Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Setemburu ya 2017

Kakala Muttu Wovipimelela

Kakala Muttu Wovipimelela

“Dhinbala muya sisi: . . . murima wofewa, wovipimelela.”GALÁSIA 5:22, 23.

JIBO: 52, 32

1, 2. (a) Txini entoteya sabwa y’otowa ovipimelela? (b) Ekalele nni yofuneya ologa dha ovipimelela?

YEHOVA Mulugu, onfuna wila nikale attu ovipimelela. (Galásia 5:22, 23) Ovipimelela wa Yehova boligana. Mbwenye ovipimelela wehu kahiyo wowakwana sabwa yokala attegi. Ddabuno otowa ovipimelela onowatotela attu enjene ogwela mmakattamihoni anooneya mwilaboni. Onomuttukulela muttu ottiya okosa dhilobo dha ttima, ohiwananeyana oskola obe omabasani. Otuwa ovipimelela, onomwalaniha, onomukosiha muttu okala namaruwana, mulezeli, mpuji, onototiha mangawu gwé, owara, ofugeliwaga mukambura, wiwa opa ogogo, ottapula maredda a mararuwo vina yari dhohilaganela.—Masalmo 34:11-14.

2 Attu ahinwodha ovipimelela anovitotela makattamiho anyavi, vamodha na abale anawaddamela. N’ovira wa mudhidhi, ninowoona wila attu enjene kanwodha ovipimelela. Ejo kayo rurumutxa wa iyo, sabwa Nzu na Mulugu nahittaga ologa wi otuwa ovipimelela yolagiha yawi ninkalawo “masaka omariha.”—2 Timóteo 3:1-3.

3. Ninfunela nni okala attu ovipimelela?

 3 Ninfunela nni okala attu ovipimelela? Vakala sabwa bili dhinziweyetxa. Yoroma, muttu onwodha ovipimelela dila dhinjene onorabela makani. Onokala muttu ona egumi yaderetu, vina onorabela okala wosilidhiwene, wozuzuma obe okubanya. Yanawili, muttu onfuna okala marho a Yehova, onofanyeela ovilela vina owanana dhubuwelo dhabure. Adamu na Eva kawodhile ovipimelela. (Wita 3:6) Dhahene ninga Adamu na Eva, attu enjene ovanene anogumanana makattamiho menjene sabwa y’otowa ovipimelela.

4. Txini enamukamihedhe muttu onkosa guru wi akwaranye vimanya dhaye?

4 Yehova onoziwa wi nili attu ohiligana nanda ninorutxiwaga ovipimelela. Mbwenye iyene onfuna anikamihedhe opemberha vimanya dhehu. (1 Amwene 8:46-50) Ninga marho wokwela, iyene n’okwela onowapangarhaza abale otene ankattamiheya na mukalelo wovipimelela na dhubuwelo dhawa dhawobana. Mutoma obu ninele osunza mukalelo onivipimelela Yehova. Ninele ologa vina dhotagiha dha Bibilia, dhapama vina dhabure, nigamala ninele woona marhe ananikamihedhe.

YEHOVA OHINIVAHA YOTAGIHA

5, 6. Yotagiha gani ya ovipimelela enivahile Yehova?

5 Ovipimelela wa Yehova boligana sabwa iyene ddoligana. (Olibiha 32:4) Mbwenye iyo nattu ottega. Masiki dhawene ninofanyeela otanaalela yotagiha ya ovipimelela wa Yehova nigamala nimusanze. Ejo enele onikamihedha okaana moonelo woligana nigafwanyiwa dhilobo dhinnizuzumiha. Kito dhotagihadha eso dha ovipimelela wa Yehova sivi?

Ovipimelela wa Yehova boligana sabwa iyene ddoligana

6 Kobuwela mukalelo woonilemo Yehova, waromile Satana omusadduwela Mulugu mu Edeni. Vatatamulile Ddiabo osadduwela waye, enkala ninga angelo eena ororomeleya a Mulugu ali wirimu, ahuma milomo, ahisilidhiwa vina ahiroma waganyedha. Txino weyo onosilidhiwaga ogobuwela goyi dhotene dhitotile Satana. Mbwenye Yehova kasilidhiwe momaguva. Iyene ohakula na mukalelo woligana. N’ofwasa, Yehova onowakula makani osadduwela atotile Satana. (Obudduwa 34:6; Job 2:2-6) Onkosa dhavi? Iyene ottiya mudhidhi mwinjene, sabwa kanfuna watolotxa attu, mbwenye onfuna “etene afwanye mudhidhi worugunutxa murima.”—2 Pedro 3:9.

