Skip to content

Skip to table of contents

Anamoona a Yehova

Select language Etxuwabo

Kasanza Ttagaraga dha Yehova

Kasanza Ttagaraga dha Yehova

“Miyo ddili Nabuya, Mulugu wanthebwa, wathagaraga.”—OBUDDUWA 34:6.

JIBO: 142, 12

1. Yehova ovittiyile dhavi oziwiwa na Mizé? Eji ekalelini yaderetu?

LABO dhahi, Mulugu wahivittiya oziwiwa na Mizé, modhela ologa nzina vina mikalelo dhaye. Ottiya ologa dha ewodhelo na eziwelo yaye, iyene ologile wi ddwa nttebwa vina ttagaraga. (Kengesa Obudduwa 34:5-7.) Mizé wafuna aziwe akala txibarene agahikamihedhiwa na Mulugu. Noona Yehova wahiloga mikalelo dhaye dhintonyihedha wi onofuna-wene wakamihedha emeleli aye. (Obudduwa 33:13) Onoonamo dhavi ogaziwa wila Yehova ononizuzumela? Mutoma obu onele ologa nttebwa na ttagaraga dhinkaana Yehova wa abale antabuwa vina efunelo yaye ya wakamihedha.

2, 3. (a) Txini enlagiha yawi ttagaraga elobo yobaliwana? (b) Ekalelini yaderetu ozuzumela enloga Bibilia sabwa ya ttagaraga?

2 Yehova Mulugu ddwa ttagaraga, noona attu attanddiwe n’ekalelo yakakene. Waweddela attu eena ttagaraga ekalelo y’obaliwana ya attu otene. Noona, masiki abale ahinimuziwa Yehova, anowodha waweddela ttagaraga akwawa. (Wita  1:27) Mbibiliani muhilebiwa dila dhinjene attu alagihile ttagaraga na akwawa. Motagiha, labo nimodha, ayana eli ela wakulana sabwa ya mwana, noona Salomau afunaga ogomiha makaniya wahiruma wila mwanaya agwaddiwe vari. Mambali webaribari mwiweliye dhawene oheddiwa ttagaraga, okumbirha wila attiyedhiwe mukwaye anapiwe mwanaya. (1 Amwene 3:23-27) Yotagiha yina ya muttu wa ttagaraga ja mwana Faraó. Munfanyeliye nyenye Mizé, wahiziwa wila mwana oddule wali mukadda Hebreu, nanda wafuna apiwe. Venevo “omweddela thagaraga,” omuttukula wi akale mwanaye.—Obudduwa 2:5, 6.

3 Txini ensunza iyo na yimelelo eji ya ttagaraga? Sabwa Yehova onfuna wila nimutagihe iyene. (Éfeso 5:1) Nittanddiwe n’ekalelo ya ttagaraga, mbwenye sabwa y’ottega dila dhina ninofuna dh’ovittukulela. Dila dhina ninogudulanaga nanya-nanya, nubuwelaga akala nimukamihedhe muttu obe nivitanaalele nooka. Txini enanikamihedhe okala attu a ttagaraga? Voroma, ndowe noone mukalelo onlagiha ttagaraga Yehova vamodha attu eena. Vanawili, ndowe noone mukalelo onawodhihu osaza ttagaraga dha Yehova nanda sabwa ekalelani yapama okosa dhawene.

YEHOVA—YOTAGIHA YOLIGANA YA MUTTU WA TTAGARAGA

4. (a) Yehova warumeli nni angelo odhowa o Sodoma? (b) Yotagiha ya murala wa Lot, ennisunziha nni?

4 Mbibiliani, mukala dhotagiha dhinjene dha ttagaraga dha Yehova. Motagiha kobuwela ekosiliye na Lot. Lot wali muttu womyala murima “wonlana meddelo a bure a athu” akala mu Sodoma na Gomorra. Attu akala kwatti eso, katanaalela dha Mulugu, noona Yehova wahilibela watolotxa mutolowelo. (2 Pedro 2:7, 8) Yehova wahimuruma mungelo waye wi amwaddele Lot yawi kwatti esile dhigahitolotxiwa, noona wanfunana wi avenyemo momaguva. Bibilia onloga: [Angelo aba] “onaga ogonela wa Lot, aathidda myono iyene, mwadye, anaye eli anayana, vowi Nabuya wanfuna wavuna àbuddutxagamo mmuthethenimwá.” (Wita 19:16) Vowi Yehova wannonelamo makattamiho ana Lot, nikaane ebaribari yawi onononelamo vina makattamiho angumanana iyo.—Izaiya 63:7-9; Tiago 5:11; 2 Pedro 2:9.

