Ha 2023, mulimo wa Yela ja Yehova wa kulumbununa mikanda mu limi lia Papiamento, wakumbanyisanga miaka makumi shimbiali ni yitano. Papiamento, lili limi lize linakatuka ku Holandês, Português ni Espanhol. Musono, unji wa atu 350,000 waze atwama mu tungu lia Aruba, Bonaire ni Curaçau, kakuhanjika limi lia Papiamento. Matungu wano kakwavuluka nawa ngwo ABC.

Mulimo wa kwambujola mu matungu wano, waputukile muze te hikwasala hakehe hanga ahete ha mwaka 1930. Muze mishionaliu waze ayile ku shikola ya Ngiliate, ahetele ku Curaçau ha 1946. Mu tungu liacho te himwapwa kulu yikungulwila yinji. Alioze te kanda muchipwa mikanda ya kulumbununa mu limi lia Papiamento. Yikungulwila te yakulinga kukunguluka mu limi lia Inglês ni Papiamento, alioze kapwile ni kutanga mikanda ya Holandês, Inglês ni Espanhol. Chipwe ngwe mandumbu kamwene ngwo kanafupiwa Mbimbiliya mu limi lia Papiamento, nihindu kwapwile kapinda munji. Ngwe chilweza, te kukushi mikanda yize yakusolola chize mahasa kusoneka limi lia Papiamento. Ndumbu Bill Yeatts kapwile umwe wa kuli mishionaliu atangu waze atumine ku matungu jacho. Iye kakwashile mulimo wa kulumbununa ngwe chize anasolola ha Anuário ya 2002. Yamba ngwenyi: “Mba twambujole sango ja Wanangana, twatambile kwamba ni kusoneka yuma yize te kanda achiyamba hanji kuyisoneka mu limi lia Papiamento. Chapwile chikalu kusa mutapu wa kusoneka uze atu te mahasa kukaula.” Chipwe ngwe twapalikile mu kapinda yono, nihindu mandumbu kasele tachi hanga alumbunune mikanda mu limi lia Papiamento.

Mukanda utangu, Uwahililo Kuli Atu Eswe mu limi lia Papiamento, kaufwambwishile ha mwaka 1948. Ha kupalika cha mashimbu, mikanda yinji yiyipwa kulumbununa, kuchingako Kaposhi wa Kutalila ni Laulenu! Musono, Mbimbiliya ya Yisoneko ya Chifuchi Chaha, kanayifwambwisa mu limi lia Papiamento ndambu-ndambu kulita ni mikanda yize analiange kuhwisa. Mukanda utangu aliangile kulumbununa uli wa Rute uze afwambwishile ha 1 Outubro, 2021.

Tachi jize mandumbu akusa hanga alumbunune mikanda mu limi lia Papiamento, jakusoloka ha kwoka cha akwa-kwambujola mu matungu jacho. Muze asele chikungulwila chitangu mu limi lia Papiamento ha 1956, kwapwile wika akwa-kwambujola 16. Musono, mu limi lia Papiamento muli unji wa akwa-kwambujola 1,600 waze akuwayila Yehova hamuwika mu yikungulwila 25. Ha mwaka 2023, mandumbu kanakasongwela malongeso a Mbimbiliya mu limi lia Papiamento kuhiana 1,200.

Tuli ni shindakenyo ngwetu, Yehova manunga ni kuwahisa tachi ja mandumbu waze akwecha hanga pangu lio litemuke ni kuneha uhenya kuli Yehova ha kukalakala mu njiza ya limi lia Papiamento.—Mateu 5:16.