7. Yotagiha ya Yehova ennisunziha nni?

7 Yotagiha ya Yehova enonisunziha wi ninofanyeela wubuwela deretu nihinatti ologa vina kanimaguvele osilidhiwa. Noona ogafunaga okosa yosakula eganile weyo, jofuneya oroma ogilati butanaalela. Olobele okumbirhaga zelu, wi okose obe ologe elobo yoligana. (Masalmo 141:3) Nigakala wosilidhiwene, obe wonyimuwene, ninele ologa obe okosa dhilobo dhotakala. Ji ejene enakosiha attu enjene okubanya agamalile ologa obe okosa dhilobo s’ohubuwela!—Gano 14:29; 15:28; 19:2.

 DHOTAGIHA DHAPAMA VINA DHABURE DHA EMELELI A MULUGU

8. (a) Ninafwanye wuvi dhotagiha dhapama dha muttu wovipimelela? (b) Txini emukamihedhile José ottawa mudhidhi wattiddiwiye na mwadhi Putifar? (Koona foto eli omaromo.)

8 Dhotagiha gani dha Bibilia dhinloga ttima ya ovipimelela? Modhaya enubuwela iyo, ja José mwana wa Jakobi. Iyene wahiliba vina ovipimelela mudhidhi walabiye vatakulu va Putifar wali mwimeleli wa Faraó. Mwadhi Putifar wannimoona José wi “wali wokoddela, maningo aye na kove yaye” noona dila dhinjene wanimugayela. Txini emukamihedhile José ovipimelela wi akwaranye manyengetto abo? Txino José wahitamela mudhidhi vamaromo wila atanaalele makattamiho agadhile musogorho korumela onyengettiwa. Noona n’oliba, José wahittawa mudhidhi wattiddiwiye guwo dhaye na mwadhi Putifar. Iyene ologa: “Ddinwodha dhavi wira elobo ninga eji, yothabwetxa otakala, ddimuddawelaga Mulugu?”—Wita 39:6, 9; kengesa Gano 1:10.

Omulobe Yehova wi ovahe zelu y’ovipimelela vina okwaranyana manyengetto

9. Onawodhe dhavi ovisasanyedha wi orabele manyengetto?

9 Yotagiha ya José ennisunziha nni? Akala ninokwekwetteliwa olupa malamulo a Mulugu, japama ottawa momaguva. Attu enjene ahinatti okala Anamoona a Yehova, ahiwana na vimanya dha olezela, okobola fola, okosa mararuwo, obe dhilobo dhina. Mbwenye masiki mumalelani obatiziwa, anowanavi na mobuwelo a dhilobo eso. Akala eji enowupadduwela, katamela mudhidhi wi otanaalela mutakalelo onatakale mandano awo na Yehova ogavittiya okwekwettiwa. Kaveda oziwa dhilobo dhintameletxa wukwekwetta, ogamala kasunzela marhe orabelana. (Masalmo 26:4, 5; Gano 22:3) Ogafanyiwa makattamiho ninga aba, omulobe Yehova wi ovahe zelu y’ovipimelela vina okwaranyana manyengetto.

10, 11. (a) Txini enapadduwela azombwe enjene oskola? (b) Txini enakamihedhe azombwe ohilupa malamulo a Mulugu?

10 Epadduwile na José, enowapadduwela azombwe enjene ali Akristu ovanene. Mmodhaya ddi Mira. Akwaye a oskola dila dhinjene anloga wila anoziveliwaga okosa mararuwo. Mira kaana elobo wila awaddele. Iyene ologa wi “wanyimuwa vaddiddi, vina wavyona ninga oli yeka” ottiya eji ayana akwaye amoona ninga zimorha sabwa yohikaana mweeddi. Mbwenye Mira wali weziwelo. Iyene wanziwa wi muzombweni, attu enjene anomageleliwa okosa mararuwo. (2 Timóteo 2:22) Anamasunza akwaye aninvuza akala txibarene wali ahinatti omuziwa mulobwana. Nivuzo ntto nahinvaha gari ya wapanga akwaye sabwa yakoddeliye okosa mararuwo. Ninowatamaalela azombwe enjene a Akristu anvilelavi okwekwetteliwa okosa mararuwo, Yehova vina onoziveliwa na awene!