Yehova onononelamo makattamiho angumanana iyo

5. Nzu na Mulugu ninnisunziha dhavi olagiha ttagaraga?

5 Yehova ohasunziha emeleli aye olagiha ttagaraga. Kobuwela nlamulo navahiwe akadda Izrayel. Akala muttu wela oboleya kobiri, namaboleyihaya wanttukula guwo dha muliba oboleya ninga mulagiho wawi onele odhana kobiridha mmudhidhini olaganeliwe. (Kengesa Obudduwa 22:26, 27.) Mbwenye mudhidhi wa txiguwo muliba ottukula guwo wanfanyeela odhana guwoya wila namaboleya akunelena omattiyu. Abale ahakaana  ttagaraga txino kadhana guwoya, masiki dhawene Yehova wahimala wasunziha attu etene okaana ttagaraga. Kito malago aba anfuna anisunzihe nni? Annisunziha wi kanapwaze Akristu akwehu anjombeliwa elobo. Nigoona wila okala mbali obe murogora oli mmakattamihoni, japama omukamihedha na murima wotene.—Kolosi 3:12; Tiago 2:15, 16; kengesa 1 Joau 3:17.

6. Ttagaraga dha Yehova wa ana Izrayeli dhinnisunziha nni?

6 Yehova wanakaanela ttagaraga ana Izrayel masiki vamuttegelani dila dhinjene. Malebo anloga: “Nabuya Mulugu wa makolo aye wanimurumela anamukathi aye kuvili-kuvili wi amulage, sabwa yaweddela thagaraga nlogo naye vina mparha waye munkaliye.” (2 Mapadduwo 36:15) Na mukalelo wakakene, naweddele ttagaraga abale ahinimuziwa Yehova obe atxinuwile anfuna okala amarho a Yehova. Mulugu kanfuna wila muttu atolowe, ogafiya nsaka naye n’ottonga. (2 Pedro 3:9) Noona ovanene buliwo mudhidhi ninfuna nafiyedhena attu enjene muselu waye wovuna, wila attuya awodhe opurelamo ttagaraga dha Mulugu.

7, 8. Amambali a Milan anrumeelela eni wila Yehova wahakaanela Ttagaraga?

7 Nsaka nttino, emeleli enjene a Yehova anowoonaga ttagaraga dhaye. Motagiha vyaka ya 1990, o Bosnia wahitatamuliwa koddo ya mahimo ottiyana-ttiyana. Wahikala mwanamurala dhahi wakala wenewo wana mwana wa muzombwe wana vyaka 12 weliwa Milan. Milan na amambali aye vamodha na Anamoona a Yehova eena aali mukomboyuni avenya o Bosnia adhowaga o Servia. Awene adhowa oone kongeresu, nanda amambali a Milan afuna abatiziwe. Vamiganoni musupayi wahoona wi anamudhi abale ali ottiyana na elabo yawa noona ohatitiha mukumboyuni mpule. Awene ahattiya abali otene ali mukomboyuni mpule odhowa oleddo wawa. Ahattidda anamurala aba mwari mwa malabo meeli. Nomala mwimeleli wa anyakoddo onvuza munddimuwa waye yafuniye wakosana anamudhi abale. Vowi awene ali vakukuvi anwodha onvuruwana munddimuwa oddule wa anyakoddo bagakula: “Kaaburutxele otakulu oko waape na futti!”

