Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Otuburu ya 2017

Ebaribari Enodhana ‘Widdana Ottiya Murenddele’

Ebaribari Enodhana ‘Widdana Ottiya Murenddele’

“Kamubuwele wi miyo ddidhilena murenddele mwilaboni-mpuno; kaddidhilena murenddele, ddidhilena koddo.”—MATEU 10:34.

JIBO: 43, 24

1, 2. (a) Murenddele gani onna iyo ovanene? (b) Ekalelini yorutxa okaana murenddele wowakwana ovanene? (Koona foto eli omaromo.)

NOTENE ninotamela okaana murenddele mwigumini mwehu, nanda ninoveda vina ohikaletxa wozuzuma. Noona ninomutamaalela Yehova sabwa ya onivaha “murenddele wa Mulugu.” Murenddele obo oli ninga murobwe onnirabeliha okaana dhubuwelo na dhitanaalelo dhinnobaniha. (Filipi 4:6, 7) Sabwa ya oviperheka wehu wa Yehova, entapulela wila nikaana “murenddele na Mulugu.” Kuloga wila nikaana mandano oliba na iyene.—Roma 5:1.

2 Masiki dhawene, obu kayo mudhidhi waderetu wila Mulugu adhena murenddele wowakwana velaboni ya vati. Ninkalawo masaka omariha noona elaboya edhaala makattamiho annizuzumiha. Nirijiwa na attu enjene otabala. (2 Timóteo 3:1-4) Ninowana koddo na Satana, vamodha na masunziho aye onyengetta. (2 Korinto 10:4, 5) Mbwenye mwa dhotene esi ettabwileya onizuzumiha ku osadduweliwa  na anamudhi ehu ahinimwebedha Yehova. Enjiya anonibedda na mwebedhelo wehu, obe anonimagedha wila nigawa murala. Dila dhina anologa wila kanikose epaddi ya onamudhi wawa akala kaninttiya omulabela Yehova. Koddi ninewemo dhavi merelo aba osadduweliwa na anamudhi? Ninawodhe dhavi okaana murenddele dhigapadduwaga dhilobo ninga esene?

NUBUWELE ENI AKALA NINOWIDDIWA NA ANAMUDHI EHU?

3, 4. (a) Masunziho a Yezu anna mapakelo gani? (b) Mudhidhi gani warutxa onfara Yezu?

3 Yezu wanziwa wila kayo attu otene agarumeelile masunziho aye. Wanziwa wila arumiwi aye anfwanyeela oliba murima sabwa agahidha widdiwa na attu eena. Widdiwa oko ogahitolotxa murenddele mwari mwa anamudhi. Yezu walogile dhahi: “Kamubuwele wi miyo ddidhilena murenddele mwilaboni-mpuno; kaddidhilena murenddele, ddidhilena koddo. Ddidhela omugudulaniha mwana na babe, mwana-muyana na maye, muwenya na nyezelaye. Dhahene amwiddani a muthu andha okala amudhaye-ene.”—Mateu 10:34-36.

4 Yezu valogiye wi “Kamubuwele wi miyo ddidhilena murenddele” wafuna atapulele nni? Wafuna wila attuya aziwe ejile egadhilevo korumela okala anamafwara aye. Elobo yina jawila wafuna asunzihe attu yawi ebaribari ya Mulugu kimmwalaniha murala. (Joau 18:37) Anamafwara aye anfwaneela oziwa wila kigali elobo yovevuwa onfara Yezu makamaka akala anamudhiya kanrumeela ebaribari.

5. Anamafwara a Yezu agumanilena nni?

5 Yezu wahapanga arumiwi aye wila akale omala nawale wi awodhe ovilela widdiwa na amudhawa. (Mateu 10:38) Mowiwanana na ejile yalogile Yezu, anamafwara aye ahisadduweliwa vina enaya ahisuguliwa na amudhawa. Masiki dhawene anamafwara aba ahakela mittuvo dhinjene opitta esile dhiyelelilani.—Kengesa Marko 10:29, 30.

6. Akala ninowiddiwa na anamudhi ehu, txini enfanyeelihu wubuwela?

6 Akala anamudhi ehu anonisadduwela sabwa y’omwebedha Yehova, txipo kanittiye wakwela. Kanidduwale wubuwela wila omukwela wehu Mulugu na Kristu onnliba akala ninowakwela attu eena. (Mateu 10:37) Japama oziwa wila dila dhina, Satana onotamela olabihedha wakwela wehu anamudhi wila obanihe omukwela wehu Mulugu. Ndowe noone makattamiho orutxa vina mukalelo enfwanyeelihu owanana wi nipemberhe.

