27 DEZEMBRO, 2023
RÚSSIA

Mandumbu Kanungine ni Nyonga Lialita Chipwe Ngwe Kapwile ni Kwatwala mu Mazuwo a Ususu

KWAZULULA

Chota cha usopelo cha ku Oktyabrskiy, Irkutsk kwasala hakehe muchihanjika ha chiyulo chize akwata chinatale hali ndumbu Nikolay Martynov, Sergey Kosteyev, Yaroslav Kalin, Mikhail Moysh, Igor Popov, Denis Sarazhakov, Aleksey Solnechniy, Andrey Tolmachev ni Sergey Vasiliyev.

Sango ja

Nikolay Martynov

Kasemukine ha: 1958 (Bandarka, região ya Irkutsk)

Yize yalingiwile ku mwono wenyi: Kapwile ni kukalakala ngwe chofele

Kalimbachile ni Irina ha 1982. Ayo kali ni ana aali

Irina kaputukile kulilongesa ni Yela ja Yehova ha 1997. Umanunuko wa uprofeto wa mu Mbimbiliya wahanyine shindakenyo kuli Nikolay hanga atayize umwenemwene. Ayo aali kaapapachishile ha 1998.

Maliji ja pwo lia Nikolay, Irina a

Yika yakukwasa mukwenu-lunga kununga ni kupwa ni nyonga lialita chipwe ngwe kali mu zuwo lia ususu kuhiana miaka yaali?

Nikolay kali ni katalilo mupema wa kutanga Mbimbiliya ni kupukuna ha yize akutanga. Iye kanji-kanji, kakulihulikila ha chize Yehova akukumbulula yilemba yenyi. Alioze kutuhandununa nenyi chinapu chikalu chinji kuli yetu. Nikolay kali lunga, nawa tata mupema. Kuhona kutukwasa ngwe chize apwile ni kulinga kunyima chakupwa chikalu kuli iye. Alioze muze twakumulweza chize Yehova akutukwasa kupalikila muli mandumbu, chino chakumukwasa kulihumikiza ni kupwa ni sambukila. Chuma chimwe chakumukwasa kunyongonona, chili kunyonga usoko wetu uli hamuwika mu chifuchi chaha. Iye hananyongo kulu zuwo lietu lize mutukatunga ni mihuko yize mutukatumba.

Yaroslav Kalin

Kasemukine ha: 1969 (Pivovarikha Irkutsk)

Yize yalingiwile ku mwono wenyi: Kamulelele mu usoko wa Yela ja Yehova. Yisemi jenyi ni akako kapwile mu chilombo ku Sibéria ha 1951

Te kakukalakala ngwe mukwa-kululieka TV ni yisaji

Kamupapachishile ha 1987

Kalimbachile ni Tatyana ha 1991. Kapwile ni ana aali ha malunga, aali a mapwo. Mwano wa kasula-songo kafwile ha 2007

Maliji ja pwo lia Yaroslav, Tatyana b

Yipikalo yika mukwenu-lunga anapalika mu zuwo lia ususu, nawa yika yinamukwasa kununga ni kunyongonona?

Kutwama miaka yaali mu zuwo lia ususu, chinapu chikalu chinji kuli iye. Iye kakuzanga kupwa hamwe ni atu ni kuhanjika no. Kupwa ukawenyi, chakumutwala asakalale, alivwe ukawenyi ni kuhonga ku mujimba. Alioze, kakusa tachi hanga akumbe ulelu wenyi ha kuhona kulihulikila hali mwene. Ha mikanda yize akusoneka, kanji-kanji kakutongola mukanda wa A-Kolosu 1:11 wakwamba ngwo: “Twakwita nawa anutakamise ni ndundo jeswe kulita ni ndundo jenyi ja uhenya, hanga nuhase kunyongonona kanawa ni uhomboloji ni uwahililo.” Ngunanyingika ngwami, Yaroslav kali ni shindakenyo ngwo, mba amuwahise kuli Yehova, iye katamba kununga ni kulinga upale wenyi haliapwila ndo ku miaka yeswe.

