Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Novemburu ya 2017

Kukalewo Elobo Enawuttiheni Ottuviwa

Kukalewo Elobo Enawuttiheni Ottuviwa

“Kamurumele wakiwa ovulumutxiwa wenyu na athu anjiwa murima na mithupo dhotowa thima.”—KOLOSI 2:18.

JIBO: 32, 55

1, 2. (a) Mperhe gani onjeedha emeleli a Mulugu? (b) Txini enanikamihedhe wang’ana maka mperheya? (Koona foto eli omaromo.)

AKRISTU ottikitteliwa akaana njedhelo nattima. Awene anojeedhela nosanzaya okala wirimu. Paulo ologa njedhelo ntto ninga “mperhe onnithanela Mulugu.” (Filipi 3:14) Wirimu anele olamulela na Yezu mumweneni mwaye vina anele olaba na iyene wi akamihedhe nlogo na attu ofwanya oligana. (Ovuhulela 20:6) Ntto njedhelo nohagalaliha nina awene! Mabila meena anojeedha n’ottaba wakela mperhe wottiyana. Awene anojeedha okala nosanzaya mparaizu velaboni ya vati, nanda njedhelo ntto ninowawagalaliha!—2 Pedro 3:13.

2 Paulo wanfuna wakamihedha akristu abo ottikitteliwa wila akaanevi nroromelo ajeedhaga wakela mperhe wawa. Iyene wahiloga dhahi: “Zuzumelaní dha wirimu, kamuzuzumele dha vati.” (Kolosi 3:2) Awene anfuniwana wang’ana  maka njedhelo nawa na wirimu. (Kolosi 1:4, 5) Wubuwela mareliho a Yehova, onowakamihedha emeleli aye olibihavi njedhelo nawa na wakela mperhe. Ejo ebaribari, masiki akala njeedhelo nawa tt’odhowa odhulu obe okala velaboni ya vati.—1 Korinto 9:24.

3. Paulo wapangile eni Akristu akwaye?

3 Paulo wahawaddela Akristu abo, sabwa ya dhilobo dhigakwekwettele oyelela mperheya. Motagiha wahiloga na Akristu akala o Kolosi sabwa ya Akristu ottambi agadhile wapupurutxa omwebedha wawa Mulugu, modhela ofwara Malamulo a Mizé, arimelihaga omuroromela wawa Kristu. (Kolosi 2:16-18) Noona wahiloga dhilobo dhawopiha dhiliwo masaka abano esuwene dhinayeleliha attu wakela mperhe onnani. Wahitaliha marhe orabelana dhubuwelo dhonyakuwa, vina yokosa akala ninokaana magudulano na amudhihu obe mbali wa mmulogoni. Malago avahile Paulo bamakamaka masaka abano. Ovanene ninfuna noone malagoya meena okwela anfwanyeya va karta yalebeliye akadda Kolosi.

RABELANI MOBUWELO ONYAKUWA

4. Dhubuwelo dhonyakuwa dhinwodha dhavi oniyeleliha ottuviwa?

4 Paulo mmaleliye wawaddela abali sabwa ya njedhelo nawa nottabiha, iyene oleba: “Paní makalelo enyu, alí vimanya dha mwilaboni: ojeberuwa, oraruwa, vidhivi-dhivi, monlelo abure, ojiwa murima na muhaku, oli ekalelo yowebedha dha dhopaddutxiwa.” (Kolosi 3:5) Dhubuwelo dhonyakuwa dhikaana guru enddimuwa, dhinowodha wobaniha mandano ehu na Yehova vina njedhelo nehu na musogorho. Mbali dhahi wajiha dhubuwelo dhonyakuwa, nanda musogorhomwa beyelela mmulogoni ologa wila dhubuwelo dhonyakuwa dhikaana guru, ‘ddikosaga kaddawodha wiyelela mundduni, mpaka moonilemi wila apa ddirimeela.’