MATELO NA MUTTU OHINIMWEBEDHA YEHOVA

7. Ononemo dhavi akala okosa matelo na muttu ohinimwebedha Yehova?

7 Bibilia onipanga wila abale amagile matelo “ahinthegavi, anowona makathamiho,” obe dhorutxa. (1 Korinto 7:28) Akala mateloya omagile na muttu ohinimwebedha Yehova apo makaniya attabwa. Noona akala enowupadduwela dhawene, katamela woona dhinupadduweladhá na mukalelo ononamo Yehova. Iyene belaga kanitamele omuttiya obe ommwala muttuya sabwa yawi kanimwebedha Yehova. (1 Korinto 7:12-16) Akala mamuni wawo, kanimwebedha Yehova obe kansogorhela ntakulu mowiwanana na ebaribari ya Bibilia,  masiki dhawene omurihege vowi ddi mwazambo wa ntakulu nawo. Akala mwadhiyo kanimwebedha Yehova, omukwelege vina omweddihege n’oderetu.—Éfeso 5:22, 23, 28, 29.

8. Akala mukwawo wa matelo onowukoddiha webedha wawo onavikose mavuzo gani?

8 Onakose nni akala mukwawo wa matelo onotamela wukoddiha omwebedha Yehova? Mamuni wa murogora dhahi walogile wila mwadhiyeyá alabihedhe malabo mang’onovi va sumanani wila adhowe alaleye. Akala oli mmakattamihoni oligana kavivuze: ‘Esi dhinloga mukwaga wa matelo, kuloga wila onfuna addikoddihe omwebedha Yehova? Akala kayo ejuwene, ddirumeele ovirihamo enkumbirha mukwagaya?’ Ogakala muttu wowiwananeyana, kunakaanetxe makattamiho vamuralani vawo.—Filipi 4:5.

9. Akristu asunzihe dhavi aniwa omuttittimiha mambali ohili mwibaribarini?

9 Enorutxa wasunziha aima akala mukwawo wa matelo kanimwebedha Yehova. Motagiha enorutxa wasunziha aima wiwelela vina ovirihamo magano a Bibilia ninga aba anloga “Omurihe babo na mayo.” (Éfeso 6:1-3) Kito onakose dhavi akala mukwawoyá wa matelo kanfuna wene ovirihamo malago a Bibilia? Kalagihe anawo wi oli yotagiha yaderetu modhela omuriha mukwawo wa matelo. Kobuwela vina katanaalela mikalelo dhaye dhapama nanda katamela omwaddela wila onohagalala na dhetene dhapama dhinukoseliye. Kumuloge mwadhiyo obe mamunawo n’obure vamentoni va aninyu. Wawaddele anawoya wila muttu-muttu okaana ofuru wosakula akala onofuna omwebedha Yehova. Akala onowasunziha anawo omuriha mambali wawa ohili mwimeleli wa Yehova, merelo ninga abuwene anele omuttukulela mukwawoyá ofuna osunza ebaribari.

Wasunzihe anawo ebaribari ya Bibilia masiki akala jorutxa (Koona ddima 10)

10. Mambali wa Mukristu onasunzihe dhavi anaye omukwela Yehova?

10 Mambali ohili mwibaribarini, txino  onele wattiya anaye woona mattanga ahili a webedha webaribari obe okaana masunziho a relijiau yottambi. Amamuni enaya anowakoddihaga awadhiwa ali alabeli a Yehova wasunziha aniwa ebaribari ya Bibilia. Mbwenye masiki egalivi dhawene muteliwi onokosa guru wila mwa dhotene asunzihe ebaribari anayeya. (Merelo 16:1; 2 Timóteo 3:14, 15) Motagiha, mamuni dhahi wahali mukristu, kafunana wila mwadhiye asunzihe aniwa Bibilia nne vina odhowana omatugumanoni. Masiki veweleliye yosakula ya mamunaye, iyene wanloga dha Bibilia na anaye mudhidhi mung’onovi egawodheya. N’eji awene ahisunza dha malamulo a Yehova a ozinddiyela obure na oderetu. (Merelo 4:19, 20) Musogorhomwa aniwaya asakulile anya-anyavi omulabela Yehova. * (Koona yowenjedha.)—Olibiha 30:19, 20.