Mikhail Moysh

Kasemukine ha: 1987 (Ucrânia)

Yize yalingiwile ku mwono wenyi: Kapwile ni kukalakala ku mulimo wa kutunga mazuwo ni kulanjisa yuma

Kalimbachile ni Yelena ha 2009. Ayo kali ni ana aali

Yelena kamupapachishile ha 2010. Mikhail yaputuka kuya ni kukunguluka hamwe ni mukwo-pwo. Iye kamupapachishile ha 2016

Maliji ja pwo lia Mikhail, Yelena c

Kuchi Mikhail anungine ni kukwasa yena ni anenu nukolese ufulielo wenu chipwe ngwe kali mu zuwo lia ususu ha miaka kuhiana yaali?

Mwanetu wa mukulwana kali ni miaka 12. Mwanetu wa kasula haliapwila kali ni miaka yaali ni ndambu. Kapwile wika ni tukweji asambano muze Mikhail amusele mu zuwo lia ususu. Iye keshi kunyingika mumu liaka tato katwamine ku zuwo. Ana eswe kakumuvwila usona unji. Alioze Mikhail kakwasonekena mikanda mashimbu eswe, kwatumina poema, kwalongesa hakutwala ku tushitu, ni tujila, kwatumina maliji a yiheho, ni kwaha yimwe milimo yize mahasa kuhengwola. Iye nawa mashimbu eswe kakungukwasa muze nakuhona utakamiso. Tangwa limwe, namuhulile ngwami: ‘Mumu liaka yino yinalingiwa wika mu usoko wetu?’ Ha mukanda wenyi umwe, Mikhail yangwiwulula ngwenyi, chihula chami kuchalumbunukine ngwo nguli ni ufulielo ukehe kuli Yehova. Iye yasoneka ngwenyi: “Chuma chilemu chili yize mutulinga ha manyonga waze tuli no. Chizechene ngwe Yombi, nyi mututayiza fumbo lia Yehova hanga lisongwele manyonga yetu, iye matukwasa tukolese cheka ufulielo wetu ni kupwa ni manyonga alita.” Pundu lume, mukanda wacho wangutakamishine.

Igor Popov

Kasemukine ha: 1987 (Cazaquistão)

Yize yalingiwile ku mwono wenyi: Kali umwe wa kuli ana nake. Tato kafwile muze te Igor ali ni miaka 11

Te kakutunga mazuwo ni kusa milonda ya maya

Muze tato afwile, naye ya Igor ni yayo yaputuka kulilongesa Mbimbiliya. Igor neye yaputuka kulilongesa Mbimbiliya, chocho yazanga chinji hakutwala ku uhindukilo. Igor kamupapachishile ha 2006 hamwe ni asoko akwo shimbiali

Kalimbachile ni Mangira ha 2013

Maliji ja pwo lia Igor, Mangira d

Versu jika ja mu Mbimbiliya jakukwasa yena ni mukwenu-lunga kwijilila ni mashimbu wano akalu?

Igor katambile kupalikisa mashimbu anji ni ukawenyi. Ha mukanda wenyi umwe, yatongola Samu 118:5, yakwamba ngwo: ‘Mu luyinda wami natambikile kuli Yehova, mba Yehova yangukumbulula; yangusa mu chihela cha ufunge.’ Igor yasoneka ngwenyi: “Chihela chino cha ufunge muchihasa kulumbunuka ‘chihela chinene.’ Muze kutushi kuhasa kwehuka manyonga waze akutuhongesa, Yehova mahasa kukumbulula yilemba yetu hanga tulivwe kanawa ni kutwaha sambukila ya ku mbunge yize muyitukwasa kulivwa kanawa ku manyonga.” Ha yuma yino yeswe twapalika, katwiwula mashimbu eswe ngwo, Yehova nihindu mawana jila ya kutukwashilamo nawa ngwo, kechi keza katwehuka nilimwe tangwa chipwe mutupwa ku chihela cheswacho.

Denis Sarazhakov

Kasemukine ha: 1988 (Sayanogorsk República da Cacássia)

Yize yalingiwile ku mwono wenyi: Te kakukalakala ku mulimo wa kumwanga sango

Kamulelele ngwe Chela cha Yehova. Yisemi jenyi kamukwashile kulemesa yuma ya ku ufulielo. Kapwile ni shindakenyo ngwenyi, mayuka chinji nyi matwama kulita ni shimbi ja mu Mbimbiliya. Kamupapachishile ha 2004

Kalimbachile ni Olesiya ha 2007

Maliji ja pwo lia Denis, Olesiya e

Kuchi Denis akuhasa kukutakamisa?

