Ha mwaka 2023, mutango utangu wa Malauí, wakumbanyisa miaka 75 chize haze autungile mu Blantire ha 1948.

Chitangu mutango wa África do Sul wapwile ni kusongwela mulimo wa Yela ja Yehova mu Malauí. Kukatuka ha miaka 1930 mandumbu yaputuka kwoka chinji mu Malauí waze apwile wika 28 ha 1934, haliapwila kali 5.600 chize ha 1948. Mumu lia kwoka cha Yela ja Yehova mutango utangu wapwile kwazulula ha 1 Setembro ya 1948 mu limwe zuwo likehe liakulukala mu Blantire. Mutango uno wanungine ndo haze atungilile mutango waha ha 1958.

Ha kupalika cha miaka yikehe wika muze te kanda achikumbanyisa miaka kumi, nguvulu wa Malauí yakanjisa mulimo wa Yela ja Yehova. Mumu lia chino, zuwo lia mutangu lize mandumbu apwile ni kukalakalila yalitambula. Chipwe chocho, mandumbu waze apwile ni kusongwela mulimo mu Malauí yanunga ni kululieka mulimo wa kwambujola ni kufunga mandumbu mu chifuchi chacho cheswe. Miaka 26 yize yakawile, Yela ja Yehova yanunga ni kupalika mu yihungumiona yinji ni kwambufula chikolo mumu lia kuhona kulinjisa mu yuma ya mafwefwe. Ha mashimbu jacho, mandumbu jetu yaasa mu mazuwo a ususu ni kwamwesa lamba ndo ku kufwa. Mandumbu amwe yachinyina mu yifuchi yize yapwile hakamwihi, kuchinga ko Moçambique, Zâmbia ni Zimbábue.

Ha 12 ya Agosto ya 1993, ukanjiso yiuhwa. Ha miaka yaali yize yahachileho mandumbu a mu Zâmbia waze te akusongwela mu Malauí ha mashimbu a ukanjiso yakwasa kululika mulimo. Chocho mandumbu yalanda mazuwo aali mu mbonge ya Lilongwe hanga atunge mutango waha wa Malauí. Ha 1994 Chizavu cha Tusongo yichitayiza afupe chihela hanga atunge Mbetele yaha. Mutango wacho kaukunjikile kuli Yehova ha 19 ya Maio 2001, ha kukunguluka chacho hapwile mandumbu kuhiana 2 mil. Anji a kuli mandumbu jacho kanyongonwene mu yihungumiona ha miaka yinji. Ndumbu Trophim Nsomba, yoze wakalakalile ngwe kalayi wa mbonge ha mashimbu a ukanjiso, neye kapwile hakachi ka mandumbu jacho ha kukunjika cha mutango wacho. Muze amwene mutango waha ni kukola cha ku ufulielo cha mandumbu mu Malauí, iye yamba ngwenyi: “Yiwape yino ya Yehova yili upite unene wa ku ufulielo kuli yami ni mukwetu-pwo, chili ngwe chilota!”

Musono, mu Malauí muli yikungulwila 1,924 muze muli mandumbu 109,000. Hali mandumbu jacho, 225 kakukalakala ku Mbetele mu Malauí yize yili mu Lilongwe muze akulumbununa mikanda mu malimi shimbiali.

Yetu twakulemba hanga Yehova anunge ni kuwayisa mandumbu jetu a zango a malunga ni mapwo mu Malauí akulisolola ngwe tuvumbi twa Zambi, ha kunyongonona mu yeseko ha miaka yinji.—2 A-Korindu 6:4.