Ha 23 Novembro, 2023, Mary Larimer, yoze walilongesele mu kalasa mutangu ku Shikola ya Ngiliate ya Torre de Vigia, yafwa. a Mary kasemukine ha 4 Junho, 1920 ku Scenery Hill, Pensilvânia mu E.U.A. Kamupapachishile ha 1935, muze te ali ni miaka 15, ha chimwe kukunguluka cha mambonge ku Washington, DC, mu E.U.A. Ha kupalika cha miaka yiwana, Mary yapwa pionelu wa shimbu lieswe, mba atu yamona zango lienyi mu mulimo wa kwambujola.

Ha Dezembro, 1942, yatambula umwe mukanda wa ndumbu Nathan Knorr, yoze te wakutala ha kwenda cha milimo mu ululikiso wa Yehova ha mashimbu jacho, hanga asoneke yimwe petisau aye ku shikola avuluka ngwo, Faculdade Bíblica de Gileade da Torre de Vigia. Ha mukanda wacho hapwile maliji ambile ngwo: “Chikuma chilemu cha shikola yino chili kululieka tuvumbi twa Zambi, a malunga ni a mapwo mu mulimo wa umishionaliu ku yihela yeswe ya hashi.” Hapwile nawa maliji wano: “Hita kalasa te mambata tukweji atano. Kashika, muchipwa chilemu chinji kulilongesa ni kusa tachi jinji hanga mutu ahwise kulilongesa kalasa mweswe ha mashimbu akehe.” Mary yasoneka petisau yayituma chakuhona kupalikisa mashimbu anji.

Ha 1 Fevereiro, 1943, iye ni alongi akwo 99 a mu kalasa wenyi yapwa ha tangwa litangu lia kulilongesa ku shikola yaha mu mbonge ya South Lansing, Nova York, mu E.U.A. Ha tukweji atano waze asulileho, Mary kalihanyine chinji mu kulilongesa, hanga anyingike yuma yinji hakutwala ku Mbimbiliya. Iye kapwile longi mupema chinji, kahwishile kulilongesa ha 23 Junho, 1943.

Muze ahwishile kulilongesa, Mary yamutuma ngwe mishionaliu mu Cuba. Hakutwala ku kapinda apalikile mu chiteli chaha atambwile, yamba ngwenyi: “Atu a ku chihela chacho te yiswale. Mu mulimo wa kwambujola te twakwenda hashi, kutwakapwile ni mashinyi.” Mary kanungine mu mulimo wacho ndo ha 1948, muze azangile kuhiluka ku Pensilvânia hanga afunge naye, yoze te uli ni chimwe chilonda chinene. Ha miaka yahachileho, yanunga kupwa twamishi, yalihana chinji mu mulimo wa kwambujola, ni mu milimo yikwo ya ku ufulielo. Muze te kanda achifwa, iye kapwile mu chikungulwila cha Glendale, Califórnia, E.U.A.

Shikola ya Ngiliate haliapwila yili mu Patterson, Nova York, kuze analilongesela alongi a mu kalasa 155. Muze ndumbu Mark Noumair, longeshi wa shikola ya Ngiliate anyingikine kufwa cha Mary yamba ngwenyi: “Mary Larimer kapwile umwe mukweze wasemukinyine mu yimwe mbonge yikehe, alioze te kakutayiza kuya keswako hanga alweze atu hakutwala kuli Yehova. Iye te keshi kunyingika kuze mamutuma, nyi tangwa limwe makahiluka nyi ka. Ma mishionaliu, ngwe Mary, kakwasa kutunga fundamentu ya kutatuka cha mulimo wa kwambujola hashi heswe.”—Izaia 6:8.