5. Ninavibarele dhavi nigakala mmakattamihoni orutxa?

5 Nikale-wene pasope makamaka nigoona wila nili mmakattamihoni aganittukuleli otakaliha magano okwela a Yehova. Motagiha, egali yapama attu aneddelelana wita maddile ovibarelana ninga orabela ottiddelana mada, ososonana obe okala ooka. (Gano 22:3) Elobo yina yawopiha empadduwa nigarumeela okosa oleddo wa marhondda obe olaba mudhidhi mwinjene na muttu ohili mukwehu wa matelo. (Gano 2:10-12, 16) Onawodhe dhavi ovirabeliha wamwinya? Kavizinddiyelihe wila oli Munamoona wa Yehova. Ovyang’anele deretu nanda kudduwale wila omugayela muttu, onodhana manyengetto. Nikale pasope vina nigaroma ovyona ninga nili nooka. Nikale txenjewa wila ninarome omutamela muttu wonagalaliha. Dila dhina ninokubanyaga vaddiddi, okalaga ninga nipangarhaziwe na muttu-muttuvi. Ejo elobo yawopiha vaddiddi. Ogona wila oli mmakattamihoni ninga abuwene, txipo kuttiye elobo-wene wuttiyiha wakela mperhe wawo. Kamususele Yehova, onele wakela nikamihedho na abali vina arogora awo.—Kengesa Masalmo 34:18; Gano 13:20.

6. Nigasakulaga mavego txini enfanyeelihu wubuwela?

6 Wila nipé makalelo etene alí vimanya, japama orabela mavego onyakuwa. Masaka abano, mavego menjene ankosiwa, anonubutxedha  esile dhakosiwa mu Sodoma na Gomorra. (Juda 7) Attu ankosa mavego onyakuwa, anoona ninga baderetu vina kana makani. Noona ninofuna-wene okala mento. Kanirumele mavego ali etene anvaha elabo. Japama orabela osakula mavego aganittiyihile wakela mperhe wa egumi yohimala.—Gano 4:23.

‘KATAMELA OKALA’ WOKWELA NA ODERETU

7. Magudulano gani txino agatoteyile mmulogoni wokristu?

7 Ninosanzaya, oziwa wila ninokosa epaddi ya mulogo wa Okristu. Ninosunza Mazu a Mulugu, mmatugumanoni mwehu, vina nokwela ninowavilela akwihu. Okosa ejuwene enonikamihedha okala mento nang’anaga mperhe. Mbwenye masaka meena, ohinonelamo ononitotela magudulano na abali ehu obe arogora. Nigahikose guru wila nigomihe magudulanoya, ninele oroma okoya ntxiga.—Kengesa 1 Pedro 3:8, 9.

8, 9. (a) Mikalelo gani dhinanikamihedhe ottuviwa? (b) Akala Mukristu mukwehu ononinyimula txini enanikamihedhe okala mmurenddeleni?

8 Kanittiye ntxiga oniyeleliha wakela mperhe wehu. Paulo wahiloga ejile yafanyeela okosa Akristu: “Ddabuno nyuwo mulí nlogo na Mulugu; iyene ousakulani, onoukwelani; Nona thukulaní meddelo a thagaraga, ovyeviha, ofwasa, okurumuwa, ovilela. Muvilelagane, mulevelelagane dila dhetene dhinthegelana nyuwo. Muthu-muthu amulevelele mukwaye n’ekalelo euleveleleni Nabuya [Yehova]. Enpitha dhetene eso, okwelana; vowi okwelana onowakwaniha wiwanana wa athu.”—Kolosi 3:12-14.

9 Okurumuwa na oderetu ononikamiha walevelela attu ena. Nigasilidhiwa sabwa ya muttu onikoseli obure obe oninyimulile, japama wubuwela labo namunyimulile iyo muttu mwina nanda banilevelela. Ninohagalala vaddiddi okaana okwela vina olevelela ninga okuwene! (Kengesa Kohelét 7:21, 22.) Ninomutamaalela Kristu onitugumanihile ninga anamebedha ebaribari. (Kolosi 3:15) Notene ninimukwela Mulugu wakakene, ninlaleya muselu wakakene vina ninogumanana makattamiho oligana. Nigakala attu okurumuwa, okwela vina olevelelana, mulogo onele okala woliba, wowiwanana vina ninele okala mento nang’anaga ottuviwa mperhe wehu.

