Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Novemburu ya 2017

Kasanza Oligana vina Ttagaraga dha Yehova

Kasanza Oligana vina Ttagaraga dha Yehova

“Nyuwo mugathongaga miladdu, kamupupurutxe; mweddegena murima w’enamudhi, wathagaraga.”—ZAKARIYA 7:9.

JIBO: 21, 11

1, 2. (a) Yezu ewamo dhavi na Nlamulo na Mulugu? (b) Anamasunziha magano na Afarizi alabihedha dhavi n’obure malamulo?

YEZU wanziveliwa ologa dha Malamulo a Mizé. Ejo kayo rurumutxa mwa iyo sabwa Nlamulo ntti nadhile wa Babe, odduwene wali muttu wamakamaka mwigumini mwa Yezu. Mowiwanana na Masalmo 40:8, Bibilia onologa mukwelelo wakwela Yezu Malamulo a Mulugu eraga: “Ddili veneva; Munivuruni na Malamulo ddilogiwamo ddire ofuna wenyu.” Yezu wahitonyihedha na mazu vina merelo aye yawi Malamulo a Mulugu aali oligana, opureleyamo vina ottangarhamiha nigavirihamo.—Mateu 5:17-19.

2 Yezu wahisilidhiwa vaddiddi vawoneliye anamasunziha magano na Afarizi, alabihedhaga bure-bure malamulo a Babe, akosihaga okala orutxa. Iyene wahiloga na awene eraga: “Munopitxa nèkumi wa vilo dhotene dha mmunddani mwenyu ofiyedha milima miñgonodha,” kuloga awene kafuna ovirihamo dhaloga malamulo. Venevo makaniya aali avi? Yezu ologa: munopwaza “malamulo manddimuwayá ninga weddana murima woligana, wawiwananeyana, thagaraga.” (Mateu 23:23)  Afarizi, katamela woona ejile yatapulela malamuloya, nanda afuna apwattelihege muttorho attu eena. Mbwenye Yezu wahifurula ejile yatapulela malamulo vina ejile yali malamuloya mwa Yehova.

3. Txini enasunze iyo mmutomani obu?

3 Ninga Akristu, kuli nikokomezo na ofwara malamulo a Mizé. (Roma 7:6) Kito Yehova ottiyeleni malamulo abo mu Nzuni naye, Bibilia? Iyene onfuna wila ninonelemo vina nivirihemo ‘dhilobo dhamakamaka’, mazuya vina magano aali mmalamuloni. Motagiha, magano gani ansunza iyo nigengesa dha masasanyedho akosiwe wi dhimagiwe mittette dh’ottawelamo? Mutoma ovirile, nihoona masunziho menjene na ejile yafuniwana okosa namattawa. Mmutomani mpu, ninele woona, txini ennisunziha omagiwa wa mittette dh’ottawelamo sabwa ya Yehova vina marhe osanzana mikalelo dhaye dhapama. Ninele wakula mavuzo mararu: Omagiwa wa mittette dh’ottawelamo enlagiha dhavi ttagaraga dha Yehova? Ennisunziha nni sabwa ya moonelo wa Yehova na egumi? Nanda ejoya enlagiha dhavi ottonga waye woligana? Mwa dhipaddi esi, katamela woona mukalelo onawodhiwe omutagiha Babi wehu wodhulu.—Kengesa Éfeso 5:1.

OMAGIWA WA MITTETTE DHOTTAWELAMO WALAGIHA TTAGARAGA DHA YEHOVA

4, 5. (a) Txini ekosiwe wila akamihedhiwe namattawa ovolowa mmuttetteni, nanda sabwa yani? (b) Ejoya ennisunziha nni mwaha wa Yehova?

