Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Novemburu ya 2017

Onomoona Yehova Ninga Ttawela Yawo?

Onomoona Yehova Ninga Ttawela Yawo?

“Nabuya [Yehova] onoawobola emeleli aye, animuroromela iyene kankoneya.”—MASALMO 34:23.

JIBO: 49, 32

1. Sabwa ya yottega emeleli enjene a Yehova, anivyona dhavi?

“NTOWA gani ninna miyo!” mazu aba alogile ddi murumiwi Paulo. (Roma 7:24) Masaka abano adhari ororomeleya a Mulugu anokubanya vina anonyimuwa ninga yampadduweli Paulo. Sabwaya? Sabwani, masiki nifunaga omuziveliha Yehova, notene nili attegi vina kaniliganile. Ninokubanya ttabwa-ttabwa nigakosa elobo enimunyimula. Akristu eena akosile yottega enddimuwa ahifiyedha wubuwela wila kanaleveleliwe na Yehova.

2. (a) Masalmo 34:22 enlagiha dhavi wila emeleli a Yehova kanfanyeela ovipwatteliha muladdu? (b) Txini enasunze iyo mmutomani obu? (Koona kaxa “ Masunziho obe Mutapulelo na Musibo?”)

2 Malebo anloga wi nigamwira Yehova ttawela yehu, kaninavipwattelihe muladdu. (Kengesa Masalmo 34:22.) Omukosa Yehova ttawela yehu ontapulela nni? Ninfanyeela okosa eni wi Yehova aneddele ttagaraga vina anilevelele? Ninofanya dhowakula dha mavuzo aba, modhela otanaalela masasanyedho akosiwe wi dhimagiwe mittette dh’ottawelamo mu Izrayel wa wale.  Masasanyedho abo ali mmalamuloni asogorhela nlogo mpaka nsaka na Pentekoste wa yaka 33. Mbwenye Nlamulona nadhile wa Yehova. Mwadhahene modhela masasanyedho aba a omagiwa mittette dh’ottawelamo, ninosunzamo monelo wa Yehova na yottega, muttegi vina abale antxinuwa. Voroma, katanalela sabwaya yana ana Izrayel mittette dh’ottawelamo vina mukalelo walabihedhiwa mittettedha.

“SAKULANI MITHETHE DHOTHAWELAGAMO”

3. Ana Izrayel afuniwana amukosele nni ole ompile muttu mukwaye?

3 Yehova ononyonyeya vaddiddi agamoona muttu opiwe. Noona akala mw’Izrayel wela ompa muttu, wansakuliwa mmudhi wakuweliwa “muliba ntxiga” wi amukosele ntxiga ompile mmudhaye. (Olebeliwa 35:19) Mwadhawene pangaya wampitxa na egumi yaye sabwa ya muttu ompileye vahili muladdu. Akala pangaya kapiwa momaguva, ejo yatapulela wi Elabo Yolibeliwa egahidhaala obure vina txipo kigali yotxena. Yehova ologa: “Kamukwarulihe elabo enkalinyu” modheela okuttula nikami na attu obe ompa muttu.—Olebeliwa 35:33, 34.

4. Mw’Izrayel akala wela ompa muttu s’ohifuna txini yampadduwela?

4 Txini yapadduwa akala mu Izrayel mmodha wela otota ngovi s’ohifuna? Masiki akala okosile ejiya ahifunaga, namapayá wampwattela muladdu w’ompa muttu. (Wita 9:5) Yehova wahiloga wila akala epadduwile mohifuna, namapayá wanfanyeela weddeliwa ttagaraga. Mwa venevo, ole ompile muttuya s’ohifuna wanfanyeela osakula muttette mmodha wottawelawo mwa esile mitanu na mmodha wi amuttawe muliba ntxiga. Namattawaya agarumeliwa okala mmuttetteni mpo, wakala wobareleya, kuloga kapiwa. Mbwenye namattawaya wafuniwana okala mmuttetteni mpule mottawelamo mpaka mudhidhi ogakwile namakutta.—Olebeliwa 35:15, 28.