10, 11. (a) Nrima nikaleleni nawopiha? (b) Ninakose nni wila nrima ninaniyelelihe ottuviwa?

10 Okaana nrima, onele oniyeleliha wakela mperhe. Bibilia okaana dhotagiha dhintonyihedha wopiha wa okaana nrima. Motagiha, Kayini wahimukaanela nrima, mbale Abel ofiyedha ompa. Koré, Datan na Abiran ahimukanela nrima Mizé ofiyedha omusadduwela. Mwene Sawul, wahimukaanela nrima David, nanda wanimutamela wi ampe. Enloga Mazu a Mulugu ebaribari wila: “Txibarene vali nrima, ekalelo yowana-wana, vakala vina ohiwanana na dhotakala dhotene.”—Tiago 3:16.

11 Nigakosa kukuttu wila nikaane okwela webaribari, kaninakaane nrima. Mazu a mulugu anloga: “Onkwela onovilela, onowakoddelela murima athu. Onkwela kanna nrima.” (1 Korinto 13:4) Nikaane ebaribari yawi nrima kaninkosa epaddi ya omuttu oswa, noona japama okaana monelo wa Yehova. Ninofanyeela wawona abali na  arogora ninga epaddi ya ningo nehu, kuloga mulogo w’okristu. Bibilia onloga dhahi: “Yano modha egewa opa, dhina dhotene dhinotabuwa vamodha, yano modha egathithimihiwa, dhina dhotene dhinoziveliwa vamodha.” (1 Korinto 12:16-18, 26) Elobo yapama egampadduwela mbali, enokala ohagalala na iyene ottiya omukaanela nrima. Ndowe nimubuwele Jónata mwana wa Mwene Sawul. Jónata muziweliye wila David wahisakuliwa wi akale mwene vamburoni vaye, iyene kaanamo nrima. Wantamela omulibiha vina ompangarhaza David. (1 Samuwel 23:16-18) Ninowodha-wene okala attu okurumuwa vina okwela ninga Jónata?

AKELANÍ MPERHEYA NINGA MURALA

12. Malago gani a Bibilia ankamihedha wakeliwa mperhe vamuralani?

12 Attu otene a vamuralani agavirihamo magano a Bibilia, murala onkala wosanzaya vina njedhelo n’owakela mperhe ninkala noliba. Paulo wahavaha magano aba anamudhi: “Nyuwo ateliwi, mwakurumuwelege amamuninyu; jijene yeddelo ya muthu wa Nabuya. Nyuwo amamuni, mwakwele awadhinyu; kamweddege n’ekalelo yowanyonya. Nyuwo ayma, murumelege dhetene dhinloga amambalinyu; eji jinimuzivela Nabuya. Nyuwo amambali kamwatxutxege aninyu, anadhe wojeya.” (Kolosi 3:18-21) Onowodha woona mukalelo onkamihedha magano aba murala wawo?

13. Murogora agawodhile dhavi omukamihedha mamunaye ohili mukristu oroma omwebedha Mulugu?

13 Txino murogora mamunaye kanimwebedha Yehova. Onakose dhavi agoona wila kanimukosela oderetu? Agahisilidhiwa ofiyedha wakulana na iyene, nanda ejoya enogomiha makani? Masiki akala onompemberha  mmakanini-mwa ejoya enele omuttukulela mulobwanaya omwebedha Yehova? Mohaganyedha, nne-wene. Mbwenye omurhemeza ninga mwazambo wa ntakulu, onele okamihedha muralaya okaana murenddele vina onele odhana nttittimiho wa Yehova. Merelo awo apama anele omuttukulela omwebedha Yehova, nanda moheli munele wakela mperheya.—Kengesa 1 Pedro 3:1, 2.