Yami ni Denis, kanji-kanji twakuhanjika kupalikila mu mikanda. Kakutwecha hanga tuhanjike ku telefone kamuwika ha poso ha minutu yitano. Chikwo nawa, nakumumeneka kaali ha kakweji ni kuhanjika nenyi ha ola yimuwika. Chipwe muze nakuya ni kumumeneka, twakuhanjika ku telefone ni kulimwena wika ha kapenda wa katalilo. Hita shimbu twakuhanjika, Denis kakulianyina ni yami limwe nyonga lia mu Mbimbiliya. Kakungwiwulula ngwo, kutwatambile kulimona ngwe atu waze keshi kutalatala. Tuli ni yuma yinji yize muyitwaha uwahilila ha yize tunalingi. Kapinda yono katuzeyesele. Kwamba umwenemwene, katukwasa kujama chinji ku ufulielo.

Aleksey Solnechniy

Kasemukine ha: 1976 (Abakan, território ya Krasnoyarsk)

Yize yalingiwile ku mwono wenyi: Te kakukalakala ku yuma ya kahia ka zembwe

Naye ni mwanako wa pwo, kaputukile kulilongesa Mbimbiliya ni Yela ja Yehova muze Aleksey te uchili ku uswalale. Muze afunyine ku zuwo, yazanga chinji malongeso a Mbimbiliya, chocho neye yaputuka kulilongesa. Kamupapachishile ha 2004

Kalimbachile ni Alyona ha 2011

Maliji ja pwo lia Aleksey, Alyona f

Yika yakukwasa mukwenu-lunga kupwa ni nyonga lialita chipwe ngwe kali mu zuwo lia ususu?

Aleksey kakulemba mashimbu eswe hanga ewuluke ngwo, Yehova kanawahilila hali iye. Chikwo nawa, kakusa tachi hanga ewuluke ngwenyi manguvulu ni atu eswe waze akukalakala mu zuwo lia ususu, kanalingi wika mulimo wo. Chino chakumukwasa kulihulikila ha uhashi uze ali nawo wa kukalila jina lia Yehova shimbu alihulikile hali mwene ni ha yipikalo yenyi. Chipwe ngwe kakunguvwila usona, ni kuvwila nawa usona asoko ni masepa jenyi, Aleksey nihindu machinunga ni kupwa ni nyonga lialita ni kusehejela.

Chipwe ngwe kaahandununa ni asoko jo ha amwe mashimbu, nihindu tuli ni shindakenyo ngwetu, nyi mandumbu jetu manunga ni kushishika kukushi chuma nichimwe chize muchihasa kwahandununa ni Zambi.—A-Roma 8:35-39.

Katalilo wa mashimbu

4 Outubro, 2021

Kuhengwola mazuwo ja Yela ja Yehova mu mbonge ya Irkutsk. Yaputuka kupatwila Nikolay, Sergey Kosteyev, Yaroslav, Mikhail, Aleksey, Andrey ni Sergey Vasiliyev. Mandumbu eswe shimbiali yasa mu zuwo lia ususu
5 Outubro, 2021

Yaroslav, Mikhail, ni Aleksey kaasele mu zuwo lia ususu ha mashimbu akehe
6 Outubro, 2021

Sergey Kosteyev, Nikolay ni Andrey katwalile mu zuwo lia ususu ha mashimbu akehe. Sergey Vasiliyev kamuchijile mu zuwo lia ususu ni kumufunyisa ku zuwo lienyi, alioze katambile kukatukako
30 Novembro, 2021

Kuhengwola mu mazuwo ja Yela ja Yehova. Denis ni Igor kaasele mu zuwo lia ususu ni kwatwala ku Irkutsk haze hatwama kilometro kuhiana 1500
1 Dezembro, 2021

Igor yamutwala ku limwe zuwo lia ususu ha mashimbu akehe
2 Dezembro, 2021

Denis yamutwala ku limwe zuwo lia ususu ha mashimbu akehe
29 Dezembro, 2022

Uputukilo wa usopeso

a b c d e f Martynov, Kalin, Moysh, Popov, Sarazhakov ni Solnechniy muze mandumbu wano apwile mu zuwo lia ususu chapwile chashi kuhanjika no.

SANGO ANATUHWISA