4 Yehova wahikosa masasanyedho wi dhimagiwe mittette mitanu na mmodha wila muttaweliwege. Wahawaddela ana Izrayel dhahi; mugamwabuwa Jordau, muvolowa mwilaboni mpo, musakulemo mittette miraru dhikale dhottawelagamo. Sabwaya? Wila muttawelegemo momaguva vina wi avuneye ole okoyeliwe ntxiga. (Olebeliwa 35:11-14) Diladha, dhali dhapama-dhene. (Olibiha 19:3) Mowiwanana na dhilemelelo dha Ayuda, yalogiwa wi murampanimwa mwahikala dhizinddiyelo dhinjene dhamukamihedha namattawa ofiya mmittetteni eso. Namattawa ompile muttu s’ohifuna agattawela mmittetteni eso, wakala wobareleya, opitta odhowa dhilabo dhina mugadhiliye okwekwetteliwa wawebedha amulugu ottambi.

5 Kobuwela elobo dhahi: Yehova wahiruma wila ole onimpa mukwaye, apiwe. Mbwenye wahiloga wila ole onimpa mukwaye ahifunaga, wanfanyeela weddeliwa ttagaraga, okurumuweliwa vina obareliwa. Namaloga dha Bibilia dhahi ologa wila: “Dhilobo dhetene  dhikosiwe motikiniha-mwene, ninga mwafuneyelani.” Yehova kayo ninga mulamuleli wabure onag’ana dhovirigana dha emeleli aye wi agamala asottotte. Iyene ddi Mulugu “wodhala thagaraga, n’okwela.”—Éfeso 2:4.

6. Koddi Afarizi anrumeela osaza ttagaraga dha Yehova? Kataliha.

6 Afarizi, mwa epaddi yawa, kaweddela ttagaraga attu eena. Motagiha, elemelelo ya Ayuda yaloga wila Afarizi ankodda omulevelela obe omweddela ttagaraga muttu ottegile dila ttaru. Yezu afunaga osunziha wila yali elobo yabure yakosani, wahiloga nladdaniho na Mfarizi walobela vakuvi na namalogosa musoko. Mfarizi waloga dhahi: “Nabuya Mulugu, ddinoutamalelani vowi miyo kaddinligana na athu ena, ali—ambava, apuji, anamararuwa;—vina namalogosa musoko oddu.” Venevo mutomaya-mutomaya wa Yezu buvi? Nfarizi ‘kawona attu eena ninga elobwene’ ottiya eji vina wobuwela wila attu eena kafanyeela weddeliwa ttagaraga.—Luka 18:9-14.

Onofugulaga dila wila attu eena okumbirhe nlevelelo? Kakala woviyeviha, vina kumaguvele osilidhiwa (Koona ddima 4-8)

7, 8. (a) Onawodhe dhavi osaza ttagaraga dha Yehova? (b) Wila nalevelele akwehu enfanyeelela nni okala attu oviyeviha?

7 Nimutagihe Yehova ottiya Afarizi. Lagihaní ttagaraga na nttebwa. (Kengesa Kolosi 3:13.) Kalagiha ejuwene modhela walevelela attuya egafuneya. (Luka 17:3, 4) Kavivuze dhahi: ‘Ddinowalevelela akwaga momaguva vina na murima wetene masiki addittegele dila dhinjene? Ddinotamelaga wimetxa murenddele na muttu oddinyimulile obe oddipujile?

8 Wila niwodhe olevelela, ninofuniwana vina okala woviyeviha. Afarizi alogiwe, kafuna wene omulevelela muttu, sabwa kaanamo dh’olevelela. Mbwenye ninga Akristu, ninofuniwana oviyeviha, wi muttu-muttu “awonegena akwaye thima” opitta iyene, wila niwodhe olevelelana. (Filipi 2:3) Japama ovivuza dhahi, ‘Ddinomutagiha Yehova vina ddinolagihaga oviyeviha?’ Nigakala attu oviyeviha, ninele okumbirha nlevelelo n’abale anavonyela iyo vina ninele walevelela attu otene anfuna nlevelelo nehu. Nikale womala na wale wila nilevelele vina kanimaguvele osilidhiwa.—Kohelét 7:8, 9.

