimbu katamba kwakwasa ha shimbu lieka kuli Kasongo wa Kukunguluka cha Mwono ni Mulimo Wetu hanji mukwa-kuhana fumbo. (Tala  paragrafu 24 ni  25.) Kukunguluka cheswe, kuchingako miaso ni kulemba, chatamba kulinga ola 1 ni minutu 45.

20. Muze chikungulwila machimeneka kuli kalayi wa mbonge, kukunguluka chatamba kupwa ngwe chize anachilulieka mu Mukanda Wakuzachisa ha Kukunguluka cha Mwono ni Mulimo Wetu ni kukaula usongwelo uno: Longeso lia Mbimbiliya lia Chikungulwila lize lia kupwa mu chihanda cha Mwono wa Akwa-Kristu, lie masalakanyisa ha pande ja mulimo ja minutu 30 ja kalayi wa mbonge. Shimbu kanda aputuka pande ja mulimo, kasongo wa Kukunguluka cha Mwono ni Mulimo Wetu, mahitulula hakehe yikuma yize mandumbu alilongesa, mamba yimwe yikuma ya kukunguluka cha poso muyizaho, matwa mitambi ni kutanga mikanda yize yinafupiwa, hanyima, mba masanyika kalayi wa mbonge. Muze pande ja mulimo mujihwa, kalayi wa mbonge mahwisa kukunguluka ni mwaso uze mwene asakula. Nyi mazanga, mwene mahasa kuhwisa ni kulemba chakasula hanji kusanyika ndumbu mweka hanga alembe. Ha poso ya kumeneka cha kalayi wa mbonge, kunwatambile kupwa nawa ni shikola jikwo mu limi lize akuzachisa mu chikungulwila chenu. Alioze, chizavu muchihasa tuhu kulikungulula ukawacho muze kalayi wa mbonge anameneka chikungulwila. Mba muze kalayi wa mbonge mahanjika pande ja mulimo, chizavu chacho chatamba kulichinga ni chikungulwila.

21. Ha poso ya kukunguluka cha mbonge hanji cha mambonge, kukuchi kupwa kukunguluka cha chikungulwila. Mandumbu mu chikungulwila katamba kweewulula hanga alilongese yikuma ya kukunguluka cha poso yacho ha longeso lio lia wika hanji lia mu usoko.

22. Nyi Chiwanyino cha Kwiwuluka Kufwa cha Yesu muchipwa mu kachi ka poso, kukuchi kupwa katalilo wa Kukunguluka cha Mwono ni Mulimo Wetu.

23. Mukulwana yoze atongola kuli chizavu cha makulwana mwe watamba kupwa kalayi wa Kukunguluka cha Mwono ni Mulimo Wetu. Iye mwe watamba kusa shindakenyo ngwe, kukunguluka cheswe chinende kanawa kulita ni usongwelo uze uli ha mukanda uno. Katamba nawa kukalakala hamuwika ni mukwa-kuhana fumbo. Muze Mukanda wakuzachisa ha Kukunguluka cha Mwono ni Mulimo Wetu muutuhuka, kalayi wa Kukunguluka cha Mwono ni Mulimo Wetu katamba kuhana pande ja tukweji aali kuli mandumbu eswe. Chiteli chino chinachingi pande jize hi ja alongi ko, ngwe kusakula ndumbu yoze masongwela kukunguluka mukachi ka poso hakachi ka mandumbu waze chizavu cha makulwana asakwile hanga apwe tusongo ni yihanda ya alongi. (Tala  paragrafu 3-16 ni  24.) Ha kuhana yihanda ya alongi, iye katamba kunyonga ha miaka yo, ha utotombo wo ni chize akuhanjika ndusu ha yihanda yize akutambula. Iye katamba kukaula nyonga lino muze anahane yihanda yikwo ya kukunguluka. Hita pande katamba kujihana kuli mandumbu muze hikwasala poso chipwe jitatu. Papilo lia pande ja Kukunguluka cha Mwono Wetu ni Mulimo Wetu (S-89) he haze atamba kusoneka pande jize mahana kuli alongi. Kalayi wa kukunguluka cha mwono ni mulimo wetu katamba kusa shindakenyo hanga katalilo wa kukunguluka cheswe apwe kusa ha chihela cha mitambi. Chizavu cha makulwana muchihasa kutongola mukulwana hanji kavumbi hanga amukwase mu mulimo wacho. Alioze, makulwana wika e atamba kuzachisa hanga ahane yihanda kuli mandumbu yize hi ya alongi ko.