8 Oku anyakoddo abale alogaga makani awa, adha alobwana eeli akala na anamudhi abale. Alogana mutxiddo-mutxiddo wila awene vina Anamoona a Yehova nanda alowaddeliwa yapadduweli anamudhi abale na abali aali mukomboyuni. Alobwana abale amwaddela Milan na mbali aye wila awele mukaroni mwawa, sabwa anyakoddoya kalogosa majangarha a aima. Abali abale ahawaddela amambali a Milan wila avire okodde wa numbaya adhowe afanye osogorho. Milan wahizuzuma vaddiddi nanda kawodha ologa. Amambali aye ahavuza alobwana abale: “Munoona wila anele onittiya ovira?” Awene awela, odhowa okalaga ninga asupayi kawona. Milan ohafwanya amambali aye okubela wina wa migano, otene adhowa o kongeresuni. Awene ahirumeela wila Yehova wahakula malobelo awa! Nihisunza mBibiliani wila  Yehova kanabarela emeleli aye na mukalelo mmodhene. (Merelo 7:58-60) Mbwenye dila eji, Milan ologa: “Yakala ninga Yehova warumile angelo wila apibe omentoni asupayi wi anivune.”—Masalmo 97:10.

Dhahene ninga Yezu, okaana efunelo enddimuwa ya wakamihedha attu vina wasunziha dila dha Yehova?

9. Yezu woona dhavi muttitti wa attu wanfwara? (Koona foto eli omaromo.)

9 Yezu tagiha ya muttu olagihile ttagaraga. Waneddela ttagaraga muttitti wa attu wanfwara, vowi “ali awindeya guru, okukumuwa, ninga mabila ahina namasapiha.” N’eji, iyene okosile eni? “Venevo oroma wasunziha dhinjidhene.” (Mateu 9:36; kengesa Marko 6:34.) Mottiyana-mwene Afarizi kaweddela ttagaraga attu abale, nanda kafuna wakamihedha. (Mateu 12:9-14; 23:4; Joau 7:49) Dhahene ninga Yezu, okaana efunelo enddimuwa ya wakamihedha attu vina wasunziha dila dha Yehova?

10, 11. Jofuneya okaana ttagaraga mwa dhilobo dhotene? Katagiha.

10 Mbwenye kayo yofuneya olagiha ttagaraga mwa dhilobo dhotene. Motagiha, Mwene Salomau txino obuwela wila wana ttagaraga, sabwa y’okodda ompa Agag wali mwene wa akadda Amalek vina mwiddani wa nlogo na Mulugu. Saul vina wahittiya opa dhinama dhetene dha akadda Amalek. Yehova wahimala omwaddela Salomau wila ape akadda Amalek otene na dhinamadha. Sabwa ya opambiha wa Saul, Yehova wahimukoodda ninga mwene. (1 Samuwel 15:3, 9, 15) Yehova ddi mulamuleli woligana. Iyene onowodha wengesa murima wa muttu nanda onowawoona anfwanyeela weeddeliwa ttagaraga. (Enthothobelana 2:17; Ezekiyel 5:11) Iyene onele wattonga abale otene aninvanya vina ankodda omwiwelela. (2 Tesalónika 1:6-10) Nsaka ntto Yehova kanakaane ttagaraga na atabala. Mbwenye oku atolotxaga kakamwe atabala, onele waweddela ttagaraga akurumuwi vina onele wavuna.

11 Ninoziwa wi kayo iyo onattonga attu akala anele okalawo obe nne. Mbwenye enwodha iyo okosa ovanene ku wakamihedha attuya. Kito, ninawodhe dhavi walagiha ttagaraga attuyá? Ndowe noone malago mang’onovi.

NINALAGIHE DHAVI TTAGARAGA

12. Mukalelo onaweddihana weyo attu eena onalagihe dhavi ttagaraga?

12 Okale muttu wokamihedha. Yehova onowakokomeza Akristu otonyihedha ttagaraga wa anamwanddamani vina abali awa. (Joau 13:34, 35; 1 Pedro 3:8) Yotapulela modha ya ttagaraga ja ‘otabuwa vamodha’ na awene. Muttu ona ttagaraga onomukamiha ole ontabuwa. Nona enofuneya oveda mudhidhi wi nakamihedhe attu ena, ninga wakosela mabasa ofuneya.—Mateu 7:12.