ORIHE EGUMI ‘ORABELE MULADDU WA NIKAMI’

9. Yehova wakamihedhi dhavi ana izrayel ononelamo wila eguni jorihiwa?

9 Elobo modha ekosihile omagiwa mittette dh’ottawelamo mu Izrayel, yali yawi abareliwe vina avuniwe, muttu okuttulile nikami na mukwaye ahifunaga. (Olibiha 19:10) Yehova onowika ttima egumi vina onowidda opanga. (Gano 6:16, 17) Noona sabwa ya ejuwene, Mulugu kapwaza muladdu wa muttu ompile mukwaye ahifunaga. Ejo ebaribari sabwani ole ompile mukwaye s’ohifuna waneddeliwa ttagaraga.  Mbwenye voroma, namapaya wanfuniwana wawaddela anddimuwa a mmuttetteni muladdu waye. Anddimuwa abo ansekeserha makaniya, nanda agoona wila kampile na pudha, namattawa wanttiyiwa okala mmuttetteni mpaka nsaka nigakwile namakutta munddimuwa wa muttette ototiliyewo muladduya. Dila yina ejo yatapulela wila namattawa agahikala mmuttetteni mottawela okalawo waye wotene. Masasanyedho abo anakamihedha ana Izrayel woona wila egumi jorihiwa. Wila amuttittimihe Namavaha wa egumi, awene anfuniwana onyanyala dhilobo dhigekile egumi yawa obe ya muttu mwina vang’ovini.

10. Mowiwanana na Yezu, yoneyile dhavi wila anamasunziha magano na Afarizi kariha dhigumi dha attu?

10 Mottiyana na Yehova, anamasunziha magano vamodha na Afarizi, katanala nne vina kariha egumi. Yezu wahaloga dhahi aweneya: “Muwadelile fugulo na onona! Nyuwo kamuvolowilemo, vina muabarela áfuna oyamo.” (Luka 11:52) Mazu a Yezu afuna atapulele nni? N’ovuta wawa, anamasunziha magano vina Afarizi agilatela osunziha nlogo Nzu na Mulugu, okalaga ninga ela wakamihedha ofwanya egumi yamukalakala. Mbwenye merelo awa anlagiha wila ela wabarela attu anadhe anfare Yezu wali “mwinya wa egumi.” (Merelo 3:15) Mwa dhahene awene ela okwekwetta nlogo adhowagana omatolowelo. Anamasunziha magano abo na Afarizi, aali anamavittukulela vina amukumbela vawa, ottiya eji awene kazuzumela egumi ya attu eena. Awene aali agwalagwambi ottabwaya!

11. (a) Murumiwi Paulo woonihile dhavi wila wanriha egumi ninga munkosela Yehova? (b) Txini enanikamihedhe omusanza Paulo na mabasa akosiye a olaleya?

11 Ninawodhe dhavi omusaza Yehova oku nirabelaga okala ninga anamasunziha magano vina Afarizi? Ninele omusaza nigariha vina wika ttima egumi. Murumiwi Paulo wahikosa ejuwene modhela walaleya miselu dhapama, sabwa ya Omwene, attu enjene. Noona iyene wahifiyedha ologa: “mmodhavo wenyu onarimele, muladdu kauwo waga.” (Kengesa Merelo 20:26, 27.) Niloge wila Paulo walaleya sabwa ya wova okaana muladdu wa nikami obe sabwa y’orumiwa na Yehova? Nne. Paulo wanakwela attuya. Wahoona wila egumi ya attuya abo yali ya ttima, nanda wafuna wila awene akaane egumi yohimala. (1 Korinto 9:19-23) Iyo vina noonege egumi ninga munoonela Yehova. Iyene onfuna wila attu otene atxinuwe wi akele egumi. (2 Pedro 3:9) Nigamusanza Yehova, ninele wakwela attu otene. Okurumuwa vina olevelela, onele onittukulela walaleya na ntidi attu otene, nanda ninele wagalala okosa ejuwene.

