Skip to content

Skip to secondary menu

Skip to table of contents

Anamoona a Yehova

Etxuwabo

Mwang'aneli (Wosunzana)  |  Mayu ya 2017

“Onoddikwela Opitha Aba?”

“Onoddikwela Opitha Aba?”

“Simoni, mwana Joau, onoddikwela opitha aba?”—JOAU 21:15.

JIBO: 32, 45

1, 2. Txini esunzile Pedro mumaleliye omattiyu wantero attaddaga?

ANAMAFWARA atanu na eli a Yezu ela ottadda omattiyu wantero mu nyaza y’o Galilea. Omattiyuyá obule kapile nne oba modha. Omembesiwa Yezu wamalile ovenyihiwa mu okwani, wahimela nikome na nyaza bagawang’ana. Nomala “Yezu ologana dhahi: ‘Tuputxedhani mulaba epadde y’omononi woja wa mwanddiya, munopa.’ Awene atuputxedha mulaba, apa oba dhinjene ofiyedha ohiwodha oburula.”—Joau 21:1-6.

2 Yezu wahavaha anamafwara aba oba na mukatte wila aje. Awene ajaga Yezu wahizugunuwa banvuza Pedro: “Simoni mwana Joau, onoddikwela opitha aba?” Yezu wanziwa wila Pedro wanziveliwa ottadda. Iyene wafuna aziwe akala Pedro wanziveliwa na Yezu vina masunziho aye opitta ottadda na oguliha oba. Pedro omwakula: “Nabuya, nyuwo munona wi ddinoukwelani.” (Joau 21:15) Oroma  labonene nttile, Pedro wahitamela ovirihamo mazu alogiliye. Olagiha omukwela waye Kristu alaleyaga s’ohilema vina wahikala muttu wokweleya mmulogoni wa Okristu.

3. Txini enfanyeela Akristu ononelamo?

3 Mazu alogile Yezu na Pedro annisunziha eni? Nikale txenjewa wila omukwela wehu Kristu onadhe wobane. Yezu wanziwa wila okalawo wa masaka abano omariha egali elobo yorutxa vaddiddi. Mu nladdaniho naye na muliba wala beu, Yezu wahiloga wila attu eena agahirumeela “mazu a Omwene” vina omaromo agahittiddela na nroromelo. Mbwenye “ojiwa murima na dhorela” ‘ogahihogamo nzuná’ nanda attuya agahittiya nroromelo nawa okuwara. (Mateu 13:19-22; Marko 4:19) Nigahikale pasope, dhozuzumiha dha labo-labo dhinele wobaniha mabasa ankosihu a Yehova. Noona Yezu wahawaddela anamasunza eraga: “Porhe-porhe, mirima dhenyu dhinabwine n’ojetxavo elabo, n’othabwiha olezela, n’ozuzumeletxa dha vati.”—Luka 21:34.

4. Txini enanikamihedhe oziwa akala omukwela wehu Kristu koliba? (Koona foto eli omaromo.)

4 Ninga mukoseli Pedro, ninele olagiwa wi ninomukwela Kristu nigeeka mabasa a olaleya vamburoni voroma mwigumini mwehu. Ninakaane dhavi ebaribari wila nidhowevi vasogorho na mabasaya abo? Japama ovivuza nanya: ‘Enkweletxa miyo mwigumini mwaga txini? Ddinohagalala okosa mabasa a Yehova obe enddizivela okosa dhilobo dhina?’ Wila niwodhe wakula mavuzo aba, ndowe noone dhipaddi ttaru dha mwigumini dhinobaniha omukwela wehu Kristu. Dhipaddidha sisi; otamela ganyo, mavego na dhorela.

GANYO EKANA MBUROYA

5. Muttorho gani ona amwazambo?

5 Kahiyo wila Pedro wela oziveliwetxa ottadda oba. Iyene wansapela murala waye na korowa dhagumeliye agaguliha obadha. Masaka a ovanene, Yehova ohattiyedha amwazambo muttorho wa osapela murala wawa. (1 Timóteo 5:8) Awene anolaba na guru wila awodhe osapela muralayá. Mbwenye masaka abano omariha, otameletxa ganyo onowatotela ngovi attu enjene.

