Ha 1 Novembro, 2023 ndo 31 Janeiro 2024 Yela ja Yehova kuhiana 19,000 kalinganga kwambujola chalipwila mu Bolívia ni mu Colômbia. Ha mashimbu jacho sango ja mu Mbimbiliya jize jakuhana kutalatala, kajambujolanga mu Espanhol ni mu malimi akwo 18, hamwe ni limi lia tunaye lia Bolívia ni lia Colômbia.

Ndumbu umwe yoze wakuhanjika Espanhol watwama mu Guadalupe, Colômbia, kakomokene muze umwe pwo azulwile pito ni kwamba ngwenyi: “Yetu te yenu tunashimbwila.” Pwo yalumbununa ngwenyi, hikwapalika mashimbu akehe wika muze te iye ni mukwo-lunga anahanjika ha chikuma cha yiwanyino yimwe ya ma-yingeleja hanga amone nyi katamba kulinga yiwanyi yacho nyi ka. Mukwo-lunga yamba ngwenyi, kamwene mandumbu mambujola kuli enyembo jo. Chocho yashimbwila ngwo, mandumbu jacho maheta nawa ku zuwo lio hanga aakumbulule chihula cho. Mandumbu jetu yazanga chinji kwakwasa anyingike yize Mbimbiliya yakulongesa. Hachino, yalulieka yuma hanga umwe mutu apwe ni kwameneka.

Mu mbonge ya Cuatro Cañadas, Bolívia, mandumbu a mapwo aali yahanjika ni umwe pwo avuluka ngwo Miguelina, yoze te uli haze lia limwe loja. Muze mandumbu anyingikine ngwo pwo wacho te wachitokesa umwe usoko wenyi mu ufwe, yamutangila Usolwelo 21:3, 4. Miguelina yamba ngwenyi, kanazange kulilongesa yuma yikwo ya mu Mbimbiliya. Alioze iye katwama kusuku chinji nawa katwamine ni telefone. Ha kupalika cha amwe mashimbu, mandumbu te kanakanjika ni umwe mwana-pwo yoze watwama mu mbonge yizeyene. Chakuhona kushimbwila, mandumbu yawana Miguelina ku zuwo lia mwana-pwo yoze te anahanjika nenyi mumu mwana-pwo wacho kapwile mwanenyi. Ayo eswe yawahilila chinji. Chocho mandumbu yaakwasa hanga asoko jenyi eswe aputuke kulilongesa Mbimbiliya.

Tuli ni shindakenyo ngwetu Yehova kakulemesa chinji tachi jize mandumbu jetu akusa hanga alinge kwambujola chino chalipwila. Tuli nawa ni shindakenyo ngwetu manunga ni kukwasa atu jenyi muze mutununga ni kwambujola sango jipema kuli “atu eswe mushi lia lilu.”—A-Kolosu 1:23.