12. Obareleya okalelini wamakamaka munlogoni na Yehova?

12 Wila nikaane monelo woligana na wa Yehova, ninofanyeela ozuzumela nibarelo. Akala nineddiha mota, sikaleta, obe akala ninkosa mabasa a omaga numba ya webedha, nikose na nibarelo. Attu, nibarelo, vina egumi ya muttu, sa’ttima opitta kobiri. Mulugu wehu, onziveliwana dhilobo dholigana, noona iyo nimutagihe iyene. Anddimuwa a mulogo makamaka, anofanyeela otanaalela kakamwe nibarelo nawa vina attu eena. (Gano 22:3) Akala anddimuwa a mulogo anonubutxedha oderetu wa nibarelo, navuruwanege vina nivirihemo malagoya. (Galásia 6:1) Mugariha egumi na moonelo wa Yehova, “kamunagweliwe muladdu wovuviha nikame.”

 ASORIHE ‘MOWIWANANA NA MALAMULO ABA’

13, 14. Anddimuwa mu Izrayel asanza dhavi ttagaraga dha Yehova?

13 Yehova waharuma anddimuwa a mu Izrayel wila asorihege afaraga magano aye. Voroma anddimuwayá anfanyeela oziwa mowakwana makaniya. Agamala ononelamo mowakwana emuttukulele muttuya oddo ompa mukwaye, vina merelo a namapaya, venevo ansakula omweddela ttagaraga obe nne. Antamela vina woona akala namapaya wannimukanela ntxiga ole ompileye. (Kengesa Olebeliwa 35:20-24.) Elobo yina jawi namapaya ahinatti ottongeliwa opiwa, antameliwa akala vahikala anamoona a muladduya ngafuna eeli.—Olebeliwa 35:30.

14 Agamala ononelamo deretu makaniya, anddimuwa abo anroma omutamaalela muttuya ottiya dhikosiliye. Anddimuwaya aroma opepesa wila oone emuttukulele muttuya okosa elobo ninga ejuwene vina txini yapadduwilevo. Mwa dhotene eso awene ankumbirha muya wa Yehova, wila wakamihedhe osaza ttagaraga, olevelela vina oligana waye.—Obudduwa 34:6, 7.

15. Mukalelo wawona Yezu attegi, wattiyanile dhavi na monelo wa Afarizi?

15 Afarizi, kasoriha na ttagaraga. Awene azuzumela oziwa ekosile muttegiya ottiya oroma wombeza ekalelo ya muttuya. Mfarizi dhahi mmooneliye Yezu ajaga vatakulu va Mateu, iyene wahavuza anamafwara aye: “Ngani nyuwo, namasunziha wenyu onjela nni na anamapitxiha musoko na athegi?” Yezu omwakula: “Agumi kanimfuna ñganga, animunlela ba aredda. Dhowani, mwasunze entapulela mazuyá: ‘Enfunetximi thagaraga, kaiyo mukutho.’ Miyo kaddidhele wawithana athu okoddela murima, ddàdhele athegi.” (Mateu 9:9-13) Na mazu aba, Yezu wafuna apangarhazena attegi? Nne, kayo mwenemo. Iyene wafuna wila attegiyá atxinuwe. Merelo abo ankosa epaddi ya muselu walaleya iyene. Iyene wahizinddiyela wila “anamapitxiha musoko na athegi” eena anfuna-wene okosa masadduwo. Yezu kadhowile ojavi bahi vatakulu va Mateu. Wadhoweli vatakulu apo sabwa Mateu wali namafara waye. (Marko 2:15) Mokubanyiha-mwene, Afarizi kawona attu ninga mwakosela Yezu. Awene karumela wila attuya anfuna-wene okosa masadduwo, awoona ninga attegi ottabwaya. Txibarene, awene ahittiyana vaddiddi na Yehova oli wolevelela vina wa ttagaraga!