Kalagiha ttagaraga dhawo modhela wakamihedha attu na merelo ottiya-ttiyana (Koona ddima 12)

13. Vagapadduwa ngovi, txini enkosa attu a nlogo na Mulugu?

 13 Wakamihedhe anjombeliwa. Nigamona muttu bagatabuwa mwaha ya ngovi ninofanyela okaana ttagaraga. Nlogo na Yehova ninoziwiwa ninga attu ankamihedhana ogapadduwa ngovi. (1 Pedro 2:17) Motagiha, murogora dhahi w’o Japão onkala murudda wagujuliwe na ottekenyeya wa elabo vina tsunami yaka ya 2011. Murogora oddu ologa wi “wahipangarhazeya vina olibiheya” muwooneliye abali o Japão vina a dhilabo dhina amagaga wili-wili Numba dha Omwene vina dha abali awa. Iyene ohenjedhedha: “Yotagiha eji eddikamihedha ononelamo wi Yehova ononizuzumela. Emeleli aye, anozuzumelana muttu na mukwaye. Abali na arogora ali orugunuwa elabo yotene anonika mmalobeloni mwawa.”

14. Onawodhe dhavi wakamihedha aredda na akalaba?

14 Mwakamihedhe abale ali aredda vina akalaba. Nigamona muttu atabuwaga sabwa ya oredda, obe okalaba, ninomukaanela ttagaraga. Ninojeedha woona nsaka ninagome makattamiho aba etene, noona ninolobaga odha wa Omwene wa Mulugu. Mudhidhi obuno ninofanyeela wakamihedha aredda vina akalaba. Namaleba dhahi ologa wi labo nimodha mamayaye wa kalaba vina wa muredda wahitakaliha guwo dhaye. Aromaga wene ofula guwodha wahikopeleliwa va musuwo. Ali Anamoona a Yehova adhowile omoonawo. Murogora  mmodha wahinvuza akala wahikaana mabasa wi amukamihedhe. Muyana ole ologa: “Ddahikaana manyazo, kaddawodha wakulawa.” Murogora wahimukamihedha ofula guwodha na okoddeliha mburoya. Nomala asasanya elobo yoja, oku bagaredha vang’onovi. Muyana oddu wahitamaalela vaddiddi, vina wahiloga wila Anamoona a Yehova “anovirihamo esile dhinloga awene mmalaleyoni.” Ttagaraga dhinakanelani aredda na akalaba dhinowattukulela okosa guru wila wakamihedhe?—Filipi 2:3, 4.

15. Mabasa awo a olaleya anakamihedha dhavi attu eena?

15 Wakamihedhe attu wi amuziwe Yehova. Mukalelo wamakamaka wa wakamihedha attu, ku wasunziha dila dha Yehova vina Omwene waye. Elobo yina yaderetu ja wakamihedha woona ekalelani yapama wiwelela malago a Yehova. (Izaiya 48:17, 18) Mabasa a olaleya ji ttarho yofanyeela omutamaalana Yehova vina walagihedha attu eena ttagaraga. Onowodha okosa vopitta mmabasani a olaleya?—1 Timóteo 2:3, 4.

TTAGARAGA ELOBO YAMAKAMAKA!

16. Okala attu a ttagaraga onnipuriha nni?

16 Anamasunza dhubuwelo anloga wila olagiha ttagaraga onolibiha egumi ya muttu na mandanoya. Ogakamihedhaga abale antabuwa, onele woona wila onohagalala, njedhelo nawo ninoliba, kunkala weka vina kunyimuwa. Olagiha ttagaraga onowudhelana oderetu. (Éfeso 4:31, 32) Okwela oganittukulela wakamihedha attu eena, ninokalawo na mobuwelo wotxena sabwa ninoziwa wi ninkosa esile dhinnifunana Yehova. Ttagaraga enele onittukulela okala amambali aderetu, amamuni ofiyedheya vina marho wokuluveleya. Ottiya eji, abale anakaanela ttagaraga akwawa, anowakelaga nikamihedho ninfunani.—Kengesa Mateu 5:7; Luka 6:38.

17. Onfunela nni okala muttu wa ttagaraga?

17 Masiki niziwaga wi olagiha ttagaraga elobo yapama mwa iyo, ennittukulela olagiha ku omutagiha wehu Mulugu vina nriho naye. Mulugu ddi niparha na okwela vina ttagaraga. (Gano 14:31) Iyene onittiyedha yotagiha yoligana. Nikose guru eli yotene wi nimutagihe Mulugu modhela olagiha ttagaraga. Nigakosa dhawene ninele owodha wafiyedha abali ehu a mmulogoni, vina ninele olibiha mandano ehu na abale anaddameli.—Galásia 6:10; 1 Joau 4:16.