11 Bibilia onowaloga vina attu ena ahiwodhile ovilela okwekwetteliwa okosa  mararuwo. Dhotagiha eso dhinolagiha dhopurelamo dhabure sabwa y’otowa ovipimelela. Akala oli mmakattamihoni ninga Mira, kamubuwele muzombwe ole wotowa malago ologiwe va nivuruni na Gano kapitulu 7. Ogamala omubuwele vina Amnon na dhopurelamo dha merelo aye abure. (2 Samuwel 13:1, 2, 10-15, 28-32) Amambali akamihedhení aninyu okala attu ovipimelela vina a eziwelo modhela walagiha dhotagiha esi mudhidhi wa webedha wenyu wa ntakulu.

12. (a) José owodhile dhavi ovipimelela muwooneliye abale? (b) Mudhidhi gani onfanyeelihu opimelela etanaalelo yehu?

12 Dila yina, José wahivaha yotagiha yapama y’ovipimelela. Obo wali mudhidhi wadhile abali aye wi agule dhoja mu Ejipitu. Wila oone mobuwelo wawa, José kawaddeli yawi wali mbali awa. Mooniliye wi okubanya waye wela ottabwavi, wahattiya abali aye, badhowa wunla wolapela. (Wita 43:30, 31; 45:1) Akala mbali obe murogora onowukosela elobo enusilidha, katagiha ovipimelela wa José, kumaguvele osilidhiwa obe ologa elobo egadhile wutxinutxa musogorho. (Gano 16:32; 17:27) Obe akala mmudhawo olottamagihiwa mmulogoni. Akala jijuwene, japama ovipimelela wila onadhe okosana mandano mmudhawoyá. Ejo enorutxa okosawa. Mbwenye, otanaalela yotagiha vina ovirihamo enloga Yehova, enele wukamihedha okosa eli yapama.

Muttu ddi muttu kavittukulele obuwelaga wi kanakwekwettiwe na manyengetto

13. Esile dhipadduwile na Mwene David dhinnisunziha nni?

13 Ndowe noone yotagiha ya Mwene David. Mudhidhi waromiliye osadduweliwa na Saul vina Simei, iyene kanyonyeyile momaguva nne vina kalabihedhi guru dhaye wila atxigena. (1 Samuwel 26:9-11; 2 Samuwel 16:5-10) Ndde, joziweya wi David kalitxi muttu, wovipimelela. Ninziwa ejuwene nigengesa ejile yampadduweli mukoseliye yottega na Betsabé, vina mukalelo wakuliye ovittukulela wa Nabal. (1 Samuwel 25:10-13; 2 Samuwel 11:2-4) Ninosunza elobo yamakamaka na David. Yoroma, jawi abale etene ansogorhela nlogo na Yehova akale ovipimelela wi anadhe ovikonya sabwa ya ettomo yawa. Yanawili, muttu-muttu kavittukulele obuwelaga wi kanakwekwettiwe na manyengetto.—1 Korinto 10:12.

MERELO ANFWANYEELIWE WEDDANA

14. Elobo gani yampadduweli mbali, nanda mukalelo wakuleliye wakalelelini wapama?

14 Koddi onawodhe dhavi okala muttu wovipimelela? Kobuwela elobo empadduweli Luíz. Karo yaye evadiwa na mukukutta mwina. Mwa venevo nameddiha mukukutta ovadile karo ya Luíz, oroma ologa bure afunaga wila atote kani. Luíz olobela wa Yehova akumbirhaga wi akale womaalene vina otamela omukurumutxa nameeddiha karo mukwaye. Masiki dhawene iyene kafuna wiwa. Nomala Luíz oleba matrikula  a mukukutta wa mulobwana oddule, ovenyavo bamuttiya alogaga venevo. Sumana modha musogorho, Luíz ovenya badhowa mmabasani a olaleya, wi amwiyelele muyana waromilegiye ologana. Mamuni wa muyanaya, wali nameddiha karo oddulene wavadile karo ya Luíz! Mulobwana oddule mmoneliye Luíz, wahikaana manyazo, noona wahimukumbirha nlevelelo sabwaya ya obure wakoseliye. Nomala wahiloga wila agahidhowa ologa na mparha onang’anela mikukutta wila asasanyihe karo ya Luíz. Mulobwana oddule wahigilati wi ewe muselu wa Bibilia, vina wahiziveliwa. Venevo Luíz wahoona wila wahikosa elobo yaderetu okala womalene, sabwa kosilidhiwa obe kologa marabwa dhilobodha kadhigeddile deretu.—Kengesa 2 Korinto 6:3, 4.