5. Omagiwa wa mittette dh’ottawelamo onnisunziha nni mwaha wa Yehova?

5 Masasanyedho a omagiwa mittette dh’ottawelamo, kaali a muttu-muttuvi. Adhile wa Yehova mwinyene. Yehova omuruma Josuwé  wi “awaddele dhahi ana Izrayel: ‘Sakulani mithethe dhothawelagamo.’” Mittette esi dhanwodha ovaha ‘nibarelo nowakwana’. (Josuwé 20:1, 2, 7, 8) Yehova wahiloga vina wila mittettedha eso dhihikale mburo mmodhene mbwenye dhilapelanihiwe. Noona na masasanyedho aba ninosunza elobo enddimuwa sabwa ya Yehova. Motagiha, enonikamihedha ononelemo ttagaraga dha Yehova. Vina enonisunziha mukalelo wosakula omwira Yehova ttawela yehu, masaka abano.

VOROMA “ÀPEREKELE ANDDIMUWA A MUTHETHEYÁ MULADDU” WAWO

6, 7. (a) Txini yakosa anddimuwa a muttette agamuttongaga ole ompile muttu s’ofuna? (Koona foto eli omaromo.) (b) Yakaleli nni yaderetu namattawa wawaddela anddimuwa a mmuttetteni-mwa?

6 Akala mw’Izrayel wela ompa muttu s’ohifuna, wanttawela mmuttetteni dh’ottawelamo, nanda agafiya wanaperekela “anddimuwa a muthetheyá muladdu waye.” Anddimuwa abo animwakela vina aninvaha mburo wokala. (Josuwé 20:4) Ogavira mudhidhi waderetu-wene wanrumiwa wiyelela mmuttetteni ompileye muttu wi attongiwe na anddimuwa a mwenemo. (Kengesa Olebeliwa 35:24, 25.) Anddimuwa abo agoona wila epadduwile s’ohifuna, namapaya wanrumiwa wiyelela mmuttetteni mottawela mwaliye.

7 Yakaleli nni yaderetu namattawa wawaddela anddimuwa a muttette muladdu waye? Anddimuwa afanyeela okaana ebaribari yawi nlogo na Izrayel ttokoddela, nanda namapaya wankaana gari ya wakela nlevelelo vina ttagaraga dha Yehova. Namasunza Bibilia dhahi oleba wila akala namattawa kawaddela anddimuwa a mmuttetteni, wela opiwa momaguva. Wahenjedhedha wila muladdu w’opiwa waye bwaye-wene, sabwa kavirihilemo malamulo a Mulugu. Namapa wanfanyeela otamela nikamihedho vina ovirihamo malagoya wi akalewo. Akala iyene kattawela mmittetteni esile dhasakuliwe, mmudhi wa ole ompileye wannimutamela wi ampe.

8, 9. Ekalelini yapama Mukristu okosile yottega wawaddela anddimuwa a mulogo?

8 Masaka abano, wila akaane mandano oliba na Yehova, Mukristu okosile yottega enddimuwa, onofuniwana wafiyedhana anddimuwa a mulogo wi akumbirhe nikamihedho. Okosa eji ekaleleni yamakamaka? Voroma, ddi Yehova wattomeli anddimuwa a mulogo wi attonge makani a yottega enddimuwa. (Tiago 5:14-16) Yanawili anddimuwa a mulogo attomeliwa wakamihedha anamattega antxinuwa wiyelela mandano awa na Mulugu vina wawaddela wi ahiyelele okosa yakakene. (Galásia 6:1; Ahebreu 12:11) Yanoraru, anddimuwa a mulogo arumiwa vina anoshagihiwa wi akamihedhe attegi antxinuwa orayila muttorho wa muladdu wawa. Yehova onowakuwela anddimuwa aba ninga “ebarelo nsaka na pevo.” (Izaiya 32:1, 2) Masasanyedho abo, bu mukalelo onnilagiha Yehova ttagaraga dhaye.

9 Emeleli enjene a Mulugu, ahoona wila wawaddela anddimuwa a mulogo wi akele nikamihedho elobo envuna. Motagiha mbali dhahi oniliwa Daniyel, wahikosa yottega enddimuwa nanda ovira myeri dhinjene s’o wawaddela anddimuwa a mulogo. Iyene bela: “Muvirelani mudhidhi mwinjene ddahoona wila kavali elobo yina ya wawaddela anddimuwa a mulogo wi akose.” Masiki dhawene wannova wila anadhe akalewo  attu eena anziwa dha yottega yaye, noona alobelaga waromana okumbirha nlevelelo wa Yehova. Nomala, okumbirha nikamihedho na anddimuwa a mulogo. Mutanaaleliye dha mundduni, ologa: “txibarene ddannova wawaddela. Omamalelowa ddakala ninga ddirulile muttorho waddilemela vamusorho vaga.” Daniyel ohiyelela okala marho wa Yehova. Ovanene onomulabela Yehova ahivipwattelihaga muladdu, nanda ottomiwa okala mwimeleli wokamihedha.

