6 MAIO, 2024
RÚSSIA

“ Yehova Mahasa Kutukwasa Kukumba Kapinda Mweswawo”

KWAZULULA

Chota cha usopelo cha Khorolskiy mu tungu lia Primorye, chapatwilanga ndumbu Boris Andreyev, Anatoliy Li ni ndumbu wa pwo Nataliya Sharapova

Sango ja

Boris Andreyev

Kasemukine ha: 1951 (Monastyrishche, mu tungu lia Primorye)

Yize yalingiwile ku mwono wenyi: Kapwile ni kukalakala mu chizavu cha waze akutala yuma ya emergência.

Muze awanyine makumbululo a yihula yenyi mu Mbimbiliya, yapwa ni shindakenyo ngwenyi kawana umwenemwene. Kamupapachishile ha 2004

Kalimbachile ni Aleksandra ha 2020

Maliji ja pwo lia Boris, Aleksandra a

Kuchi mukwenu lunga akukukwasa kunyongonona mu yipikalo yino?

Nguneuluka limwe tangwa yuma yapwile yikalu chinji kuli yami muze Boris amusele mu zuwo lia ususu. Nahongele chinji ku manyonga; chocho yinguputuka kulila. Nasonekenene Boris ni kumulweza yize yalingiwileko ni chize te ngunalivu. Ha kumbululo lize anguhele yangulweza ngwenyi kananyingika yize ngunapalika. Alioze chuma chilemu chize angwiulwile, chapwile yipikalo yeswe yize twapalikile ni kuyikumba hamuwika ni ukwaso wa Yehova. Wano kapwile maliji waze te ngunafupu hanga ngupwe ni shindakenyo ngwami, Yehova kechi keza katwehuka nilimwe tangwa.

Anatoliy Li

Kasemukine ha: 1985 (Uzbequistão)

Yize yalingiwile ku mwono wenyi: Te kakuya mu mayingeleja anji, alioze kapwile nawa ni yihula yinji yize te akufupa kuwana makumbululo. Yaputuka kulilongesa Mbimbiliya ni Yela ja Yehova, yawahilila chinji ha kunyingika umwenemwene. Kamupapachishile ha 2010

Kalimbachile ni Raisa ha 2011

Maliji ja Raisa, b pwo lia Anatoliy

Kuchi yena ni mukwenu lunga nwakumona ukwaso wa Yehova?

Ha kupalika cha mashimbu akehe muze te hamusa mu zuwo lia ususu, Anatoliy yangulweza chize chapwile chikalu kuli iye kutayiza nyonga lia kunguhichika ukawami. Shimbu te kanda achimusa mu zuwo lia ususu, twapwile ni kupalikisa mashimbu anji hamuwika matangwa eswe, ni kulinga yuma ya ku ufulielo. Alioze kulipikala chenyi chatepulukile muze amwene chize Yehova kupalikila muli mandumbu, apwile ni kungukwasa ha kungwaha yuma yeswe yize te ngunafupu. Twakumona chize Yehova akulihulumba hali yetu, nawa kechi keza katwehuka nilimwe tangwa.

Nataliya Sharapova

Kasemukine ha: 1972 (Cazaquistão)

Yize yalingiwile ku mwono wenyi: Kaputukile kulilongesa Mbimbiliya ni Yela ja Yehova ha 1995. Yapwa ni shindakenyo ngwenyi Mbimbilliya yili Liji lia Zambi. Kamupapachishile ha 2012

Maliji ja Nina, c Naye ya Nataliya

Yika yinakwase Nataliya kununga ni kupwa ni manyonga alita muze ali mu zuwo lia ususu?

Mwanami kanapalika mu kapinda munji mu zuwo lia ususu. Mwakupwa chishika chinji. Kuchizako yino, iye kakwivwavwa mutwe yikola. Ha mashimbu amwe kakunenganyana, alioze kali ni shindakenyo ngwenyi, Yehova kananyingika yuma yeswe. Iye yamba ngwenyi: “Ngunanyingika ngwami, chichi kununga muno ku miaka yeswe. Yehova kakungukwasa kulihumikiza, kashika ngunazange kushimbwila.” Yipikalo, yinakwase Nataliya kukundama chinji kuli Yehova. Iye kakulivwa ngwe Yehova kanamukangayika.

Ngwe chizechene Yehova akukumbulula yilemba ya Anatoliy, Boris ni Nataliya, ni yetu tuli shindakenyo ngwetu, iye manunga ni kukumbulula yilemba yetu ha matangwa wano a lamba ni kutwaha tachi hanga tunyongonone.—Samu 20:1

Katalilo wa Mashimbu

28 Julho, 2022

Yaputuka kutala ha mulonga wo
6 Outubro, 2022

Yahengwola mazuwo kumi ni aali mu chihunda cha Yaroslavsky. Boris ni Nataliya yaatwala mu zuwo lia ususu ha mashimbu akehe
7 Outubro, 2022

Boris ni Nataliya yaatutulula mu zuwo lia ususu likwo ha mashimbu akehe
12 Outubro, 2022

Anatoliy yamusa mu zuwo lia ususu ha mashimbu akehe
13 Outubro, 2022

Anatoliy yamututulula mu zuwo lia ususu likwo
5 Outubro, 2023

Yaputuka kwasopesa

a b c Muze te analulieka chikuma chino, Ndumbu Andreyev, Ndumbu Li, ni Ndumbu Sharapova kapwanga mu zuwo lia ususu, kashika twahashile kuhanjika no

SANGO ANATUHWISA