ANAMUDHI ANIDDA WEBEDHA WEBARIBARI

11. Txini entota makani akala amambali kanimwebedha Yehova?

11 Niromaga wene omusunza Bibilia na Anamoona a Yehova yali elobo yorutxa wawaddela anamudhi ehu. Mbwenye vonnuwa nroromelo nehu, nahikaana efunelo ya wawaddela wila ninfuna nimulabele Yehova. (Marko 8:38) Weddeyana wawo na Mulugu mudhidhi mwina txino onotota magudulano na anamudhi. Ndowe noone dhilobo dhinfwanyeeliwe okosa wila okaanevi murenddele, oku olibihaga mandano awo na Yehova.

Niganonelamo mukalelo ononamo anamudhi ehu sabwa ya ebaribari kinarutxe wasunziha

12. Amambali enjene ansadduwelela nni ebaribari, nanda ninalagihe dhavi wila ninowariha?

12 Kakosa guru wi ononelemo dhinubuwela amambali awo ahili akristu. Ninosanzaya mowakwana nigaziwa ebaribari ya Bibilia. Txino amambali anoroma woona wila nilonyengettiwa obe nihiroma okosa epaddi ya nikuru na relijiau yabure. Anele oroma wubuwela wila kaninakwela sabwa nihittiya oja mattanga na awene. Mudhidhi mwina anowovaga wila enele onipadduwela elobo yabure obe yawopiha nigakwa. Noona japama otamela oziwa mukalelo oniwamo awene, na ofwaseya navuruwane agalogaga wi noone sabwa ennizuzumelelani. (Gano 20:5) Murumiwi Paulo wahitamela wavuruwana ‘attu a mahimo’ otene na efunelo ya wasunziha miselu dha pama. Nigatamela wavuruwana anamudhi ehu, ejo enele onikamihedha wasunziha ebaribari.—1 Korinto 9:19-23.

13. Akala amambali ehu kanimwebedha Yehova, ninalogena dhavi?

13 Ologe na okurumuwa. Bibilia onloga wila: “Makani enyu akalege ofwasa, ozivela zelu.” (Kolosi 4:6) Okosa ejuwene kayo elobo yovevuwa. Japama okumbirha muya wokoddela wa Yehova wi onikamihedhe okala attu ofwasa vina okurumuwa  nalogaga na amambali ehu. Kanitamele wakulana na awene sabwa ya relijiau yawa ehili yebaribari. Nigoona wila anoninyimula na mazu obe merelo awa, japama watagiha arumiwi a Yezu. Paulo wahiloga eraga: “Niruwaniwaga, ninowakula na nriho; niddiwaga, ninovilela.” —1 Korinto 4:12, 13.

14. Yopurelamo gani endana mweddelo wa pama?

14 Okaane mweddelo wa pama. Ekalelini yamakamaka? Masiki niziwaga wila ologa n’ofwasa ononikamihedha okaana murenddele na anamudhi ehu, okaana mweddelo wapama okaana mapakelo aderetu. (Kengesa 1 Pedro 3:1, 2, 16.) Kattiya wi dhotagiha dhawo dhalagihe amudhawo wi Anamoona a Yehova, bohagalala vamuralani vawa, anowavaha aniwa nlelo napama, vina anovirihamo magano a Bibilia. Masiki akala amambali ehu kanrumeela ebaribari, nittangarhame voziwa wi mweddelo wehu onomuhagalaliha Yehova.

15. Nikale dhavi womala na wale wi nirabele wakulana na amambali ehu?

15 Okosa masasanyedho na mutanene. Kobuwela makani agafunile weyo ologa na amambali awo. Ogamala katamela osakula yokosa. (Gano 12:16, 23) Kobuwela elogile murogora dhahi o Australia. Sezele wannidda vaddiddi ebaribari, dila dhina wakala wosilidhiwene. Noona ahinatti omukuwela wila adhe vani vawa, murogora oddu na mamunaye, ahikumbirha nikamihedho na Yehova wila awodhe ologana n’oderetu. Awene ahitamela makani agalogilani na babiwa agafiya. Wila arabele ologa makani ogonela, txino musogorhomwa agattukuleli ologa dha relijiau, awene ahita maddile a mudhidhi wologana mmuttittoni.