“ATHAWELE MMUTHETHENI MMODHAVO”

10. Wila namapaya aleveleliwe txini yafanyeeliye okosa?

10 Wila aleveleliwe, momaguva-mwene, namapaya wanfanyeela ottawela mmittetteni. (Kengesa Josuwé 20:4.) Ottawela mmittetteni eso, vina okala mwenemo mpaka namakutta okwa yatapulela okalawo wa namapaya. Ejo yali elobo yorutxa vaddiddi mwa namattawaya. Namattawa wanttiya okala mba mwaye, mabasa akosiye vina ofuru waye w’okosa oleddo. * (Koona yowenjedha.) (Olebeliwa 35:25) Mbwenye ovuneya wali venevo. Obudduwa mmittetteni eso, wakala ninga katanalawo wila ompa muttu, ottiya eji, wannika vangovini egumi yaye.

11. Mukristu otxinuwile ontamaalela dhavi ttagaraga dha Yehova?

11 Namattega wotxinuwa, masaka abano, onofanyeela olagiha wila onofuna-wene nlevelelo na Mulugu. Onofanyeela ottiya okosa dhottega dhakakene. Ejo entapulela ottiya okosa dhilobo dhigamuttukulele ottega wili. Murumiwi Paulo ohiloga ejile ekosile Akristu atxinuwile mu Korinto. Iyene oleba: “Oriba wenyu murima wali muddimani yatadile Mulugu: otota mmurimani mwenyu nunlelo notamela ovivuna, ekalelo yosilidhiwa, ya wova, y’owunlela oddona wili, y’oddizuzumelana, y’omulaga mvuti!” (2 Korinto 7:10, 11) Noona nigakosa kukuttu wila nihikose dhottega dhakene, ninele omulagiha Yehova wila ninozuzumela okalawo wehu vina ninowubuwela wi oleveleliwa wehu kayo webewene.

12. Mukristu onfanyeela onyanyala nni wila oone ttagaraga dha Yehova?

12 Txini enfanyeela Mukristu otxelela wila akele ttagaraga dha Yehova? Onofanyeela orabela dhilobo dhetene dhinimuzivela ttabwa-ttabwa esile dhigamuttukuleli ottega. (Mateu 18:8, 9) Motagiha, akala amarho awo anoroma wukwekwetta wi okose dhilobo dhabure, onele ottiya wandana na awene? Akala onowanavi na efunelo y’omwa, onele orabela wita gari dhigottukuleli olezela ttakatta? Akala onovilibihedha wi okwaranye efunelo yokosa mararuwo, onele orabela woona mavidiyu, site, obe mabasa agottukulele okaana dhubuwelo dhotakala? Kobuwela wila guru enkosiwe wi wiwelele malamulo a Yehova, iyene kandduwala. Kuli elobo yawopiya empitta oziwa wila Yehova oninyanyala. Mbwenye oziwa wila nili mu ‘okwelani wohimala wa Yehova’ ejo elobo yohagalaliha.—Izaiya 54:7, 8.

‘DHINELE OKALA MITTETTE DHENYU DHOTTAWELAMO’

13. Namattawa wakala dhavi wobareleya agavolowa mmittetteni dh’ottawelamo?

13 Namattawaya agawodha ovolowa mmuttetteni dh’ottawelamo wakala wobareleyene.  Yehova wahiloga addagana mittette eso: ‘dhinele okala mittette dhenyu dh’ottawelamo.’ (Josuwé 20:2, 3) Yehova kalogile wila namattawaya attongeliwe muladdu wakakene dila yina. Ottiya eji, muliba ntxiga kavolowa mmuttetteni mottawela wila ampe namattawa. Namattawa agavolowa mmuttetteni mpule wambareleya odheela malamulo a Yehova. Iyene kafugeliwa mukambura. Wanlaba mabasaye, wanakamihedha attu eena, vina wannimwebedha Yehova na murenddele. Txibarene iyene wankaana ofuru vina murenddele mwigumini mwaye!