6. Ganyo mudhidhi mwina entotela nni onyimuwa?

6 Attu enjene anotamela ganyo, mbwenye ganyoya kinooneya. Sabwa ya ejuwene, attu eena anokosaga mavurhano wila akale oroma ogumela ganyo. Attu abo anowenjedhedha mudhidhi wolaba wila agumelena kobiri dhinji. Dhimpereza dhinjene dhinokosa mabasa owinjiva n’attu ang’onovi bahi. N’eji anamalaba enjene anolema vaddiddi, enaya anokalaga aredda vina onyimuwa. Enjiya anowova oyelela ganyo yawa ttabwa-ttabwa agavirihemo elogile mwimeleli wawa.

Akristu anomukwela Yehova opitta dhilobo dhina

7, 8. (a) Bani onimwiweleletxa iyo? (b) Mbali w’o Tailândia osunzile nni na mabasa aye?

 7 Ninga Akristu, ninomwiwelela Yehova opitta muttu mwina. (Luka 10:27) Ninoziwa wi nigakaana ganyo ninowodha ovisapela vina okamihedha mabasa ehu a olaleya. Mbwenye nigattiya ovyang’anela, ettomo y’omabasani enele opuranya omwebedha wehu Yehova. Ndoweni noone yotagiha ya Mbali dhahi w’o Tailândia. Iyene bela: “Mabasa aga aali osasanyedha komputador dhonongeya, ánddizivela vaddiddi mbwenye anja mudhidhi mwinjene. Kaddakana mudhidhi wila ddang’anele omuyani waga. Omamalelowa ddahoona wila kofuna wika mabasa a Omwene vamburoni voroma ddanfwanyeela osaddulela malabelo a mabasaga.” Txini ekosile mbali oddu?

8 Iyene ohenjedhedha: “Mmalelimi yaka yantero dditanalelaga esuwene, ddahisakula oguliha sumu murampani. Omaromo ddahikaana makattamiho menjene vina ddahiyelega. Ddigagumana na akwaga omabasani andditeya vina anddivuza ettiyelimi osasanya komputador vamuruntini nanda ddigaguliha sumu vanzuwani. Ddahimukumbirha Yehova wila addilibihe ddiwodhe okwaranya makattamiho aga wi ddikose mabasa aye. Mudhidhi mung’onovi dhilobodha dhahiroma wedda deretu. Ddahiroma woona wila attu enjene anziveliwa na sumu-naga, noona ddansasanya deretu. Sabwa ya ejuwene, sumuna kanagonela. Ovanene ddikana korowa enakwana opitta ddisasanyaga komputador. Ovano kaddinlema, nne vina kaddinyimuwa ninga mwa-wale. Ovanene ddinowodha onfiyedha Yehova.”—Kengesa Mateu 5:3, 6.

Ddinoziveliwa vaddiddi na ganyo yaga opitta mabasa a Yehova?

9. Ninawodhe dhavi okaana monelo wowakwana na mabasa a mwilaboni?

9 Yehova onohagalala nigalabaga na guru. Mabasa a guru botamaleliwa. (Gano 12:14) Ninofwanyeela okaana ebaribari yawi ganyo yehu kahiyo yamakamaka opitta mabasa a Yehova. Alogaga sabwa ya dhilobo dhinnijombela, Yezu ologa: “Tamelaní voroma Omwene wa Mulugu na wira enfuna iyene; dhinagu dhetene munowenjedhedhiwavo.” (Mateu 6:33) Koddi ninawodhe dhavi woona wila monelo wehu na ganyo boligana? Japama ovivuza nanya, ‘Ddinoziveliwa vaddiddi na ganyo yaga opitta mabasa a Mulugu ankosa miyo?’ Nigatanaalela deretu nivuzo ntti ninele woona txibarene ennizivela vopitta.

10. Ttima gani enna masunziho a Yezu?

10 Yezu onisunziha enakale vamburoni woroma mwigumini mwehu. Labo dhahi wahidhowa wawona amarho aye Maria na Marta. Momaguva Marta wahizuzuma na opiya dhoja, oku Maria bagilatile anvuruwanaga Yezu. Marta  wahiloga wila Maria kanimukamihedha. Yezu wahimwaddela Marta eraga: “Maria osakula yapamayá, ehinakiweye.” (Luka 10:38-42) Yezu onisunziha elobo yamakamaka. Wila nirabele ozuzumeletxa dhilobo dha elabo, jaderetu osakula epaddi “yapamayá.” Eji enfuna etapulele wi omarho wehu na Yehova okale vamburoni voroma mwigumini mwehu.