14. Txini enakose mamuni akala mwadhiye ohili mukristu kanimuriha?

14 Ndowe nubuwele akala mbali mwadhiye kanimwebedha Yehova. Onakose eni ogoona wila kanuriha? Ogahifuna omooniha n’onyanyuwa wila wa munddimuwaya nanda ejoya egahimuttukulela wuttittimiha? Nne wene! Mulugu onjeedhela wila okale mamuni wokwela modhela omutagiha Yezu. (Éfeso 5:23) Yezu ninga musogorheli wa mulogo, ddodhaleliwa okwela vina olevelela. (Luka 9:46-48) Ogamutagiha Yezu, na mudhidhiya mwadhiyo txino onele ofuna omwebedha Yehova.

15. Mamuni wa mukristu onamulagihe dhavi mwadhiye wila onomukwela?

15 Yehova ohalaga amamuni: “Nyuwo amamuni, mwakwele awadhinyu; kamweddege n’ekalelo yowanyonya.” (Kolosi 3:19) Mamuni wokwela onomuriha mwadhiye. Na mukalelo gani? Onovuruwana n’ofwasa agavahaga monelo waye, vina onomulagiha wila elogiliye enele okamihedha murala wawa. (1 Pedro 3:7) Masiki akala kanvirihamo dhetene dhinlogiye, onvuruwana onele omukamihedha okosa dhosakula dhapama. (Gano 15:22) Mamuni wokwela kanimudidela mwadhiye wila amurihege. Ottiya ejuwene iyene onokosa guru wila akele nriho naye n’oligana.  Mamuni agamuriha mwadhiye, anaye anokala osanzaya, anorumeela omulabela Yehova vina onojeedhela wakela vamodha mperhe wa egumi.

Ninawodhe dhavi orabela wila makattamiho a vamuralani kaniyelelihe okaana mperhe? (Koona ddima 13-15)

AZOMBWE—KAMUYELELE WAKELA MPERHE!

16, 17. Ninga muzombwe, onarabele dhavi osilidhiwa na amambali awo?

16 Txino nubuwele wila wa muzombwe nanda ohoona wila amambali awo kanrumeela dhinkosiwe vina borutxa vaddiddi. Ejo enowusilidhaga ofiyedha ovivuza akala jaderetu-wene omulabela Yehova. Mbwenye ogamukwela Yehova, onele woona wila mwilaboni muzima, kamo muttu onukwela, wapitta abali na amarho awo a mmulogoni w’Okristu.

17 Kobuwela dhahi: Kowiliwa amambali awo kosisigula, ogaziwile dhavi wila anowukwela-wene? (Ahebreu 12:8) Txibarene, sabwa y’okala attu ohiligana, dila dhina mukalelo onasisiguliwe weyo onele wusilidha. Kuzuzumele ejuwene. Katamela woona sabwaya ekoseliwani dhawene. Kakala wokurumuwa ottiya onyanyuwa. Mazu a Mulugu anloga: “ohinlogetxa, ddwamalago; wofwaseya, ddwazelu.” (Gano 17:27) Kasakula okala muttu wowarala, orumeele malago, nanda kuwang’ane mukalelo ovahiwe malagoya. (Gano 1:8) Kudduwale wila okaana amambali animwebedha Yehova, nvaho wattima. Awene anele wukamihedha okalavi mu dila ya egumi yohimala.

18. Ekalele nni yaderetu okalela mento mperhe ondha?

18 Masiki akala njedhelo nehu tt’odhowa wirimu obe mparaizu velaboni ya vati, ninofanyeela okala mento na musogorho. Njedhelo nehu tt’ebaribari. Nindha mu nlibelo nikosile Muttanddi wa erimu, ninloga dhahi: “mwilaboni mudhala malago a Nabuya, ninga endhala manje mbara.” (Izaiya 11:9) Mohigonela attu otene velaboni ya vati anele osunzihiwa na Mulugu. Obo mperhe onfanyeelihu ottiddela mabasa. Noona kobuwela dholibela dhotene dhikosile Yehova, nanda kuttiye elobwene wuyeleliha okaana mperhe!