Kakaana ebaribari yawi Yehova olevelela yottega yawo (Koona ddima 14-16)

14. Mukristu otxinuwile onfanyeela okaana ebaribari ya eni?

14 Emeleli enjene a Yehova, akosile yottega enddimuwa anonyimuwaga masiki vamalilani otxinuwa. Enaya anubuwela wila txipo Yehova kanadduwale dhikosilani. Akala onoonamo dhawene, kakaana ebaribari yawi Yehova agalevelela muladdu onodduwala kakamwe. Kupwattele vina muladduya. Jijuwene yakosile Daniyel omulogile iyo omaromo. Anddimuwa a mulogo mmusisigulilani wahiyelela okaana mubuwelo wotxena, vina wahivuneya. Iyene ologa: “Ddahittiya wubuwela esuwene. Yottega egadduwaliwa kuloga edduwaliwa-wene. Ninga mulogeli Yehova, enkala ninga onttukula muttorho wawo bavokela wolapela. Kundhaga woona vina.” Namattawa agavolowa mmuttetteni mottawelamo, iyene koova wila onele otameliwa na muliba ntxiga wi ampe. Mwakakene, Yehova agalevelela dhottega dhehu, kanove viina wila onele onisottotta sabwa ya ejuwene.—Kengesa Masalmo 103:8-12.

15, 16. Okuluvele dhavi ttagaraga dha Yehova wila oziwe wi Yezu ddi moboleli wehu vina Namakutta Munddimuwa?

 15 Okala sabwa yina enfanyeelelihu okuluvela ttagaraga dha Yehova dhahene ninga mwakosela ana Izrayel. Mwamaleli Paulo ologa wila “ntowa gani ninna miyo” sabwa yawi kawodha okosa ofuna wa Yehova mowakwana iyene ologa: “Ddinomutamalela Mulugu, onddivuna na nzina na Yezu Kristu Nabuyehu.” (Roma 7:25) Iyene wafuna atapulele nni? Masiki Paulo vakosiye kukuttu wila arabele efunelo yokosa dhilobo dhabure vina sabwa yottega nawale, iyene wahitxinuwa. Noona wanziwa wila Yehova wahimulevelela modhela mukutto wa yobolo ya Yezu Kristu. Sabwa ya Yezu opitxa mukutto, nikana gari ya wedda na murenddele mmurimani mwehu. (Ahebreu 9:13, 14) Vano Yezu “onamakutha waye kummala, vowi ddokalawovi; nona onowavuna kakamwene abale animususela Mulugu, aveleliwaga na iyene.” (Ahebreu 7:24, 25) Masaka awale, anamakutta anakamihedha ana Izrayel okaana ebaribari yawi Yehova olevelela-wene dhottega dhawa. Na Yezu ovanene, nikaana sabwa dhinjene y’ologa wi, “dhahene ninowireliwa thagaraga, ninofwanya mahala, ninokamyedhiwa mudhidhi wa segedho.”—Ahebreu 4:15, 16.

16 Ninele omwira Yehova ninga ttawela yehu, nigaroromela mukutto wa yobolo okosile Yezu. Mbwenye kanubuwele wila mukuttoya okuttuleliwe attu otene, ebewene. Okaane nroromelo na mukutto obo wila opurelemo. (Galásia 2:20, 21) Okaane nroromelo na mukutto wila Yehova alevelele dhottega dhawo. Okaane nroromelo sabwa mukutto obu onowuvaha njedhelo na okalawo na mukalakala. Mukutto wa Yezu, nvaho munddimuwa wukosele Yehova!

17. Onfunela nni omoona Yehova ninga ttawela yawo?

17 Omagiwa wa mittette dh’ottawelamo onikamihedha woona ttagaraga dha Yehova. Masasanyedho abo anonisunziha yawi egumi joriheya. Enonisunziha woona mukalelo onnikamihedha anddimuwa a mulogo, ejile entapulela otxinuwa webaribari vina mulevelelo onlevelela Yehova dhottega dhehu. Weyo onomwira Yehova okala ttawela yawo? Kuli mburo mwina wottawela vina wattima ohili Yehova! (Masalmo 91:1, 2) Mutoma ondawo ninele osunza yotagiha ya olevelela vina nttebwa na Yehova modhela omagiwa wa mittette dh’ottawelamo.

^ par. 10 Mowiwanana na aziwetxi a Ayuda, aloga wi anamudhi a namattawa ammwalela mmuttetteni, wottawelawo wi akale na mmudhawa.