Mukalelo onakulihu nigaligiwa onele opatta mabasa ehu a olaleya (Koona ddima 14)

15, 16. Omusunza Bibilia onwodha dhavi okamihedha murala wawo okala wovipimelela?

15 Omwengesa vina omusunza Bibilia malabo etene, onowakamihedha Akristu wunuwiha ekalelo y’ovipimelela. Kobuwela yalogile Yehova na Josuwé: “Mazu otene a nivuru nthi na malamulo aba,  kumàlihege mwano mwawo, otakunelege mmurimani mwawo mutana na mathiyu; weddegena dhetene dhilimo. Dhawene dila dhawo dhigammyala, dhineddeliwe oganpura.” (Josuwé 1:8) Koddi omusunza Bibilia n’ofwasa onawukamihedhe dhavi wimetxa ekalelo y’ovipimelela?

Omusunza Bibilia malabo etene, onele wukamihedha wunuwiha ekalelo y’ovipimelela

16 Nihoona wi Bibilia okaana dhotagiha dhinjene dhintonyihedha dhopurelamo dha okala muttu wovipimelela vina makattamiho annivitotela muttu ohinwodha ovipimelela. Yehova onivaha dhotagiha esi dhilebiwe na sabwa yaderetu-wene. (Roma 15:4) Jaderetu mwa iyo wengesa, osunza vina otanaalela deretu dhotagihadha eso. Koona mukalelo onupatta dhotagiha eso vamuralani vawo. Omukumbirhe Yehova nikamihedho wi ottiddihedhe mabasa malagoya a Mazu aye. Ogoona wila ojombeliwa ekalelo y’ovipimelela, karumeela olagiwa. Olobele otamelaga ekalelo y’ovipimelela ogamala kakosa kukuttu wi okose masadduwo anfuneya. (Tiago 1:5) Kapepesa mmanivuruni mwehu, wi otamele zelu na mirugu dhinawodhe wukamihedha.

17. Amambali anawodhe dhavi wasunziha anawa wi akale ovipimelela?

17 Onawodhe dhavi wakamihedha anawo okala attu ovipimelela? Amambali anoziwa yawi mwana kambaliwa n’ekalelo y’ovipimelela. Noona awene anofanyeela wasunziha anawa mikalelo dhapama na dhotagiha dhawa. (Éfeso 6:4) Ogazinddiyela yawi anawo kanwodha ovipimelela, kavivuze akala weyo oli tagiha yapama ya ovipimelela wa awene. Kakala tagiha yoligana modhela okala mmabasani a olaleya, mmatugumanoni, vina va webedhani wa ntakulu. Kuwove nne kukane manyazo wawaddela anawo esile dhinutakalela! Yehova wahinvaha maddile Adamu na Eva. Maddile abo agahakamihedha awene osunza mukalelo w’omuriha vina omuttittimiha Yehova na onddimuwa waye. Na mukalelo wakakene, akala amambali anowasunziha vina walela anawa na dhotagiha dhapama, ejo enele wakamihedha anawaya okala attu ovipimelela. Omukwela Yehova vina oriha onddimuwa waye vamodha na malagoya, elobo yamakamaka enfwanyeeliwe wasunziha anawo wi onuwihe.—Kengesa Gano 1:5, 7, 8.

18. Ekalelini yaderetu wasakula amarho na eziwelo?

18 Masiki akala nili amambali obe nne, iyo notene ninofanyeela wasakula amarho n’eziwelo. Akala amarhoya anomukwela Yehova, anele wulibiha vina wukamihedha okosa dhosakula dhapama vina orabela makattamiho menjene. (Gano 13:20) Dhotagiha dhawa dhapama dhinele wuttukulela osaza ovipimelela wawa. Ottiya ejo vina, mweddelo wawo waderetu onele walibiha. Ovipimelela oko onele onikamihedha orumeeliwa na Mulugu, ojavo egumi yapama vina ogawelana dhilobo dhoziva na abale anakwelihu.