Omukwela vina weddeyana wawo na Yehova onele oliba ogakwela anamudhi awo

16. Onakwaranye dhavi etanaalelo y’ovipwatteliha muladdu sabwa ya ohikosa enfuna amambali awo?

16 Txibarene, jorutxa orabela magudulano ali etene na amambali awo ahinimwebedha Yehova. Noona akala vanokala magudulano, txino onele ovipwatteliha muladdu sabwa onowakwela vina onofuna wahagalaliha amambali awo. Mbwenye kobuwela wila omukwela wawo Yehova okale vamburoni voroma opitta amambali awo. Amambalawoya agazinddiyela ejoya anele ononelamo wila omulabela Yehova elobo yamakamaka. Kumudidele muttu orumeela ebaribari. Masiki egali yowodheya okosawa, kattiya wila attu oone wi ofwara dila dha Yehova onokamihedha-wene. Txibarene Yehova anowavaha attu otene gari ya osakula omulabela dhahene ninga enivahiliye.—Izaiya 48:17, 18.

AKALA MMUDHAWO ONOTTIYA OMULABA YEHOVA

17, 18. Txini enokamihedhe akala mmudhawo onottiya omulaba Yehova?

17 Akala munammudhi onottamagihiwa mmulogoni ejo enotota okubanya  vaddiddi. Ejo enopa vaddiddi, enkala ninga muttuya onulata murima na supadda. Onawodhe dhavi ovilela opa ninga oku?

18 Zuzumelá mabasa a Yehova. Ogafwanyiwa opa ninga oku, japama olibiha nroromelo nawo. Omwengese Bibilia malabo etene, koona matugumano, kakosa mabasa a olaleya, vina olobele wa Yehova okumbirhaga wila olibihe murima wi ovilele. (Juda 20, 21) Onaloge dhavi akala onokosa dhilobo esi dhotene nanda opawa kungoma? Kutxelele, nne kawundeye guru! Kakala mento vina kazuzumela mabasa a Yehova. Okosa mabasa a Yehova na mudhidhiya anele wukamihedha wang’anela etanaalelo na dhubuwelo dhawo. Jijuwene yampadduweli namaleba wa Masalmo 73. Wahikala nsaka nagumanilena iyene dhilobo dhorutxa. Mbwenye omwebedha Yehova wahimukamihedha wona dhilobodha na mukalelo woligana. (Masalmo 73:16, 17) Txino enele okala dhawene mwa weyo.

19. Onalagihe dhavi nriho mukalelo oneeddiha Yehova nlogo naye?

19 Kariha nlelo na Yehova. Mulugu onoziwa wila nlelo naye ttopureleyamo masiki abale attamagihiwe mmulogoni. Masiki niziwaga wila enopa vaddiddi omoona muttu wamukwela iyo battiyile omulabela Yehova, ejo enomukamihedha otxinuwa musogorho wi eyelele omwebedha. (Kengesa Ahebreu 12:11.) Noona japama oriha malamulo a Yehova anloga wila ‘kamukaane mandano’ nabale aburutxiwe mmulogoni. (1 Korinto 5:11-13) Eji elobo yorutxa wene. Nigaddeliwa wi japama watxatxama, entapulela wi kanilogena nne na muttitto, walebela muselu, obe odheela dhipano dhina.

Nikaane njeedhelo nawi abale attiyile omwebedha Yehova anele omwiyelela

20. Txini enfwanyeelihu ojeedha?

20 Kutxelele ojeedhela! Onkwela “onokuluvelavi dhosogorho,” noona ndoweni nijedhele wila abale akwela iyo wale, anele wiyelela omwebedha Yehova. (1 Korinto 13:7) Ogoona wila muttu ottamagihiwe mmulogoni oroma olagiha mikalelo ninga otxinuwile, kamulobelele wila muttuya akaane guru dhindha mBibiliani wi arumeele niwobo na Yehova ninloga: “Nvuni wawo ddi miyo, keyela.”—Izaiya 44:22.

21. Onakose nni akala amudhawo anowufarafara sabwa y’onfwara Yezu?

21 Yezu wahiloga wila ninofwanyeela omukwela iyene opitta wakwela attu eena. Alogaga mazu aba wanziwa wila arumiwi aye agahikalavi oweddeyana vina owiwelela masiki akala amudhawa ela wawidda. Noona akala amudhawo anowidda sabwa ya onfwara Yezu, omuroromele Yehova. Omukumbirhe wila okamihedhe ovilela goyidha. (Izaiya 41:10, 13) Kasanzaya voziwa wila Yehova na Yezu aziveliwa na weyo, vina anele wureliha sabwa ororomela wawo.

^ par. 10 Wila okaane miselu dhina dha wasunziha aima akala mambali mmodha kayo mwimeleli wa Yehova koona mutoma onloga Perguntas dos Leitoresmu revista A Sentinela 15 de Agosto, 2002.