14 DEZEMBRO, 2023
RÚSSIA

“Kujikijila Muli Yehova che Chuma Chilemu Kulinga”

KWAZULULA

Chota cha usopelo cha ku Samarskiy, Samara chapatwilanga ndumbu Aram Danielyan, Denis Kuzyanin, Sergey Polosenko ni Nikolay Vasiliyev ni kwasa mu zuwo lia ususu.

Sango ja

Aram Danielyan

Kasemukine ha: 1990 (Armênia)

Yize yalingiwile ku mwono wenyi: Usoko wenyi walukilile ku Rússia muze apwile ni tukweji asambano

Kapwile ni kukalakala ku mulimo wa kutunga ni kulanda yuma

Kalilongesele Mbimbiliya ni tato-pwo ni naye. Kumona chize yilemba yenyi apwile ni kuyikumbulula chamukwashile kuzanga chinji Yehova. Kamupapachishile ha 2011

Kalimbachile ni Elina ha 2017. Ayo kali ni mwana umuwika

Maliji jenyi

Yika yakukukwasa uhone kunenganyana?

Ha mashimbu amwe, nakunenganyana chinjii mumu lia yize ngunapalika. Alioze muze chino chakulingiwa, nakwiuluka ngwami nasakwile kupwa kavumbi ka Yehova. Nyi mungwecha kuwayila Yehova hanga achine kunguhungumiona kachi mwono wami te kuchi muupwa? Ngunawahilila chinji ha kunyingika ngwami, ngunakwase mulimo wa kupwisa jina lia Yehova lisandu ni kulinyingikisa kuli atu. Ngunazange kusolola kuli Satana ngwami, chichi kwecha kuwayila Yehova chipwe ngwe mangusa mu zuwo lia ususu hanji kungushiha.

Denis Kuzyanin

Kasemukine ha: 1984 (Norilsk, Krasnoyarsk)

Yize yalingiwile ku mwono wenyi: Kapwile ni milimo yenyi

Denis hamwe ni naye kaputukile kulilongesa Mbimbiliya ni Yela ja Yehova muze iye apwile ni miaka kumi. Kamupapachishile ha 2001

Kalimbachile ni Yelena ha 2012. Ayo kali ni mwana umuwika wa pwo

Maliji jenyi

Lusango muka wa mu Mbimbiliya yoze wakukwashile kupwa ni nyonga lialita hakutwala ku yipikalo ye?

Mukanda wa Yombi uli ni ulumbunwiso walipwila kuli yami. Kuputuka ha kapitulu 38, Yehova yashimutwina ni Yombi ni kumulweza ndundo jenyi jize atangile najo yuma yeswe yize yatwamako. Kupukuna ha yize Yehova hanalingi ni ha yize makalinga kulutwe, chakungukwasa kumona ngwami, chuma chilemu chize natamba kulinga chili kwononokena Yehova. Nyi nguli ni utayizo wenyi, kunanyingika ngwami mangukwasa chipwe muze mukusoloka kapinda mweswawo.

Sergey Polosenko

Kasemukine ha: 1968 (Uzbequistão)

Yize yalingiwile ku mwono wenyi: Kapwile ni kukalakala ngwe kasongo mu chihela cha kululikila kambu

Kalimbachile ni Lydia ha 1993

Kakolelele mu usoko wa Yela ja Yehova, yamupapachisa ha 1982

Maliji jenyi

Usepa we ni Yehova kuchi wapwile muze wapwile mu zuwo lia ususu?

Ha mashimbu waze napwile mu zuwo lia ususu, te chichi kuhasa kwalumuna yuma yize yinalingiwako. Napwile wika ni Yehova mu chihela chacho. Namwene Yehova ngwe kafunga kami, chikwashi kanda sepa liami. Nanyingikine ngwami, Yehova kali ni yami mashimbu eswe. Muze twakupwa ni usepa wa mutapu au ni Yehova, twakupwa ni manyonga apema a ufunge ni ujikijilo. Chipwe muze yuma yakwalumuka ku mwono wami, nihindu Yehova kakununga ni kungusolwela yitanga yaha ya utu wenyi. Nakumusakwilila chinji ha ukwaso uno.

Nikolay Vasiliyev

Kasemukine ha: 1984 (Aisha, República do Tartaristão)

Yize yalingiwile ku mwono wenyi: Te kakukalakala ngwe programador

Te keshi kufuliela muli Zambi. Alioze muze alilongesele Mbimbiliya ni kunyingika malongeso jamo, yatayiza ngwo Zambi kwatwama. Kamupapachishile ha 2005

Maliji jenyi

Yika yakukukwasa kununga ni kupwa ni nyonga lialita?

Muze te kanda nguchiya mu zuwo lia ususu, napwile ni kwivwa woma unji. Kunyingika chize kupwa mu zuwo lia ususu chapwa ni chize Yehova angukwashile, woma uze napwile ni kwivwa hiwahwa. Chipwe ngwe chili chikalu kunyingika mashimbu waze usopeso muulinga hanji chiyulo cha kasula chize makwata, nihindu ngunanyingika ngwami Yehova manunga sali liami. Kufuliela muli Yehova che muchitukwasa kupwa ni sambukila ku manyonga ni kutwaha shindakenyo ngwetu, yuma yeswe muyenda kanawa.

Tuli ni shindakenyo ngwetu, Yehova manunga ni kutakamisa waze eswe anahungumiona mumu lia ufulielo wo ‘ni kwatakamisa ni yitanga yeswe yipema ni maliji.’—2 A-Tesalonika 2:16, 17.

Katalilo wa mashimbu

14 Dezembro, 2021

Yatala ha chikuma cha Denis, Nikolay ni Sergey ni kwahisa
15 Dezembro, 2021

Kuhengwola mu zuwo lia Denis, Nikolay ni Sergey. Yatwala mu zuwo lia ususu ha mashimbu akehe
16 Dezembro, 2021

Denis, Nikolay ni Sergey katutulwile mu zuwo lia ususu lize apwile ni kwatwala mu likwo atwamemo ha mashimbu akehe
6 Janeiro, 2022

Yatala ha chikuma cha Aram ni kumuhisa. Kamukwachile muze te ali ku chipalo cha ndeke ni kumusa mu zuwo lia ususu
7 Janeiro, 2022

Aram yamutwala mu zuwo lia ususu ha mashimbu akehe
12-14 Dezembro, 2022

Mandumbu eswe awana katuswile mu zuwo lia ususu ni kwakanjisa hanga ahone kulinga wenyi
16 Junho, 2023

Yaputuka kwasopesa

SANGO ANATUHWISA