Yezu wasaddeyela eni attu akala oddubelavi?

NLAMULO na Mizé, nanrumela wila attu addubelege mbwenye na mazu ninga: “Ddinoddubela va mentoni va Mulugu oliwo” obe “ddinoddubela mwa nzina na Yehova”. Mbwenye mmasakani a Yezu oddubela wahidha okala elemelelo ya Ayuda otene, awene anddubelela elobo-elobovi yalogani. Awene anddubela na guru vaddiddi wila arumeeliwegena dhalogani, mbwenye Yezu wahasaddeya dila bili na mereloyá abo. Yezu wahasunziha attuya eraga: “Ologa wenyu okale ‘ndde’, akala pumwenemo; okale ‘nne’, akala munokodda.”—Mateu 5:33-37; 23:16-22.

Mowiwanana na Dicionário Teológico do Novo Testamento, nivuru na Talmud, ninonikamihedha woona wila Ayuda annika ttima vaddiddi oddubela, obe oddubela wila dhologa dhawa dhirumeeliwe. Nivuru ntti Talmud ninotapulela wila wahikala oddubela wali webaribari, vina wina wali wa vadhidho, wahanetxa ttima.

Kayo Yezu bahi wasaddeyile Ayuda na merelo awa oddubela. Motagiha namaleba dhopadduwa Flávio Josefo wahileba sabwa ya elemelelo ya Ayuda yakooddiha attu oddubela. Anamafwara elemelelo ejile anrumeela wila oddubela wahipitta ologa ottambi. Awene aloga wila akala muttu onoddubela na efunelo yawi arumeeliwe na dhinlogiye, muttuya oddu wali muttambi. Manivuru ninga escrita apócrifa judaica Sabedoria de Sirach, obe Eclesiástico, (23:11) aloga dhahi: “Muttu waloga dha marabwa karumeeliwa mmuttetteni.” Yezu wahasaddela eraga kamuddubele na dhilobo dhihina ttima. Noona akala ninologa ebaribari kavali ofuneya wila niddubelege na efunelo wayi mazu ehu arumeliwege ninga ebaribari.