MONELO WEHU NA MAVEGO VINA MAREDHELO

11. Txini enloga Bibilia sabwa ya ovuma?

11 Sabwa yawi ninkala mabasavi, mudhidhi mwina ninofuna ofwaseya wi nivume. Bibilia onloga: “Kaiwo elo enimuthabiha muthu ehili oja, omwa, ojavo dhipurileye na mabasaye.” (Kohelét 2:24) Yezu wanziwa wila anamafara aye anfuna viina ovuma. Motagiha labo dhahi valemilani sabwa ya mabasa a olaleya, Yezu wahiloga: “Ndhoweni vehu-vene, mwethuwe vañgono.”—Marko 6:31, 32.

12. Ninfanyeelela eni okala pasope na mavego vina maredhelo? Kaloga yotagiha.

12 Mavego anonivaha mudhidhi wovuma. Masiki dhawene nikale pasope wila mavego anadhe okala elobo yamakamaka mwigumini mwehu. Vyaka zana dhoroma attu enjene ahikaana monelo wologa: “Ndhoweni nije, nimwe, mangwana nikwe vyehu.” (1 Korinto 15:32) Moonelo obu, okalawo masaka abano. Motagiha, muzombwe dhahi o Europa, wahiroma wona matugumano a Anamoona a Yehova. Vowi wanziveliwa mavego vaddiddi, wahittiya otugumanawá. Musogorhomwa wahoona wila mavego aye ahiroma omutotela makattamiho. Wahiyelela omusunza Bibilia, nanda baroma olaleya miselu dhapama. Mmaleliye obatiziwa ologa: “Ddinotxinuwa sabwa y’oziwa wila ddinonga mudhidhi mwinjene ddizuzumelaga mavego a elabo ya Satana, opitta otamela omulabela Yehova.”

13. (a) Kavaha yotagiha enlagiha wila mavego na maredhelo menjene babure. (b) Txini enanikamihedhe okaana monelo wowakwana na mavego vina maredhelo?

13 Mavego anonikamihedha ovuma wila niwodhe okaana guru dh’olaba. Koddi ninavire mudhidhi mungasi mmavegonimwa? Wila niwodhe wakula nivuzo ntti nirome otanaalela dhahi. Attu enjene anoziveliwa oja bolu vina dhilobo dhottapirha. Masiki dhawene ninoziwa wila akala awene anoja esodha malabo etene dhinele watotela oredda. Wila nikaane egumi, enofuneya oja dhoja dhaderetu. Na mukalelo wakakene, akala ninovira mudhidhi mwinjene mmavegoni obe mmaredheloni, ejo enele opatta omarho wehu na Yehova. Txini enanikamihedhe woona akala monelo wehu na mavego vina maredhelo bwaderetu? Enddimuwaya enanikamihedhe woona, ku otanaalela mudhidhi onnonga iyo nikosaga mabasa a Yehova ninga woona matugumano a Okristu, olaleya miselu dhapama vina omusunza Bibilia. Musogorhomwa nitanaalele mudhidhi onnongihu nonaga vidiyu obe oponya mpirha. Kito nigamala otanaalela mudhidhiya onnongihu, ninsunzavo eni? Ninokosa masadduwo?—Kengesa Éfeso 5:15, 16.

14. Txini enanikamihedhe osakula mavego apama?

 14 Yehova onivaha gari yosakula mavego vina maredhelo annihagalaliha, noona amambali battomeliwe osakula. Mbibiliani mukala malago anziwiha mubuwelo wa Yehova na mavego vina maredhelo. Malago abo anonikamihedha okosa dhosakula dhapama. * (Koona yowenjedha.) Mavego aderetu “mivaho dha Mulugu.” (Kohelét 3:12, 13) Joziweya wila attu ottiyana-ttiyana anofuna vina mavego ottiyana. (Galásia 6:4, 5) Noona mavego-mavegovi anfunihu osakula, nikalele txenjewa. Yezu ologa: “Vali muhaku wawo, pali murima wawo.” (Mateu 6:21) Omukwela wehu Mwene Yezu onele onittukulela ologa vina wimetxa merelo anlagiha wi Omwene kwa ttima mwa iyo opitta dhilobo dhina.—Filipi 1:9, 10.

