Ha tangwa 8 lia Janeiro, 2025, Chota cha usopeselo cha mu mbonge ya Mary, chapatwilile ndumbu Arslan Vepayev, miaka yaali ya kulinga mililmo yikalu mumu lia kulituna mulimo wa uswalale. Ndumbu Arslan Vepayev muze amupatwilile te kali ni miaka 21. Chipwe ngwe ndumbu Arslan kamutusula mu zuwo lia ususu, nihindu hakupalika cha miaka yaali iye mapwa ni kufweta kuli nguvulu, por cento 20 ha mbombo jize mapwa ni kutambula ku mulimo wenyi.

Muze ndumbu Arslan amusanyikine hanga alinge mulimo wa uswalale ku uputukilo 2024, iye yaya ku chipatulo kuze akulingila mulimo wacho ni kulumbununa nyonga lienyi hakutwala ku chikuma chacho. Iye yaalumbunwina nawa ngwo, te mahasa kulinga mulimo weka uze kuwatalile ha uswalale. Chipwe chocho, nguvulu yamupatwila ngwo kanalimika ni shimbi. Ha Novembro 2024, Arslan yamusa mu zuwo lia ususu muze te anashimbwila tangwa lia kumusopesa. Chocho ha Dezembro wa 2024, Chota cha Usopeselo cha mu mbonge ya Bayramaly yichimupawila miaka yaali mu zuwo lia ususu mumu lia kulituna kulinga mulimo wa uswalale. Kawashi-washi, Arslan yeta ukwaso ku Chota chikwo hanga atale ha mulonga wenyi ni kwalumuna chiyulo chize chakwachile. Hachino, yamupatwila miaka yaali yakulinga milimo yikalu.

Chino chili chisuho chitangu chize nguvulu wa Turcomenistão anapatwila umwe chela cha Yehova miaka 4 mu zuwo lia ususu mumu lia kulituna mulimo wa uswalale. Ha Maio 2021, nguvulu kanakatusula mu zuwo lia ususu Yela ja Yehova waze alitunyine mulimo wa uswalale. Haliapwila mandumbu jetu ku Turcomenistão kali ni utuswilo wa kulituna mulimo wa uswalale chakuhona kwapinjisa. Yize yalingiwa kuli ndumbu Arslan yakwasa nguvulu alumune susumuku nyonga lienyi ha chikuma chacho. Kuchizako mulonga wa ndumbu Arslan, milonga yize asumanga mandumbu 12 neyo kanayihengwola mu chota.

Tunanungu ni kulembelako ndumbu Arslan ni mandumbu jetu akwo akweze ku Turcomenistão hanga ajikijile muli Yehova ngwo “keshi kwehuka asandu jenyi.”—Samu 37:28.