16. Txini enfanyeela ononelamo anddimuwa ansekeserha makani a muttu ottegile?

16 Anddimuwa a mulogo ovanene, anomusaza Yehova modhela ‘okwela oligana’ waye. (Masalmo 37:28) Voroma, awene ‘anoroma opepesa’ makaniya wila akaane ebaribari akala yottegaya txibarene ekosiwa-wene. Akala pumwenemo-wene, anofwara magano a Bibilia wila akose yosakula enfanyeelela muladduya. (Olibiha 13:12-14) Awene agattongaga makani a mmulogoni, akale pasope wila oone akala muttegiya onele otxinuwa obe nne. Ejoya kayo elobo yovevuwa okosawa. Otxinuwa entapulela wila muttegi ononelamo ekosiliye vina murima waye okubanya. (Ovuhulela 3:3) Muttegiyá onofanyela otxinuwa wi aleveleliwe. *—Koona yowenjedha.

17, 18. Anddimuwa a Mulogo anaziwe dhavi akala muttuya otxinuwa wene? (Koona foto eli omaromo.)

17 Yehova na Yezu anoziwa kakamwe enubuwela vina enfuna muttu, sabwa awene  anowengesa murima. Mbwenye anddimuwa a mulogo kanwodha wengesa murima. Akala wa munddimuwa wa mulogo, onawodhe dhavi ozinddiyela wila muttu oddu otxinuwa-wene? Voroma olobele okumbirhaga eziwelo na mirugu dhapama. (1 Amwene 3:9) Vanawili, olabihedhe Mazu a Mulugu vamodha na manivuru meena ampakiwa na mwimeleli wororomeleya, wila okamihedhe ottiyaniha “okubanya ondhana dhozuzumela dha vati” vina “okubanya ondha wa Mulugu,” kuloga otxinuwa webaribari. (2 Korinto 7:10, 11) Ndowe noone enloga Bibilia sabwa ya abale atxinuwile-wene vina abale ahatxinuwile, nigamala ninele woona mukalelo wewamo, wobuwela vina wakosani dhilobo.

18 Vanoraru, omutanaalele muttuya ottiya wubuwela dheriliye bahi. Okoseleni, nanda oli dhavi mmaleliye okosa? Iyeneya okosele nni dhosakula ninga esuwene? Magudulano aye bavi nanda ehinwodhiye txini? Bibilia onloga wila Yezu, munddimuwa wa mulogo wa Okristu, “kanthonga miladdu na dhinoneya, kangwadda na dhawiwavi. Onowasoriha ayelegi na murima woligana, onowamelela dhinafwanyelele apujiwi a mwilaboni.” (Izaiya 11:3, 4) Anddimuwa a mulogo, Yezu wuttomileni nyuwo weddiha mabila a mulogo waye noona onele wukamihedhani ottonga makani n’oligana vina ttagaraga. (Mateu 18:18-20) Ninotamaalela vaddiddi sabwa yokaana anddimuwa a mulogo abuwene annilibiha! Anonikamihedha olagiha olevelela vina ttagaraga muttu na mukwaye.

19. Omagiwa wa mittette dh’ottawelamo onisunzihile okosa nni?

19 Mmalamuloni a Mizé mwanfanyeyamo “onona n’ebaribari.” Ejo enonisunziha sabwa ya Yehova na magano aye. (Roma 2:20) Omagiwa wa mittette dh’ottawelamo, dhilogiwe mmalamuloni, enowasunziha anddimuwa a mulogo ‘ottonga n’oligana, na ebaribari’ vina enonisunziha weddagana “murima w’enamudhi, wathagaraga.” (Zakariya 7:9) Masiki vahili ofuneya ofwara Malamulo abo, Yehova txipo kasadduwile. Ttagaraga na olevelela, dhikalawovi mmurimani mwaye. Eji gari enddimuwa ya omwebedha Mulugu ninga odduwene. Noona ndoweni nimusaze na mikalelo dhaye dhapama, wila nifwanye obareleya, na osanzaya mwa iyene.

^ par. 16 Koona “Perguntas dos Leitores” mu A Sentinela 15 de Setembro, 2006, nikuku 30.