KODDO YA OFUNETXA DHORELA

15, 16. (a) Ofunetxa dhomaningoni ondha dhavi okala murega? (b) Malago gani owakwana anivahile Yezu sabwa ya dhofuna dhomaningoni?

15 Attu enjene anoziveliwa okaana dhilobo dha muttengo munddimuwa. Awene anojiwa murima na ofuna dhorela, ekalelo enimukosiha muttu otameletxa dhilobo dhomaningoni opitta dhilobo dhomuyani. Txini eli yamakamakaya mwa iyo ninga Akristu? Kavivuze: ‘Ddinononga mudhidhi mwinjene dditamelaga  muttitto waderetu obe guwo dha moda opitta mudhidhi wosasanyedha matugumano aga? Ddinzuzumeletxa dhilobo dha labo-labo, ofiyedha odduwala malobelo na omwengesa Bibilia?’ Nigahikale txenjewa, okwela onkanihu na dhilobo onele wobaniha omukwela wehu Kristu. Kanidduwale mazu alogile Yezu: “Porhe-porhe, murabele mukalelo wowanyedha.” (Luka 12:15) Walogela nni dhawene?

Kinwodheya omperhekela Yehova guru dhehu oku nitamelaga dhorela dh’omaningoni

16 Yezu wahiloga wila “kawo onwodha walaba anya eli.” Wahenjedhedha: “Nona kamunwodha ovilevela Mulugu, ovilevela muhaku.” Kinwodheya omperhekela Yehova guru dhehu oku nitamelaga dhorela dh’omaningoni. Yezu wahiloga wila “agamukwela mmodha, onomwidda mwina” obe “agamulaba mmodha, onompwaza mwina.” (Mateu 6:24) Sabwa yokala attegi dila dhinjene ninowana na dhilobo “dhinthopa mwili,” vamodha na dhorela dh’omaningoni.—Éfeso 2:3.

17. (a) Attu eena anrutxeliwa eni okaana monelo wowakwana wa dhilobo dhomaningoni? (b) Txini enanikamihedhe owana na dhofuna dhomaningoni?

17 Attu enjene anzuzumela dhofuna dhawa, noona enowarutxa okaana moonelo waderetu wa otamela dhorela dh’omaningoni. (Kengesa 1 Korinto 2:14.) Sabwa y’okodda otanaalela deretu esodha, kanwodha ottiyaniha dhilobo dhabure na dhapama. (Ahebreu 5:11-14) Ofunetxa wawa dhorela dhomaningoni onowunuwa. Noona agagumelaga panfunetxanivi. (Kohelét 5:10) Vahikala elobo enakosihu wila niwodhe okwaranya dhubuwelodha eso. Nzu na Mulugu ninonivaha malago wila nikwaranye efunelo ya ofunetxa dhorela. (1 Pedro 2:2) Yezu wantanaalela enonelo ya Yehova nanda eji emukamihedha opemberha dhoweha dha Satana. (Mateu 4:8-10) Masaka abano nafuna opemberha efunelo ya dhorela dh’omaningoni, kanidduwale olabihedha eziwelo ya Mulugu mwigumini mwehu. Nigakosa dhawene, ninele omulagiha Yezu wila ninomukwela vaddiddi opitta dhorela dh’omaningoni.

Txini elitxi yamakamaka mwigumini mwawo? (Koona ddima 18)

18. Txini enakose weyo?

18 Yezu anvuzaga Pedro wila, weyo “onoddikwela opitha aba”? wafuna amusunzihe Pedro wila omulaba Yehova elobo yamakamaka mwigumini mwa muttu-muttu. Johagalaliha oziwa wi nzina na Pedro nintapulela “nlugu.” Pedro wahikaana mikalelo dhaderetu noona waladdanihiwa na nlugu. (Merelo 4:5-20) Ovanene, ninofuna vina wila omukwela wehu Kristu okale woliba pwí. Nigakosa ejuwene ninele woona wi otamela ganyo, mavego vina dhorela kadhinanizuzumihe. Nigamala ninele okala ninga Pedro wamwaddele dhahi Yezu: “Nabuya nyuwo munona wi ddinoukwelani.”

^ par. 14 Koona mutoma onloga “A sua recreação é benéfica?” mu revista A Sentinela 15 de Outubro de 2011, makuku 9-12, ddima 6-15.