24. Hita poso, mukulwana umuwika mwe mapwa kasongo wa Kukunguluka cha Mwono ni Mulimo Wetu. (Nyi kunushi ni makulwana anji mu chikungulwila chenu, munuhasa kuzachisa tuvumbi waze ajama.) Iye mwe uli ni chiteli cha kululieka maliji akuputuka no kukunguluka ni maliji akuhwisa no. Iye mwe mapwa nawa ni kusanyika waze mahanjika pande jeswe. Ha poso yize mapwa kasongo, neye mahasa kuhanjika jimwe pande kulita ni kwoka cha makulwana mu chikungulwila, chipi-chipi yihanda yize masolola wika chinema chakuhona kuhanjika yuma yikwo. Katamba kuhanjika hakehe wika hanyima lia hita pande. Chizavu cha makulwana che chatamba kutongola makulwana ajama waze mapwa tusongo ha kukunguluka. Makulwana jacho e mapwa ni kusa ngwe tusongo ha hita poso. Alioze, kulita ni chize chikungulwila chenu chili, kalayi wa Kukunguluka cha Mwono ni Mulimo Wetu, mwe watamba kupwa kasongo yisuho yinji kuhiana makulwana akwo waze ajama. Makulwana waze munusakula hanga apwe ni kusongwela Longeso lia Mbimbiliya lia Chikungulwila, mahasa nawa kupwa tusongo a kukunguluka. Alioze iwulukenu ngwenu, mukulwana yoze mapwa kasongo, katamba kukolweza mandumbu ni zango ni kuhana fumbo lialita lize linafupiwa kuli waze malinga pande ja alongi. Kasongo mwe watamba nawa kusa shindakenyo hanga kukunguluka chihwe ha shimbu lialita. (Tala  paragrafu 17 ni  19.) Nyi kasongo mazanga, nawa nyi ha palku hali chihela chinene, munuhasa kumusela microfone ya ukawenyi hanga chipwe chashi kusanyika hita ndumbu yoze uli ni chihanda. Chino muchikwasa ndumbu yoze malinga pande, aliange kuya ku palku ni kumululiekela microfone. Kasongo mahasa nawa kutwama ku meza yili ha palku muze longi malinga pande ja Kutanga Mbimbiliya ni muze mukupwa chihanda Likolweze Chinji mu Munda. Chino muchikwasa kufunga mashimbu.

25. Nyi muchilita, zachisenu mukulwana yoze wajama chinji mukachi kenu hanga alinge mulimo wacho. Mukwa-kuhana fumbo kali ni mulimo wa kuhana fumbo kusesa kuli tuvumbi ni makulwana ha yihanda yeswayo malinga, yino yinachingi kuhanjika pande ha Kukunguluka cha Mwono ni Mulimo Wetu, pande ja mbunga, ni waze masongwela hanji matanga longeso lia Kaposhi wa Kutalila ni Longeso lia Mbimbiliya lia Chikungulwila. (Tala  paragrafu 19.) Nyi nuli ni makulwana anji mu chikungulwila chenu waze ajama nawa akulongesa kanawa, hita mwaka munupwa ni kusa mukulwana mweka hanga apwe mukwa-kuhana fumbo. Ndumbu wacho kafupiwile kuhana fumbo ha hita pande jize mandumbu mahanjika mu chikungulwila.

26. Chikungulwila muchihasa kupwa ni shikola jikwo ja alongi nyi nuli ni alongi anji. Hita shikola yatamba kupwa ni kasongo yoze wajama, nyi muchilita, katamba kupwa mukulwana. Nyi kunushi ni makulwana anji, tuvumbi ajama mahasa kulinga mulimo wacho. Chizavu cha makulwana che chatamba kutongola waze mahasa kulinga mulimo wacho ni kumona nyi mandumbu jacho katamba kupwa ni kulisalakana-salakana. Kasongo katamba kukaula usongwelo uli mu  paragrafu 18. Nyi nuli ni shikola yamuchiali, nwatamba kulweza alongi aye mu shikola yacho muze chihanda cha Kuhengwola Yikuma Yilemu ya mu Mbimbiliya muchihwa. Ayo katamba kufuna muze longi wa kasula mahwisa chihanda chenyi.

27. Kuli yinema yimwe yize yakupwa kusakula hanga tuyitale ha kukunguluka chino. Yinema ya kukunguluka cha mukachi ka poso muyipwa ni kusoloka mu JW Library® hanga chipwe chashi kuyitalila mu chisaji cheswacho.

© 2023 Watch Tower Bible and Tract Society of Pennsylvania

S-38-CK 11/23